ჯულია რობერტსმა 1990 წელს გადაღებული მელოდრამის „ლამაზმანი“ შესაძლო გაგრძელების შესახებ გავრცელებულ ინფორმაციაზე კომენტარი გააკეთა. ჰოლივუდის მსახიობის თქმით, ვივიენის ისტორია დასრულდა, ამიტომ „ლამაზმანი 2“-ის გადაღება შეუძლებელია.
ბოლო დროს ფილმის მოსალოდნელი გაგრძელების შესახებ ხმები აქტიურად ვრცელდებოდა, თუმცა ჯულიამ განაცდახა. რომ გადაღებების დაწყება შეუძლებელია. მსახიობმა აღიარა, რომ საკუთარი გამოცდილებიდან გამომდინარე, ასეთი პერსონაჟის თამაში აღარ შეუძლია.
„ვფიქობ, ნამდვილად უმანკო ადამიანის თამაში შეუძლებელი იქნება. ალბათ სასაცილოა მეძავზე ამის თქმა, მაგრამ ვფიქრობ, მასში ერთგვარი უმანკოება იგრძნობოდა. ალბათ ეს მხოლოდ ახალგაზრდობაა“, – აღნიშნა ჯულიამ.
მსახიობმა აღნიშნა, რომ დროთა განმავლობაში კულტურული ცვლილებები ხდება და ახლა 20-იანი, 30-იანი და 40-იანი წლების ფილმები გარკვეულწილად, უცნაურად აღიქმება. ჯულიამ მისი კიდევ ერთი პოპულარული ფილმი, „ნოტინგ ჰილი“ გაიხსენა, რომელიც ეკრანებზე 1999 წელს გამოვიდა.
როგორც აღმოჩნდა მსახიობს ამ ფილმში მონაწილეობის შეთავაზება თავიდან „სულელურ იდეად“ მოეჩვენა.
„ძალიან სულელურად ჟღერდა. მაგრამ შემდეგ სცენარი წავიკითხე და ძალიან საყვარელი და სასაცილო მეჩვენა“, – განუცხადა მსახიობმა Deadline-ს.
„ლამაზმანის“ სიუჟეტი ფინანსური მაგნატის, ედვარდ ლუისისა და მეძავის, ვივიენის გარშემო ტრიალებდა, რომელმაც მისი უჩვეულო შეთავაზება მიიღო. ფილმი, რომელშიც მთავარ როლებს ჯულია რობერტსი და რიჩარდ გირი ასრულებენ, 1990 წელს გამოვიდა. ის 463 მილიონ დოლარზე მეტი შემოსავლით მსოფლიოში ერთ-ერთი ყველაზე პოპულარული და შემოსავლიანი რომანტიკული კომედიაა.
თავიდან ედვარდ ლუისის როლზე დენიელ დეი-ლუისი, დენზელ ვაშინგტონი და ალ პაჩინო განიხილებოდნენ. ალ პაჩინომ „ნათლიმამას“ მესამე ნაწილზე დაიწყო მუშაობა და ამის შემდეგ როლზე რიჩარდ გირი აიყვანეს. ვივიანის როლზეც სხვადასხვა მსახიობები განიხილებოდნენ, მაგრამ მეგ რაიანმა და მიშელ პფაიფერმა როლზე უარი თქვეს, უინონა რაიდერი და ჯენიფერ კონელი რეჟისორმა ახალგაზრდობის გამო დაიწუნა. საბოლოოდ როლი იმ დროს ნაკლებად ცნობილ, 21 წლის ჯულია რობერტსს ერგო, რომელიც ამ ფილმმა მსოფლიო ვარსკვლავად და ერთ-ერთ ყველაზე ძვირადღირებულ მსახიობად აქცია.
ასევე დაგაინტერესებთ
