რამდენად შესაძლებელია ადამიანი დილით ადრე ადგეს, ფინჯანი ყავა დალიოს და
ვარცხნილობის ახალი ტრენდი დაამკვიდროს? თუ ეს ადამიანი ჯენიფერ ენისტონია, მაშინ
სავსებით შესაძლებელია.
ყოველწლიურად, ათი ათასობით ადამიანი აჩვენებს ამერიკელი ვარსკვლავის ფოტოს
სტილისტებს და მისი საკულტო პერსონაჟის “რეიჩელ გრინის” ვარცხნილობის გაკეთებას ითხოვს.
სილამაზის ინდუსტრიაში არსებული პოპულარობა ჯენიფერ ენისტონს საკუთარი ბრენდის
დამფუძნებლის იდეალურ კანდიდატად აყალიბებს. 5 წლიანი თავდაუზოგავი მუშაობის შემდეგ
ამერიკელმა მსახიობმა და პროდიუსერმა 2021 წელს თმის მოვლის საშუალებები გაყიდვაში
ოფიციალურად ჩაუშვა.
“LolaVie- ეს არის ბრენდი, რომლის შექმნასაც ძალიან დიდი დრო დასჭირდა. წლების მანძილზე
არაერთ სილამაზის ბრენდთან ვმუშაობდი, რომლებთან თანამშრომლობისასაც ძალიან ბევრი
უსიამოვნო დეტალი აღმოვაჩინე. მე დიდი ხნის განმავლობაში ვაკვირდებოდი მათ სტრატეგიას
და განვითარების პროცესს, რომლის პარალელურად მეც ძალიან ბევრი რამ ვისწავლე.”
“მიზეზი, რატომაც ბრენდის შექმნის პროცესი ასე გაიწელა არის ხარისხი და დიდი ინტერესი
ყოველი წვრილმანისადმი. მინდოდა ყველაფერი იდეალური ყოფილიყო – პროდუქტების
შემადგენელი თითოეული ინგრედიენტი, კონტეინერების ფერი, ზომა, მოცულობა და რაც
ყველაზე მთავარია – ბრენდის შეტყობინებები მომხმარებლისთვის.“
სილამაზის ინდუსტრიაში, სადაც ყოველწლიურად ასობით ახალი სილამაზის ბრენდი იქმნება
რთულია ადგილის დამკვირდება და რაც ყველაზე მთავარია ერთგული მომხმარებლის
შენარჩუნება.
ერთ-ერთი ყველაზე მნიშვნელოვანი დეტალი, რაც LolaVie-ს სხვა ბრენდებისგან გამოარჩევს ეს
პლანეტის გადასარჩენად ბრძოლაა. კომპანია თავის მოვლის საშუალებების შესაქმნელად იყენებს
რეციკლირებად შეფუთვას, ასევე ბამბუკის ესენციას დეიონიზირებული წყლის ნაცვლად.
“ჩვენ ვიყენებთ ნივთიერებებს, რომლებიც ადამიანებისთვის უსაფრთხოა. რაც ყველაზე მთავარია,
პროდუქციის ტესტირებები ჩვენთან ცხოველებზე არასდროს ტარდება. ჩვენი გუნდი იბრძვის
პლანეტის გადასარჩენად და ვცდილობთ ნაკლები ზიანი მივაყენოთ მას. დაინტერესების
შემთხვევაში დეტალური ინფორმაციის ნახვა მომხმარებელს ბრენდის ოფიციალურ საიტზე
შეუძლიათ.”
სანამ ჯენიფერი LolaVie-ს პროდუქციას შექმნიდა, იდეალური შედეგის მისაღებად შრატს,
ნიღბებს და განსხვავებულ კონდიციონერებს იყენებდა.
“მიყვარს პროდუქტები, რომლებსაც მრავალმხრივი ეფექტი აქვთ, მაგალითად თუ კონკრეტული
ნიღაბი თმას დაზიანებისგან იცავს, მან ამავდროულად სიძლიერე და ბზინვარებაც უნდა შემატოს
მას.”
სწორედ ამიტომ, ბრენდის ძირითადი პროდუქტის Glossing Detangler-ის ფორმულა შეიცავს
მცენარეულ კერამიდებს, ბამბუკის ესენციას და ლიმონისა და ჩაის თესლის ექსტრაქტებს.
აღნიშნული ინგრედიენტები თმას ერთდროულად ასწორებს, ატენიანებს, იცავს გამოშრობისგან
და რაც ყველაზე მთავარია – ბზინვარებას მატებს.
ჯენიფერი აღნიშნავს, რომ გარკვეული თვალსაზრისით მის მიერ ჩამოყალიბებული “საკულტო
სტილი” ერთგვარი წნეხია, რადგან გამუდმებით თმის შეღებვა და დასწორება უწევს, რათა
ყოველთვის იდეალურად გამოიყურებოდეს.
“პანდემიამ ჩემი თმის სტრუქტურაზე ძალიან კარგად იმოქმედა. აღარ მიწევდა ხშირად
გადაღებებზე სიარული, შესაბამისად თმასაც იშვიათად ვისწორებდი და ვიკეთებდი ნაკლებ
ტონირებას.“
„ვერ ვიტან თმის შეღებვის პროცესს, მიუხედავად იმისა, რომ არც ჩემი ნაცრისფერი თმის დანახვა
მსიამოვნებს დიდად… აქვე მინდა აღვნიშნო ისიც, რომ ძალიან ძლიერები არიან ქალები,
ვისთვისაც ამას არანაირი მნიშვნელობა არ აქვს.”
52 წლის მსახიობმა ზუსტად იცის, რომ მის მიერ შექმნილი პროდუქცია მომხმარებლისთვის
იდეალური იქნება, რადგან ყველაზე დიდი კრიტიკოსებისგან, ამ შემთხვევაში მისი უახლოესი
მეგობრებისგან დადებითი შეფასებები უკვე მიიღო.
“ძალიან სასიამოვნო იყო ჩემი ახლობლებისგან და მეგობრებისგან შეფასებების მიღება. მათი
აზრი ჩემთვის ძალიან მნიშვნელოვანია, რადგან ერთმანეთისგან რადიკალურად განსხვავებული
თმის სტრუქტურა აქვთ. ამ ხაზის შექმნის მიზანი სწორედ ეს არის, პროდუქცია უნდა იყოს
ეფექტური ნებისმიერი ადამიანისთვის.”
და მაინც, როგორ წარმოიშვა სილამაზის ბრენდის სახელის იდეა? – ერთ-ერთი ყველაზე
გავრცელებილი კითხვა, რომელიც LolaVie-ის მომხმარებლებს უჩნდებათ.
“როდესაც პირველად გადმოვედი ლოს ანჯელესში საცხოვრებლად და პირველი მეორადი მანქანა
ვიყიდე, მახსოვს ვიღაცამ მკითხა რას დავარქმევდი მას. გაკვირვებულმა შევხედე და ვკითხე
ყველა არქმევდა თუ არა საკუთარ სახელს მანქანას. პირველი სიტყვები რაც იმ მომენტში თავში
მომივიდა, ეს იყო ფრაზა (ლოლა იღებს იმას, რაც სურს) Sarah Vaughan-ის სიმღერიდან Whatever
Lola Wants. ისე გამოვიდა, რომ მანქანისთვის შერჩეული წოდება საბოლოოდ ჩემს
ზედმეტსახელად დარჩა.”
საზოგადოებისთვის უცნობია ის ფაქტი, რომ საქვეყნოდ აღიარებული მსახიობი, პროდიუსერი და
ანტერპრენერი დაინტერესებულია სამედიცინო ლიტერატურით, ტექნოლოგიური მიღწევებით,
სილამაზისა და ჯანმრთელობის ინოვაციური სიახლეებით.
მისი მიზანი სწორედ მეცნიერებისა და ბუნების ეფექტური გაერთიანებაა, რათა დაამტკიცოს, რომ
“ადამიანებს არ მოუწევთ ერთის დათმობა მეორეს მისაღებად.”
ჯენიფერი იყო ბრენდის მამოძრავებელი ძალა პროდუქტის განვითარებიდან დაწყებული,
მარკეტინგითა და კრეატიული მიმდინარეობით დამთავრებული.
“LolaVie ქმნის პროდუქციას, რაც არის ეფექტური, ჭკვიანური და პროფესიონალური. ჩვენ ძალიან
მიზანმიმართულები ვართ და ვაპირებთ თითო ჯერზე თითო პროდუქტის წარდგენას. ბევრი
ადამიანი მეკითხებოდა, თუ რატომ არ ვაპირებდი მთლიანი ხაზის წარდგენას. პასუხი კი
ყოველთვის შემდეგნაირია: “ჩემთვის მთავარია ხარისხი და არა რაოდენობა.” ხარისხიანი
პროდუქციის შექმნას დრო სჭირდება, მე და ჩემს გუნდს გვინდა ზუსტად დავრწმუნდეთ
თითოეული ფორმულის სისწორესა და ეფექტურობაში.“
