2025 წლის მოდის კვირეულები ახალი კრეატიული დირექტორების გარდა, მოდის სამყაროში ახალი ადამიანების გამოჩენითაც გამორჩეული იყო. მათ შორის იყვნენ პლანეტის უმდიდრესი ადამიანის, ჯეფ ბეზოსის მეუღლე ლორენ სანჩესი და ისტორიაში პირველი მილიარდერი ფეხბურთელის, კრიშტიანუ რონალდუს მეუღლე ჯორჯინა როდრიგესი. ქალბატონები პარიზის მოდის კვირეულზე Balenciaga-ს ჩვენებას დაესწრნენ, სადაც სრულიად შემთხვევით, „ბრილიანტების ომი“ გამართეს. ეს იყო ამბავი, რომელმაც ბოლო დღეებში დიდი მითქმა-მოთქმა გამოიწვია.
საზოგადოების ყურადღება ყველაზე მდიდარი ბიზნესმენისა და ფეხბურთელის მეუღლეების ნიშნობის ბეჭდებმა მიიქციეს. მოდის ჩვენებაზე ლორენი და ჯორჯინა პირველ რიგში, გვერდი-გვერდ ისხდნენ და მაყურებელს შესაძლებლობა ჰქონდა მათი ძვირფასეულობა ახლოდან შეეთვალიერებინა, სანახავი კი ნამდვილად იყო – ორივეს ხელზე უზარმაზარი ბრილიანტები ბრწყინავდა.
ლორენ სანჩესს ორი ბეჭედი აქვს: ერთი 30–40 კარატიანი თეთრი ბრილიანტით, მეორე კი შედარებით პატარა (20 კარატი), მაგრამ იშვიათი ვარდისფერი ბრილიანტით. თავდაპირველად ის ჩვეულებრივ, თეთრ ქვად მიიჩნიეს, თუმცა Vogue-თან საუბარში, ლორენმა განმარტა, რომ ეს იშვიათი ვარდისფერი ბრილიანტია, რომლის განსაკუთრებული ელფერი ქორწილის ფოტოებშიც შესანიშნავად ჩანდა.
საიუველირო ნაკეთობების ექსპერტმა, ბრაიონ რეიმონდმა მხოლოდ ქვის ღირებულება 3–5 მილიონ დოლარად შეაფასა, თუმცა ფასი შესაძლოა კიდევ უფრო მაღალი იყოს – ყველაფერი დამოკიდებულია ქვის სისუფთავესა და ფერის ინტენსივობაზე.
ჯორჯინა როდრიგესის ბეჭედი, რომელიც მას კრიშტიანუ რონალდუმ აჩუქა, არანაკლებ შთამბეჭდავია. ექსპერტების ვარაუდით, ბეჭდის ბრილიანტის ზომა შეიძლება 5 სანტიმეტრამდე იყოს. ცნობისთვის, მსოფლიოში ყველაზე დიდი ალმასის -„კულინანის“ ზომა დაახლოებით 10 სანტიმეტრია. სხვადასხვა შეფასებით, ჯორჯინას ბეჭდის ღირებულება 2-დან 5 მილიონ დოლარამდე მერყეობს.
შეგახსენებთ, რომ ლორენ სანჩესმა ჯეფ ბეზოსისგან ნიშნობის ბეჭედი ჯერ კიდევ 2023 წელს მიიღო, ხოლო წელს, ზაფხულში, ვენეციაში მათი ქორწილი შედგა – მოვლენა, რომელსაც „საუკუნის ქორწილი“ უწოდეს.
რაც შეეხება როდრიგესსა და რონალდუს, მათი ქორწილი 2026 წლის ივლისში უნდა გაიმართოს. ვარაუდობენ, რომ ეს არანაკლებ ხმაურიანი და ფერადოვანი ზეიმი იქნება, ვიდრე ბეზოსების ქორწილი, რომელზეც მილიარდერმა დაახლოებით 60 მილიონი დოლარი დახარჯა.
ასევე დაგაინტერესებთ
#OK! კრიშტიანუ რონალდოსა და ჯორჯინა როდრიგესის სიყვარულის ისტორია
