პარიზში, პიკასოს მუზეუმში JACQUEMUS –ის ‘La Palmier’ Show (Le Palmier -ფრანგ. პალმა) გაიმართა. ახალ კოლექციაში სიმონ პორტ ჟაკმუსის შთაგონების წყარო საკუთარი ოჯახი, მხატვარი პაბლო პიკასო და XX საუკუნის საკვანძო სილუეტები გახდა.
პალმის მოტივები პირდაპირი მინიშნებაა ვარცხნილობაზე, რომელსაც დიზაინერი თავის ქალიშვილს ხშირად უკეთებს. პოდიუმზე მოდელები ანალოგიური ვარცხნილობებით გამოვიდნენ.
შოუზე, რომელშიც ქართველი მოდელი, მატილდა გვარლიანი მონაწილეობდა, მაყურებელმა ჩანთა Valérie-ს სხვადასხვა ვერსია იხილა. სიმონმა ეს აქსესუარი დედის პატივსაცემად შექმნა, რომელიც ავტოკატასტროფაში დაიღუპა, როდესაც სიმონი მხოლოდ 18 წლის იყო. ტრაგიკულმა დანაკარგმა დედის ფიგურა მოდის სახლის ცენტრალურ სახედ აქცია. სიმონი კოლექციებში მუდმივად დედის საყვარელ სტილისტურ ელემენტებს აცოცხლებს: თავსაფრებს, ჰაეროვან პარეოებსა და განიერფარფლიან ქუდებს.
დიზაინერის ბებია, ლილინ ჟაკმუსი, რომელიც ახლახან Jacquemus-ის პირველი ოფიციალური ამბასადორი გახდა, ჩვენებას თვალს პირველი რიგიდან ადევნებდა.
„ჩემთვის მთავარია, რომ ჩემი შვილიშვილი იყოს ბედნიერი. ოჯახი ყველაფერზე წინ დგას“, – აღნიშნა მან WWD-სთან ინტერვიუში.
პრეზენტაცია პარიზის პიკასოს მუზეუმში შემთხვევით არ გამართულა. ჟაკმუსის თქმით, საჭირო განწყობის დასაჭერად აქ დიდ დროს ატარებს. აქედან მოდის კოლექციის მკვეთრი აქცენტები და თითქოს მხატვრის ტილოებიდან გადმოსული სილუეტები.
ჩვენება დაასრულა მოდელმა ასიმეტრიულ შავ კაბაში, რომლის გულამოჭრილი ნაწილი მკერდს აშიშვლებდა. გოგონა მას შამპანურის ბოკალიანი ხელით იფარავდა – ზუსტად ისე, როგორც პაბლო პიკასოს ქალიშვილი, პალომა პიკასო, ჰელმუტ ნიუტონის 1973 წლის ცნობილ ფოტოზე.
ფოტო: პალომა პიკასო 1973 წელი
ჩვენებას უამრავი ვარსკვლავი დაესწრო: ტინა კუნაკი, ელტონ ჯონი, ელისაბედ ოლსენი, ანა ვინტური, სოფი მარსო და სხვები. 28 წლის მოდელი ტინა კუნაკი ჩვენებაზე დეკოლტიანი შავი კაბით მივიდა, 76 წლის ანა ვინტური – ყვავილებით მოქარგული პალტოთი, ფრანგული კინოს ვარსკვლავმა, სოფი მარსომ კი რომელიც წელს 60 წლის იუბილეს აღნიშნავს, ტყავის ქვედაბოლო და ქურქი მოირგო.
ასევე დაგაინტერესებთ
