აპრილის პირველი ღამე 2026 წელს ცაზე განსაკუთრებული მოვლენით აღინიშნება, რომელსაც „ვარდისფერი მთვარე“ ეწოდება და გაზაფხულის სეზონის სიმბოლურ დაწყებას კიდევ ერთხელ უსვამს ხაზს. მიუხედავად სახელწოდებისა, მთვარე რეალურად ვარდისფერი არ ხდება. მისი სახელი ჩრდილოეთ ამერიკის მკვიდრი ტომების ტრადიციებიდან მოდის და ბუნებაში მიმდინარე სეზონურ ცვლილებებს უკავშირდება.
მთვარის სრული ფაზა 1 აპრილს, აღმოსავლეთ დროით 22:11 საათზე დადგება, თუმცა სავსე მთვარე თვალისთვის თითქმის სრულად განათებული რამდენიმე ღამის განმავლობაში დარჩება. საუკეთესო სანახაობა იქნება მთვარის ამოსვლისას, როდესაც ის ჰორიზონტთან ახლოს უფრო დიდი და ოქროსფერი ელფერით ჩანს.
„ვარდისფერი მთვარის“ სახელწოდება უკავშირდება გაზაფხულის ერთ-ერთ პირველ ყვავილს — moss pink-ს, რომელსაც ველური მიწის ფლოქსსაც ან მცოცავ ფლოქსსაც უწოდებენ. სწორედ ამ მცენარის აყვავება აღნიშნავდა ბუნების გაღვიძებასა და ახალი სეზონის დაწყებას. სხვადასხვა კულტურაში აპრილის სავსე მთვარეს სხვა სახელებიც აქვს, მაგალითად:
- Sprouting Grass Moon — ამონაყარი ბალახის მთვარე
- Egg Moon — კვერცხის მთვარე, რომელიც განახლებასა და სიცოცხლის ციკლს უკავშირდება
- Fish Moon — პერიოდი, როცა თევზები გამრავლებისთვის ზედაპირს უახლოვდებიან
ასტრონომიულად, სავსე მთვარე მაშინ ჩნდება, როდესაც დედამიწა მზესა და მთვარეს შორის მდებარეობს და მთვარის განათებული მხარე სრულად ჩანს. ასეთი ფაზა დაახლოებით ყოველ 29 დღეში ერთხელ მეორდება.
აპრილის სავსე მთვარე ხშირად ასოცირდება განახლებასთან, ახალი მიზნების დასახვასა და ენერგიის გააქტიურებასთანაც. ბევრ კულტურასა და თანამედროვე ასტროლოგიურ პრაქტიკაში ეს პერიოდი ცვლილებების, გადაწყვეტილებების მიღებისა და ახალი ეტაპის დაწყებისთვის ხელსაყრელ დროდ მიიჩნევა.
