ჰოლივუდის ვარსკვლავები რობ რაინერსა და მის მეუღლეს, მიშელ ზინგერს ემშვიდობებიან. მსახიობმა დემი მურმა სასტიკად მოკლულ რეჟისორსა და მის მეუღლეს პატივი მიაგო და აღნიშნა, რომ რაინერების ოჯახთან ახლოს იყო.
დემი მური რაინერის ფილმში „რამდენიმე კარგი კაცი“ მონაწილეობდა. მსახიობმა აღნიშნა, რომ რეჟისორთან ურთიერთობა გადასაღები მოედნის მიღმაც ჰქონდა.
„არ არსებობს სიტყვები, რომელიც რობ და მიშელ რაინერების დაკარგვის ტკივილს აღწერს. ჩვენი შვილები ერთად გაიზარდნენ, ჩვენ ერთად ვმუშაობდით. რადგან ჩვენი პირადი და პროფესიული ცხოვრება ერთმანეთში იყო გადაჯაჭვული, ყოველთვის დავაფასებ იმ დროს, რომლებიც ერთად გავატარეთ. ისინი საოცარი ადამიანები და შესანიშნავი მშობლები იყვნენ, რომლებიც ცდილობდნენ სამყარო უკეთეს ადგილად ექციათ“ – დაწერა დემიმ სოციალურ მედიაში.
მომხდარ ტრაგედიაზე არნოლდ შვარცენეგერის ყოფილმა მეუღლემაც ისაუბრა.
„მე მიყვარდა მიშელ და რობ რაინერები. ისინი ჩვენი უახლოესი მეგობრები იყვნენ. ჩვენ შვილები ერთად გავზარდეთ. ერთად ვიცინოდით, ერთად ვტიროდით, ერთად ვთამაშობდით, ერთად ვოცნებობდით“, – აღნიშნა მარია შრაივერმა.
„რკინის არნის“ ყოფილმა ცოლმა თქვა, რომ წყვილი გასულ კვირას ვახშამზე ნახა და ისინი ბედნიერები ჩანდნენ.
„მათ ძალიან უყვარდათ შვილები და ყოველთვის ცდილობდნენ კარგი მშობლები ყოფილიყვნენ“, – დაასკვნა მან.
მოკლული რეჟისორის მიმართ რადიკალურად განსხვავებული პოზიცია გამოავლინა აშშ-ის პრეზიდენტმა. დონალდ ტრამპი რეჟისორის გარდაცვალებას Truth Social-ზე გამოეხმაურა და მკვლელობას „ძალიან სამწუხარო მოვლენა“ უწოდა, მაგრამ განაცხადა, რომ რაინერი და მისი მეუღლე გარდაიცვალნენ „იმ რისხვის გამო, რომელიც ადამიანებში განუკურნებელი, გონების დამანგრეველი დაავადებით გამოიწვიეს, რომელიც ცნობილია როგორც ტრამპით შეპყრობის სინდრომი“.
პრეზიდენტმა აღნიშნა, რომ მისი აზრით, გარდაცვლილი რეჟისორი „ქვეყნისთვის ძალიან საზიანო“ იყო.
„მე საერთოდ არ ვარ რობ რაინერის გულშემატკივარი, არანაირად, არც ერთი ფორმით“, – ხაზგასმით აღნიშნა მან.
„როდესაც ჰარი შეხვდა სალის“ რეჟისორი და მისი მეუღლე კვირას, ლოს-ანჯელესში, საკუთარ სახლში გარდაცვლილები ნახეს. ცხედრებს ცივი იარაღით მიყენებული ჭრილობები ჰქონდათ. პოლიციამ მკვლელობის ბრალდებით წყვილის შუათანა ვაჟი, ნიკი დააკავა.
რობ რაინერი ჰოლივუდის ერთ-ერთი ყველაზე ცნობილი რეჟისორი იყო, რომელმაც 20-ზე მეტი ფილმი გადაიღო, მათ შორის „უბედურება“, „პატარძალი პრინცესა“ და „როდესაც ჰარი შეხვდა სალის“. ის მთელი ცხოვრების მანძილზე დემოკრატი, ლიბერალი აქტივისტი და ტრამპის კრიტიკოსი იყო. 2017 წელს მან ტრამპს პრეზიდენტობისთვის „ფსიქიკურად უვარგისი“ უწოდა.
ასევე დაგაინტერესებთ
#OK! რეჟისორი რობ რაინერი და მისი მეუღლე საკუთარ სახლში მოკლულები ნახეს
