მილა კუნისი 1983 წლის 14 აგვისტოს ჩერნივცში დაიბადა. დედამისი სკოლაში ფიზიკის
მასწავლებლად, მამამისი კი, პროფესიით ინჟინერ მექანიკოსი ტაქსის მძღოლად მუშაობდა. 1991
წელს, როდესაც მილა სულ რაღაც 7 წლის იყო, მისმა ოჯახმა უკრაინა დატოვა და საცხოვრებლად
ლოს ანჯელესში, კალიფრონიაში გადავიდა.
„თან მხოლოდ 250 დოლარი გვქონდა, ეს იყო თანხა, რისი თან წამოღების უფლებაც გვქონდა.
ჩემმა მშობლებმა უარი თქვეს თავიანთ სამსახურებზე, ყველაფერი მიატოვეს და ჩვენთან ერთად
ამერიკაში წამოვიდნენ. მახსოვს, ნიუ-იორკში ოთხშაბათს ჩავედით და პარასკევს დილით მე და
ჩემი ძმა უკვე ლოს-ანჯელესის სკოლაში ვიყავით.“
მილამ ამერიკაში ჩასვლისთანავე Rosewood-ის დაწყებით სკოლაში დაიწყო სიარული. მას
ინგლისური ენა არ ესმოდა, რაც თავდაპირველად ადამიანებთან კომუნიკაციაში დიდ პრობლემას
უქმნიდა.
„მეორე კლასი თითქმის აღარ მახსოვს. დედას და ბებიას ხშირად ვესაუბრებოდი ხოლმე ამ
თემაზე. ჩემთვის ძალიან რთული იყო ახალ ცხოვრებასთან შეგუება, ყოველდღე ვტიროდი. არ
მესმოდა მათი კულტურა, ვერ ვუგებდი ჩემს გარშემომყოფ ადამიანებს, ვერ ვსაუბრობდი მათ
ენაზე. მახსოვს, ერთხელ კოლეჯისთვის დაწერილ ესეში რა დავწერე: „წარმოიდგინეთ, რომ 7
წლის ასაკში ხართ უსინათლოები და ყურებში საერთოდ არ გესმით, სწორედ ასეთი გრძნობა
მქონდა, როდესაც საცხოვრებლად ამერიკის შეერთებულ შტატებში ჩამოვედი“.
მილა კუნისი ფართო საზოგადოებამ That ‘70s Show-დან გაიცნო, რომელშიც მსახიობი მის
ამჟამინდელ მეუღლესთან, ეშტონ კატჩერთან ერთად მონაწილეობდა.
რამდენად უცნაურადაც არ უნდა ჟღერდეს, ხშირად, ადამიანების მიერ დასმულ კითხვას, თუ
საიდან იყო მილა წარმოშობით, ვარსკვლავი უკრაინის ნაცვლად ყველას რუსეთით პასუხობდა.
„ჩემთვის არარელევანტური იყო ის, რომ უკრაინიდან ვიყავი. ამას მნიშვნელობა არ ჰქონდა,
იმდენად, რომ ყოველთვის ვამბობდი, მრავალი მიზეზის გამო, რომ რუსეთიდან ვიყავი… ერთ-
ერთი მიზეზი იყო ის, რომ ამერიკაში ჩამოსვლისთანავე მიჭირდა ადამიანებისთვის იმისი ახსნა
თუ საიდან ვიყავი. როდესაც საუბარს უკრაინაზე ვიწყებდი, ყველას უჩნდებოდა შემდეგნაირი
კითხვები „უკრაინა რომელი ქვეყანაა?“, „რუკაზე სად არის?“ და შემდეგ მიწევდა ამ ყველაფრის
ახსნა, რასაც ძალიან დიდი დრო სჭირდებოდა“.„რუსეთი ძალიან დიდი ქვეყანაა, როდესაც ვამბობდი, რომ რუსეთიდან ვიყავი, აღარ მჭირდებოდა
იმის ახსნა, თუ სად მდებარეობდა ის, ამიტომ ერთხელაც ვთქვი: „შესანიშნავია, ამიერიდან ხალხს
ვერტყვი, რომ რუსეთიდან ვარ“.
მილა კუნისმა ამჟამინდელ ინტერვიუებში არაერთხელ აღნიშნა, რომ ყველაფერი რადიკალურად
შეიცვალა მას შემდეგ, რაც რუსეთი უკრაინის ტერიტორიაზე შეიჭრა და ქვეყანას ომი გამოუცხადა.
„ვერც კი გამოვხატავ ან ავხსნი იმას, რაც უცებ ვიგრძენი… ღმერთო, თითქოს ვიღაცამ გული
ამომგლიჯა. ეს ყველაზე უცნაური შეგრძნება და საშინელი განცდა იყო.“„დღეს მე ყველაზე მეტად ვამაყობ იმით, რომ უკრაინელი ვარ. ჩემი ოჯახი 1991 წელს ჩამოვიდა
ამერიკის შეერთებულ შტატებში და ყოველთვის მიმაჩნდა თავი ამერიკელად, ამაყ ამერიკელად,
მიყვარს ყველაფერი, რაც ამ ქვეყანამ ჩემთვის და ჩემი ოჯახისთვის გააკეთა, თუმცა დღეს ვარ
ისეთი ამაყი იმით, რომ უკრაინელი ვარ, როგორიც აქამდე არასდროს ვყოფილვარ“.
მილა კუნისმა და ეშტონ კატჩერმა უკრაინელი ხალხის მხარდასაჭერად GoFundMe-ზე 34 მილიონ
დოლარზე მეტი შეაგროვეს, საკუთარი ანგარიშიდან კი 3 მილიონი დოლარი გადარიცხეს.
„ჩვენ გვჭირდება თქვენი მხარდაჭერა უკრაინელების დასახმარებლად. როგორც საზოგადოება
უნდა გავერთიანდეთ და შევაგროვოთ 30 მილიონი დოლარი. ყველა დონაცია, არ აქვს
მნიშნელობა რამხელა იქნება, მოახდენს დაზარალებული ადამიანების ცხოვრებაზე უდიდეს
ზეგავლენას… გთხოვთ, შემოგვიერთდით თქვენი შემოწირულობებით, მეგობრებთან და ოჯახის
წევრებთან ერთად, ჩვენ ხომ უკრაინელების გვერდით ვდგავართ“.
მილა კუნისი და ეშტონ კატჩერი უკრაინის კულტურული და პოლიტიკური საქმიანობით აქამდეც
დაინტერესებულან და პრეზიდენტ ვოლოდიმირ ზელენსკისაც არაერთხელ შეხვედრილან.
ვარსკვლავური წყვილი ქვეყნის პირველ წყვილს და მის მეუღლეს ოლენა ზელენსკას 2019 წელს
შეხვდნენ.
საქმიანი შეხვედრის შემდეგ ვოლოდიმირ ზელენსკიმ უკრაინელი წარმოშობის მსახიობთან და
მის მეუღლესთან შეხვედრაზე საჯაროდაც ისაუბრა:
„მე შეხვდვი უკრაინაში დაბადებულ მსახიობს მილა კუნისს და მის მეუღლეს, ასევე მსახიობსა
და პროდიუსერს ეშტონ კატჩერს. ჩვენ გვქონდა ნაყოფიერი საუბარი კინოსა და ხელოვნებაზე,
კერძოდ უკრაინის კინოინდუსტრიის განვითარებაზე, ასევე ინვესტიციების მოზიდვის გზებზე“.
წყვილებმა რამდენიმე საათის განმავლობაში ისაუბრეს როგორც კინოხელოვნების, პოლიტიკის,
გენდერული თანასწორობის, ტექნოლოგიების და უკრაინის ტურიზმის განვითარების შესახებ.
მილა კუნისმა მოგვიანებით ინტერვიუში საუბრისას პრეზიდენტ ზელენსკის ერთ-ერთი ყველაზე
სასიამოვნოდ მოსაუბრე, ინტელექტუალური და თავმდაბალი ადამიანი უწოდა, ვისაც კი აქამდე
ოდესმე შეხვედრია.
