როგორი აღზრდის წესებია სამეფო ოჯახში? პრინცმა უილიამმა ჟურნალისტებთან ისაუბრა იმაზე თუ როგორ ზრდიან ის და ქეით მიდლტონი სამ შვილს: 12 წლის ჯორჯს, 10 წლის ლუის და შვიდი წლის შარლოტას. უელსის პრინცის თქმით, აღზრდის ერთ-ერთი მთავარი წესი ტელეფონების მკაცრი აკრძალვაა, რაც ძალიან ართულებს ურთიერთობას უფროს ვაჟთან.
„ჩვენს შვილებს ტელეფონები არ აქვთ, მაგრამ როდესაც ჯორჯი საშუალო სკოლაში შევა, მას შეიძლება ჰქონდეს სმარტფონი ინტერნეტთან შეზღუდული წვდომით. გულწრფელად გეტყვით, რომ სიტუაცია უკვე იძაბება. იმედი მაქვს, რომ ის ხვდება, რატომ გვაქვს ასეთი შეზღუდვები“, – განაცხადა 43 წლის პრინცმა რიო-დე-ჟანეიროში, Earthshot Prize 2025-ის დაჯილდოების ცერემონიაზე. მის სიტყვებს Daily Mail ციტირებს.
პრინცმა უილიამმა განმარტა, რომ ის და მისი მეუღლე ცდილობენ შვილები იმ ზიანისგან დაიცვან, რომელიც შეიძლება სოციალურმა მედიამ და ინტერნეტზე უკონტროლო წვდომამ მოიტანოს.
„ბავშვებმა შეიძლება ინტერნეტში ბევრი უსარგებლო ინფორმაცია ნახონ, თუმცა, კავშირის შენარჩუნება მაინც სჭირდებათ. ჩემი აზრით, ტელეფონი, რომელიც მხოლოდ ზარებისა და ტექსტური შეტყობინებების გაგზავნისა და მიღების საშუალებას იძლევა, სრულიად საკმარისია“, – აღნიშნა მან.
ინტერვიუში უილიამმა ბავშვებთან გულწრფელი ურთიერთობის მნიშვნელობაზეც ისაუბრა. პრინცმა აღიარა, რომ ამ წესის დაცვა განსაკუთრებით რთული იყო, როდესაც შვილებისთვის მათი დედის მძიმე დიაგნოზის შესახებ უნდა ეთქვა.
„შვილებს არაფერს ვუმალავთ. ვესაუბრებით როგორც კარგი, ასევე ცუდი მოვლენების შესახებ. წინააღმდეგ შემთხვევაში, ისინი იფიქრებენ, რომ ჩვენ მნიშვნელოვან საკითხებს ვუმალავთ. ჩვენ ვუხსნით, თუ რატომ ხდება გარკვეული მოვლენები და რატომ შეიძლება ამან შეგვაშფოთოს. რა თქმა უნდა, ყველა კითხვაზე პასუხი არ გვაქვს, მაგრამ მე ვფიქრობ, რომ ყველა მშობელი ასე ცხოვრობს. ჯერ არავის დაუწერია სახელმძღვანელო „როგორ ვიყოთ მშობელი“ მკაფიო წესებით. ჩვენ, გადავწყვიტეთ, ყველაფერზე ვისაუბროთ, მაგრამ ბავშვებისთვის გასაგები, მარტივი ენით“, – დასძინა პრინცმა.
შეგახსენებთ, რომ 2024 წლის 23 მარტს, უელსის პრინცესამ, ქეით მიდლტონმა ვიდეო გამოაქვეყნა, სადაც ამბობს, რომ ექიმებმა სიმსივნის დიაგნოზი დაუსვეს და პრევენციულ ქიმიოთერაპიის კურსს გადის. ამის შემდეგ ის საზოგადოების თვალთახედვიდან რამდენიმე თვით გაუჩინარდა. ბუკინგემის სასახლის მხრიდან ოფიციალური განცხადების არარსებობამ ჭორების ტალღა გამოიწვია. ონლაინ სივრცეში ზოგმა ივარაუდა, რომ პრინცესა კვდება ან უკვე გარდაიცვალა. მოგვიანებით ცნობილი გახდა, რომ სასახლე მართლაც ამზადებდა გეგმას ქეითის გარდაცვალების შემთხვევისთვის, თუმცა პრინცესა სექტემბერში ისევ გამოჩნდა და ქიმიოთერაპიის დასრულების შესახებ განაცხადა. იანვარში ცნობილი გახდა რემისიის შესახებ. ამჟამად, დაავადების რეციდივის შესახებ გავრცელებული ჭორების მიუხედავად, ქეით მიდლტონი საზოგადოებაში ხშირად ჩნდება. ახლახან კი ცნობილი გახდა, რომ ქეით მიდლტონი სადღესასწაულო მსახურებას უბრუნდება. უელსის პრინცესა 5 დეკემბერს ისევ მიიღებს სტუმრებს უესტმინსტერის სააბატოში და მეხუთედ გამართავს საქველმოქმედო კონცერტს – „ერთად შობისთვის “.
ასევე დაგაინტერესებთ
