როდის დაინტერესდით ამ პროფესიით და რა გზა გაიარეთ დღევანდელ დღემდე?
თავდაპირველად ჩემ მიმართ სხვა მოლოდინები ჰქონდათ, ყველას ეგონა, რომ ბიზნესის მიმართულებით წავიდოდი, რადგან ვსწავლობდი ბრიტანულ სკოლაში და განსაკუთრებით გაძლიერებულად ვემზადებოდი ამ მიმართულებით, თუმცა ბოლო წუთს შევცვალე ჩემი გადაწყვეტილება და სულ სხვა სფერო ავირჩიე. შეიძლება ითქვას, ბავშვობიდან ვიცოდი, რომ ხელოვნების მიმართ სიყვარული აუცილებლად ითამაშებდა მნიშვნელოვან როლს ჩემი პროფესიის არჩევაში და ასეც მოხდა. ბაკალავრი დავამთავრე თბილისის სახელმწიფო სამხატვრო აკადემიაში, ასევე ვმუშაობდი არქიტექტურულ კომპანიაში Architectural orchestra, სადაც კომპანიის გუნდთან ერთად ვმუშაობდი ლოპოტას ტურისტული კომპლექსის განვითარებაზე. ეს ჩემთვის პირველი და მნიშვნელოვანი გამოცდილება იყო.
ამის შემდეგ გადავწყვიტე მაგისტრის ხარისხის მიღება და სწავლა გავაგრძელე ესტონეთში, ტალინში ინჟინერიისა და დიზაინის (დღესდღეობით მომავალი ტექნოლოგიები და დიზაინი) ფაკულტეტზე. სწავლის პროცესში ვთანამშრომლობდი სხვადასხვა ესტონურ კომპანიასთან და ერთობლივად ვმუშაობდით სხვადასხვა სახის პროექტებისა და პროდუქტების განვითარებაზე. ასევე, გარკვეული პერიოდი ვსწავლობდი პრაღაში, პრაღის ტექნიკურ უნივერსიტეტში, ექსპერიმენტული არქიტექტურის ფაკულტეტზე. ორმაგი ხარისხის სამაგისტრო პროგრამის დასრულების შემდეგ კი დავიწყე მუშაობა ესტონეთის წამყვან არქიტექტურულ კომპანიაში KOKO ARCHITECT, სადაც უდიდესი გამოცდილება მივიღე და უცხოურ პროექტებზე მუშაობის გარდა, საქართველოში არსებულ და მიმდინარე პროექტებზე ვიმუშავე.
პანდემიის პერიოდში კი დავბრუნდი საქართველოში და შევუერთდი კომპანიას Artstudio project, სადაც გუნდთან ერთად ვიმუშავე თბილისში მიმდინარე ბევრ საინტერესო პროექტზე, მაგალითად, Citizen-ზე. მიღებული გამოცდილების შემდეგ დავაარსე ჩემი კომპანია Morpholo – არქიტექტურის, ინტერიერის დიზაინისა და ავეჯის დიზაინის განხრით.
როგორც ჩანს, ძალიან დატვირთული შემოქმედებითი ცხოვრება გაქვთ, როგორია თქვენთვის ინტერიერის დიზაინის პროექტზე მუშაობის პროცესი?
ზოგადად ვცდილობ სხვადასხვა ტიპის პროექტებზე ვიმუშაო, არ მიყვარს ერთფეროვნება და ამიტომ მუდმივად სიახლეების ძიებაში ვარ. ინტერიერის დიზაინის ყოველი პროექტი ახალ-ახალი გამოწვევებით, გამოცდილებითა და აღმოჩენებით არის სავსე. ძალიან მიყვარს მუშაობის პროცესი, რადგან თითოეული დამკვეთი განსაკუთრებული ხასიათისა და თვისებების მატარებელია, შესაბამისად, ყველას ინდივიდუალური მიდგომა ესაჭიროება. პირველ რიგში, ვეცნობი დამკვეთს და მის მოთხოვნებს, შემდგომ სივრცეს. ეს ის ორი მნიშვნელოვანი მომენტია, რომლის გარეშეც ინტერიერის შესრულება გაგვიჭირდება, რადგან ეს ორი მოცემულობა გვაძლევს მიმართულებას, თუ როგორ წარვმართოთ სამუშაო პროცესი, იქნება ეს ტექნიკური თუ კრეატიული დავალება. მუშაობის პროცესში აუცილებლად ვეცნობი შენობას, მის ისტორიას, თუ რა დეტალები უნდა გავითვალისწინო ინტერიერის შესრულების დროს, ასევე ადგილმდებარეობას და ბუნებრივ განათებას. შემდგომ გადავდივარ სივრცის დაგეგმარებასა და კონცეფციის შემუშავებაზე, რაც, თავის მხრივ, მოიცავს ავეჯის განლაგებას, განათების მოწყობას და ბევრ საინტერესო ნიუანსს. აღსანიშნავია ის, რომ თითოეული ეტაპი და დეტალი ქმნის საჭირო ატმოსფეროს ინდივიდუალური სივრცისთვის და საერთო ჯამში ეს ძალიან შრომატევადი და საინტერესო პროცესია.
ინტერიერის დიზაინზე მუშაობისას რას აქცევთ ყველაზე დიდ ყურადღებას − ფუნქციას თუ ესთეტიკას?
ერთი მეორის გარეშე წარმოუდგენელია.
რისგან იღებთ შთაგონებას? ითვალისწინებთ თუ არა ტენდეციებს?
ჩემთვის ბევრი რამ არის შთაგონების წყარო, ერთს ვერ გამოვარჩევ. სხვადასხვა დროს სხვადასხვა რამე მეხმარება. შესაძლოა მაღაზიაში ან გარეთ ერთი რაიმე ნივთის აღმოჩენა გახდეს დიდი ინსპირაცია და ამაზე ააწყო მთელი კონცეფცია. ასევე, ეს შეიძლება იყოს მოგზაურობა, წიგნების მაღაზია, გარეთ უმისამართოდ სეირნობა, გამოფენა, შენი იდეების გაზიარება მეგობრებთან და საუბრიდან წამოსული იდეები.
ტენდენციებს აუცილებლად ვეცნობი, მაგრამ ყოველთვის არ ვიყენებ. ვცდილობ ისეთი ტიპის ინტერიერი შევქმნა, რომელიც ხანგრძლივი პერიოდის განმავლობაში იქნება აქტუალური.
ჟურნალ OK-სთან ერთად რუბრიკას გეგმავთ, მოდი, დავაანონსოთ…
ერთ სივრცეში (ოთახში) შეიძლება შექმნა მთელი სამყარო, რომელიც თავისით მოჰყვება ისტორიას, სხვადასხვა ნივთის, განათების, დეკორის, ავეჯის, ფერისა და გამწვანების მეშვეობით. ვეცდები ამ რუბრიკის მეშვეობით უფრო მეტი ინტერესი გავუჩინო მკითხველს საკუთარი ინტერიერის შესაქმნელად, გარკვეული რჩევების სახით და დავეხმარო მეტი კომფორტისა და სილამაზის შექმნაში.
სამომავლო გეგმები
ვგეგმავ მიმდინარე საინტერესო პროექტებზე მუშაობას (კერძო სახლისა და ბინების ინტერიერზე მუშაობა, ასევე კომერციულ პროექტზე – ღვინის ბარის პროექტზე, რომელიც გაზაფხულზე გაიხსნება). გარდა ამისა, უახლოეს მომავალში ვაპირებ საკუთარი დიზაინით შექმნილი ავეჯის პრეზენტაციას, რომელიც სხვადასხვა სფეროში მოღვაწე ქართველ დიზაინერებთან კოლაბორაციის მეშვეობით შეიქმნა.
ტექსტი: სოფიო მალანია
ფოტო: ალექსეი სეროვი
