უილ სმითს სექსუალურ შევიწროებაში, შურისძიებასა და თანამშრომლის უკანონო დათხოვნაში ედება ბრალი. 57 წლის მსახიობისა და მომღერლის წინააღმდეგ სარჩელი მისი საგასტროლო გუნდის ერთ-ერთმა წევრმა, მევიოლინე ბრაიან კინგ ჯოზეფმა შეიტანა – ინფორმაციას Fox News -ი სასამართლოს ოქმებზე დაყრდნობით ავრცელებს.
საქმის მასალების მიხედვით, უილ სმითმა ახალგაზრდა მამაკაცი 2024 წელს, სან-დიეგოში გამართულ კონცერტზე სამუშაოდ დაიქირავა, რის შემდეგაც ის ტურნეზე სამუშაოდ დაიტოვა. ჯოზეფის თქმით, თავდაპირველად მას და სმითს მხოლოდ პროფესიული ურთიერთობა ჰქონდათ, თუმცა მალე ვითარება შეიცვალა. მევიოლინე ამტკიცებს, რომ მსახიობი მის მიმართ სექსუალურ ზეწოლას და მანიპულაციებს ახორციელებდა. სასარჩელო განცხადებაში მევიოლინე აღნიშნავს, რომ უილ სმიტი ხშირად ეუბნებოდა, რომ მასთან განსაკუთრებული კავშირი აქვს, როგორიც სხვებთან არ ჰქონია.
მევიოლინეს თქმით, მისთვის 2025 წლის გაზაფხულზე, ლას-ვეგასის ტურნეს დროს მომხდარი ინცინდენტი კრიტიკულ წერტილად იქცა. მაშინ სმითის გუნდმა რამდენიმე საათით დაკარგა ჩანთა, რომელშიც ჯოზეფის ნომრის გასაღები იდო. როდესაც მევიოლინე ოთახში დაბრუნდა, აღმოაჩინა, რომ იქ ვიღაც იმყოფებოდა. მან იპოვა სველი ხელსახოცები, სხვა ადამიანის სახელზე გამოწერილი აივ-ინფექციის სამკურნალო წამლები და ბარათი გულის ფორმის ნახატით, რომელზეც ეწერა: „ბრაიან, 5:30-ზე გვიან არ დავბრუნდები, მხოლოდ ჩვენ ორნი…“. მუსიკოსმა იეჭვა, რომ სმითმა მის ნომერში უნებართვოდ შეაღწია.
მან დახმარებისთვის პოლიციას მიმართა და მომხდარის შესახებ მსახიობის გუნდსაც აცნობა, თუმცა, მისი თქმით, ამას შედეგი არ მოჰყოლია. პირიქით, მალევე მას ბრალდებების გამოგონება დააბრალეს და სამსახურიდან დაითხოვეს. მომხდარის ფონზე ჯოზეფი ფინანსური და ფსიქოლოგიური პრობლემების წინაშე აღმოჩნდა, ახლა კი მზად არის, საკუთარი სიმართლე სასამართლოში დაიცვას და კომპენსაცია მოითხოვოს.
მსახიობის ადვოკატები ბრალდებებს კატეგორიულად უარყოფენ. მათი განცხადებით, ბრაიან კინგ ჯოზეფი ფულის გამოძალვას ცდილობს და მისი სამსახურიდან გათავისუფლება არა შურისძიება, არამედ დაბალი პროფესიული დისციპლინს შედეგი იყო. სმითის გუნდი ამტკიცებს, რომ სასტუმროს ნომერში ნაპოვნი ნივთები მსახიობს არ ეკუთვნის.
საქმეს კალიფორნიის სასამართლო განიხილავს. ამ ეტაპზე მტკიცებულებების შეგროვება მიმდინარეობს. ბრაიანის ადვოკატებმა სასტუმროს სათვალთვალო კამერების ჩანაწერების ამოღება მოითხოვეს, რათა გაირკვეს, ვინ შევიდა მუსიკოსის ნომერში გასაღების დაკარგვის დროს.
შეგახსენებთ, რომ უილ სმითი ბოლო წლებში 2022 წლის „ოსკარის“ ცერემონიაზე მომხდარი ინციდენტის შემდეგ შელახული იმიჯის აღდგენას ცდილობს. ჰოლივუდის ინსაიდერები ვარაუდობენ, რომ ეს პროცესი შესაძლოა მის მომავალ კინოპროექტებზეც აისახოს.
ასევე დაგაინტერესებთ
