#OK! კენდალ ჯენერი და ჯეიკობ ელორდი ხვდებიან? – ჰოლივუდში ახალი ვარსკვლავური რომანი იბადება

კენდალ ჯენერი და „Euphoria“-ს ვარსკვლავი ჯეიკობ ელორდი ჰოლივუდის ერთ-ერთ ყველაზე განხილვად სავარაუდო წყვილად იქცნენ. უცხოური მედიის ინფორმაციით, ვარსკვლავები ბოლო რამდენიმე თვეა ერთმანეთს ფარულად ხვდებიან და ურთიერთობა მეგობრობიდან უფრო ახლო კავშირში გადაიზარდა. მიუხედავად იმისა, რომ ისინი წლებია ერთ სოციალურ წრეში მოძრაობენ, რომანტიკულმა ეჭვებმა განსაკუთრებული მასშტაბი მხოლოდ ახლა მიიღო.

წყვილი მარტში Vanity Fair-ის ოსკარის წვეულებაზე საუბრისას დააფიქსირეს, თუმცა ნამდვილი აჟიოტაჟი კოაჩელა 2026-ის შემდეგ დაიწყო. Deuxmoi-ს გვერდზე გავრცელდა ინფორმაცია, რომ ჯასტინ ბიბერის after-party-ზე კენდალი და ჯეიკობი ერთმანეთთან განსაკუთრებულად ახლოს იყვნენ. წყაროების თქმით, ისინი „ერთმანეთისგან თვალს ვერ წყვეტდნენ“ და საღამოს განმავლობაში აშკარა ქიმია იგრძნობოდა.

რეალურად ჯენერი და ელორდი ერთმანეთს დიდი ხანია იცნობენ – მსახიობი 2022 წელს პარიზში კენდალის დაბადების დღეზეც იმყოფებოდა. თუმცა მხოლოდ ახლა დაიწყო საუბარი იმაზე, რომ მათი მეგობრობა შესაძლოა ახალ ეტაპზე გადავიდა.

ამ დროისთვის ორივე ვარსკვლავი ოფიციალურად თავისუფალია. ჯეიკობ ელორდი წლების განმავლობაში პერიოდულად ხვდებოდა ოლივია ჯეიდ ჯანულის, თუმცა მათი ურთიერთობა საბოლოოდ დასრულდა. წყაროს ინფორმაციით, დაშორების ერთ-ერთი მიზეზი მსახიობის დატვირთული სამუშაო გრაფიკი გახდა.

რაც შეეხება კენდალ ჯენერს, მოდელმა თავად აღნიშნა, რომ ბოლო ერთი წელი შეგნებულად მარტო ყოფნას უთმობს დროს. საკუთარ პოდკასტ-ინტერვიუში მან თქვა, რომ 29 წლის ასაკში გადაწყვიტა საკუთარი თავი პირველ ადგილზე დაეყენებინა.

„ახლა ჩემს ‘me era’-ში ვარ,“ – განაცხადა მან.

კენდალის თქმით, ოციანი წლები თითქმის ყოველთვის ურთიერთობებში გაატარა და მიხვდა, რომ დამოუკიდებლად ცხოვრების დრო სჭირდებოდა – „მე ძალიან კარგი პარტნიორი ვარ და ხშირად სხვებს საკუთარ თავზე წინ ვაყენებდი. ამიტომ გადავწყვიტე, ცოტა ხნით საკუთარი თავი ამერჩია,“ – ამბობს ჯენერი.

სწორედ ამიტომ, ახალი სიმპათიის გაჩენა მის ცხოვრებაში ბევრისთვის მოულოდნელი, მაგრამ ბუნებრივი გაგრძელება აღმოჩნდა. ჯერჯერობით არც კენდალ ჯენერს და არც ჯეიკობ ელორდის ურთიერთობა ოფიციალურად არ დაუდასტურებიათ, თუმცა ჰოლივუდში უკვე აქტიურად საუბრობენ მათ შესაძლო ურთიერთობაზე.