ქართველი რეჟისორის ლევან კოღუაშვილის ნამუშევარი “მეოთხე ბრაიტონი” არის ფილმი, რომელიც 2022 წელს ამერიკის კინოაკადემიის ყველაზე პრესტიჟულ “ოსკარის” დაჯილდოებაზე უცხოენოვანი ფილმის ნომინაციაში საქართველოს სახელით იქნება წარმოდგენილი.
ფილმი გვიყვება ლეგენდარული ქართველი მოჭიდავის კახის სევდიან ისტორიას, რომელიც ამერიკაში შვილის დასახმარებლად ჩადის.
“მეოთხე ბრაიტონში” კახის როლს ვახტანგ გორგასლის II ხარისხის ორდენის, სოკის, ფილას და ღირსების ორდენების კავალერი, 1973 წელს საბჭოთა კავშირის საუკეთესო სპორტსმენად დასახელებული მსოფლიო ჩემპიონატების ხუთგზის და ოლიმპიური თამაშების ორგზის ჩემპიონი მოჭიდავე ლევან თედიაშვილი ასრულებს.
ფილმი, რომელიც მშობლის თავგანწირვასა და მამა-შვილურ ურთიერთობებზეა აგებული, ეხმიანება ისეთ მნიშვნელოვან თემებს, როგორებიცაა ემიგრაცია და აზარტული თამაშები.
კახის პერსონაჟის ამერიკაში წასვლის მთავარი მიზეზი სწორედ შვილია.
მოხუცი სპორსტმენი ბრუკლინში ვაჟისთვის ჩადის, შემდეგ კი მას აზარტულ თამაშებში წაგებული თანხის გადახდაშიც ეხმარება.
ფილმს უამრავ საინტერესო დეტალთან ერთად განუმეორებელს ის ხდის, რომ მასში მაყურებელს საშუალება ეძლევა იხილოს გენიალური ქართველი მსახიობის კახი კავსაძის ბოლო კინოროლი.
ფოტოები: ზაქარია ჭელიძე
ფილმის დამდგმელი ოპერატორი ფედონ პაპამიქაელია, რომელიც როგორც საუკეთესო კინოოპერატორი “ოსკარზე” ორჯერ იყო ნომინირებული.
ლევან კოღუაშვილის ფილმის “მეოთხე ბრაიტონის” ნახვა მაყურებლებს საქართველოში კინოთეატრ ამირანსა და Cavea Cinemas-ში 23 დეკემბრიდან შეეძლებათ.
მანამდე, კი სანამ გავიგებთ გახდება თუ არა ქართველი რეჟისორის ფილმის ამერიკის კინოაკადემიის უმაღლესი ჯილდოს მფლობელი, შეგახსენებთ, რომ ნამუშევარს უკვე არაერთი პრესტიჟული ჯილდო აქვს მიღებული.
საუდის არაბეთში გამართულ კინოფესტივალზე ლევან კოღუაშვილი ლეგენდარულმა იტალიელმა რეჟისორმა, ჯუსეპე ტორნატორემ დააჯილდოვა…
ფილმმა Asian World Film ფესტივალზე საუკეთესო ფილმის ნომინაციაშიც გაიმარჯვა, საუდის არაბეთში პირველ ისტორიულ კინოფესტივალზე საუკეთესო ფილმის პრიზი მიიღო, ტრაიბეკას საერთაშორისო კინოფესტივალზე კი 3 მთავარი ჯილდოს (საუკეთესო ფილმი, სცენარი და მსახიობი – ლევან თედიაშვილი) მფლობელი საუკეთესო ფილმი გახდა.
