OK! გაგაცნობთ ფიტნესისა და აერობიკის მწვრთენლს, “ნანუს სტუდიის” დამფუძნებელს ნანუ მაცაბერიძეს, რომელმაც ჯერ კიდევ საკმაოდ პატარა ასაკში გადაწყვიტა ჯანსაღი ცხოვრების წესით დაკავება და დღეს უამრავ ქალბატონს აძლევს მოტივაციას გახდნენ საკუთარი თავის უკეთესი ვერსიები ფიზიკური აქტივობის დახმარებით.
უპირველესად გაეცანით ჩვენს მკითხველს და გვიამბეთ თქვენი საქმიანობის შესახებ.
მოგესალმებით, მე ვარ ნანუ მაცაბერიძე ფიტნესის და აერობიკის მწვრთვნელი და იოგას მოყვარული. მაქვს აერობიკის სტუდია “ნანუს სტუდია”, სადაც ჩემს ტრენერებთან ერთად ვეხმარები ქალბატონებს სხეულისა და გონების გაჯანსაღება-გალამაზებაში.
პირველად როდის დაინტერესდით ჯანსაღი ცხოვრების წესით?
12 წლის ვიყავი, როდესაც ჭარბი წონის გამო ექიმთან მიმიყვანა დედამ, ძალიან შევშინდი დიაგნოზის გამო, რადგან აღმოჩნდა, რომ დიაბეტის და მუდმივი სიმსუქნის კანდიდატი ვიყავი. სწორედ ამ დღეს გადავწყვიტე კვების გაკონტროლება და სპორტით დაკავება.
როგორი განცდაა, როცა ადამიანებს საკუთარი თავის უკეთესი ვერსიის შექმნაში ეხმარებით?
საოცარი შეგრძნებაა, როდესაც ადამიანებს ჩემს გამოცდილებას ვუზიარებ, ისინიც მენდობიან, ბოლომდე მომყვებიან და შესანიშნავ შედეგებს იღებენ. ხდებიან უფრო ლამაზები, ტანადები, უჯანსაღდებათ ფსიქიკა და მათი ცხოვრება რადიკალურად უკეთესობისკენ იცვლება. ამ დროს ვხვდები, რომ ჩემი სტრესი თუ წონასთან ჭიდილი ღირდა, რათა მიმეღო შესაბამისი ცოდნა და გამოცდილება სხვა ადამიანების დასახმარებლად.
თქვენს მიდგომებზე მოგვიყევით.
მარტივი არ არის ჯანსაღი არჩევანის გაკეთება და შემდეგ მისი ერთგულება, ამიტომ ხშირად მაქვს შემთხვევები, როდესაც ნებდებიან გოგოები და ვერ ხედავენ საკუთარ თავში მოტივაციას, ამ დროს ჩემი გამოცდილებით სწორი მიმართულების მიცემა, სწორი რჩევა და დამოკიდებულება გადამწყვეტია საქმის ბოლომდე მისაყვანად.
სტუდიაში განსაკუთრებით ხშირია ვარჯიშის დროს გაჩერება, რა დროსაც ჩემი შეძახილებით გოგოები აგრძელებენ ვარჯიშს, ეს არ არის ბრძოლა, ეს არის საკუთარი თავის წვრთვნა – უფრო ძლიერი ვერსიის მიღება, ამიტომ პატარა გამარჯვებები აუცილებელია, რომ საქმის ბოლომდე მიყვანა ისწავლონ ქალბატონებმა.
რა რჩევას მისცემდით თქვენს მომხმარებლებს და ჩვენს მკითხველს ჯანსაღი ცხოვრების წესთან დაკავშირებით?
ჯანსაღი ცხოვრება მხოლოდ ლამაზი სხეულისთვის არ არის მნიშვნელოვანი – ეს არის შინაგანი კულტურა. ადამიანი, რომელიც ვარჯიშობს და იკვებება ჯანსაღად, არის გაცილებით ენერგიული, ჯანმრთელი, თავდაჯერებული და პროდუქტიული ცხოვრების ყველა ასპექტში, შესაბამისას ვისაც უნდა გარკვეულ წარმატებას მიაღწიოს მისთვის ნებისმიერ საკითხში – ჯანსაღი ცხოვრება არის ერთადერთი სწორი გადაწყვეტილება, რადგან ყველაფრის საწყისი მაინც ჯანმრთელობაა და სხვა დანარჩენი აქედან გამომდინარეობს.
რა გაძლევთ მოტივაციას?
ჩემი მოტივაცია არის თავად სიცოცხლე. ძალიან მიყვარს სიცოცხლე და მისი სრულყოფილად შეგრძნება, მახსოვს როგორ ვგრძნობდი თავს არაჯანსაღი ჩვევების დროს და როდესაც ვავლებ პარალელს ვირჩევ სწორ გზას, ჯანსაღ გზას, ისევ სიცოცხლის სიყვარულის გამო.
სამომავლო გეგმები გაგვიზიარეთ.
დიდი სამომავლი გეგმები მაქვს, ძალიან საინტერესო და ორიგინალური… ჯერ ასე საჯაროდ არ ვსაუბრობ, რადგან დაგეგმვის პროცესში ვართ. სოციალურ ქსელში გავასაჯაროვებ მოგვიანებით. ამ ეტაპზე ვმუშაობთ სტუდიის მეორე ფილიალის გახსნაზე, ძალიან დიდი მოთხოვნაა ჩვენთან სიარულზე და შესაბამისად ჩვენთვის ეს მოტივაციაა, რომ კიდევ უფრო მეტ ადამიანს დავეხმაროთ ჯანსაღი არჩევანის გაკეთებაში.
