კრის ჯენერმა, რომელსაც ცოტა ხნის წინ 70 წელი შეუსრულდა, დაბადების დღის აღსანიშნავი ღონისძიება ჩაატარა, რომელსაც უკვე „წლის წვეულება“ უწოდეს.
წვეულება ჯეიმს ბონდის თემაზე Amazon-ის დამფუძნებლის, ჯეფ ბეზოსის, 165 მილიონ დოლარად ღირებულ ბევერლი ჰილზის სასახლეში გაიმართა. დაახლოებით 300 სტუმარს შორის ბევრი ჰოლივუდის მსახიობი, მუსიკოსი და მილიარდერი იყო.
ღონისძიებას არაოფიციალურად, ბრიტანეთის სამეფო ოჯახის წევრები – პრინცი ჰარი და მეგან მარკლი დაესწრნენ. სასექსის ჰერცოგინია წვეულებაზე გრძელი შავი კაბით გამოჩნდა, ხოლო მის ქმარს შავი კოსტიუმი ეცვა. საინტერესო დეტალი – ჰარიმ კოსტიუმის საყელოზე წითელი ყაყაჩოს გულსაბნევი მიიმაგრა – ეს ხსოვნის დღის სიმბოლოა, რომელიც დიდ ბრიტანეთში აღინიშნება.
მარკ ცუკერბერგი წვეულების თემატიკას და დრესკოდს დიდი პასუხისმგებლობით მოეკიდა და „ჯაშუშური“ სათვალე გაიკეთა.
კრის ჯენერისთვის დაბადების დღის მისალოცად მივიდნენ ვინ დიზელი, ოპრა უინფრი, ბილ გეითსი, მაიკლ რუბინი, ჯასტინ და ჰეილი ბიბერები, ადელი, დრეიკი, რიანა, ზენდაია, მერაია კერი, სნუპ დოგი, ნაომი უოტსი, სარა პოლსონი და სხვა ცნობილი ადამიანები. ბუნებრივია, წვეულებაზე იუბილარის ცნობილი ქალიშვილებიც იმყოფებოდნენ.
წვეულებამდე ხმები გავრცელდა, რომ იუბილე შენიღბვა იყო და ვარსკვლავი თავის 44 წლის შეყვარებულთან, კორი გემბლთან საიდუმლო ქორწილს გეგმავდა. ინსაიდერების თქმით, სწორედ ამით აიხსნებოდა წვეულებაზე ამდენი ცნობილი ადამიანის ყოფნა.
წყვილს ჭორებთან დაკავშირებით კომენტარი არც წვეულებამდე და არც მის შემდეგ გაუკეთებია. ზეიმი დახურულ კარს მიღმა გაიმართა და პაპარაცებმა ჯეფ ბეზოსის სასახლის შესასვლელთან მხოლოდ რამდენიმე ფოტოს გადაღება მოახერხეს.
ასევე დაგაინტერესებთ
