ჟურნალ OK!-ის მკითხველი კარგად იცნობს დიმიტრი კირხანიდის საკონსულტაციო ცენტრს, რომელიც საზოგადოებას სთავაზობს ხარისხიან მომსახურებას საბუღალტრო, ბიზნესსაკონსულტაციო და იურიდიული მიმართულებით. დღეს კომპანიის ხელმძღვანელი დიმიტრი კირხანიდი გვესაუბრება, თუ რატომ არის უძრავი ქონება ერთ-ერთი ყველაზე სარფიანი საინვესტიციო ინსტრუმენტი და რა უნდა ვიცოდეთ, სანამ უძრავ ქონებას შევიძენთ.
დიმა, რა არის უძრავი ქონების ინვესტიცია? რა არის მისი მიზანი?
უძრავი ქონება არის კაპიტალი, რომელსაც დიდი მოგება მოაქვს. უძრავი ქონების ინვესტიცია არის ძალიან მომგებიანი, რადგან ბაზარზე მისი ფასი მუდმივად მზარდია. რაც გულისხმობს, რომ თუ თქვენ ყიდულობთ უძრავ ქონებას, შემდეგ რამდენიმე წელსა თუ თვეში მას უფრო დიდ ფასად გაყიდით. სარგებლის მიღება შესაძლებელია როგორც მოკლევადიანი გაყიდვით, ისე დიდი ღირებულების ქონებაში რეინვესტირებით, ასევე გრძელვადიანი ქირის საფუძველზე, რომელიც ერთ-ერთ ყველაზე მიმზიდველ მეთოდს წარმოადგენს. როგორც ვხედავთ, უძრავი ქონების ინვესტიცის მიზანი არის შემოსავლის გაზრდა, ასევე თანხის დაბანდება.
რატომ არის უძრავი ქონება ერთ-ერთი ყველაზე მოთხოვნადი (სარფიანი) საინვესტიციო ინსტრუმენტი?
ყველაზე დაბალრისკიანი, ლიკვიდური და მაღალი რეალური შემოსავლის გარანტია. ყოველთვის შესაძლებელია მისი გაყიდვა, მით უმეტეს იმის გათვალისწინებით, რომ საქართველოში ბევრი უცხოელი შემოდის და ბინებზე მოთხოვნა უფრო იზრდება.
რომ განვიხილოთ პასიური ეკონომიკური მდგომარეობაც, ასეთ პერიოდშიც კი, ეს ყველაფერი ნაკლებად აისახება უძრავ ქონებაზე, ხოლო გრძელვადიან პერიოდში უძრავი ქონების ფასები სტაბილურად იზრდება.
რა რჩევას მისცემდით, ვინც ახლა აპირებს თანხის ინვესტირებას უძრავ ქონებაში?
უპირველესად, უნდა აღინიშნოს, რომ რამდენიმე სახის ინვესტიციაა შესაძლებელი, გააჩნია ჩვენი მიზნები როგორია. ეს შეიძლება იყოს საცხოვრებელი სახლის შეძენა, რომელსაც ან გავყიდით, ან გავაქირავებთ, ასევე, კომერციული ფართის – ოფისის ან სავაჭრო სივრცის შეძენა. ამასთანავე, შეგიძლიათ მშენებარე ობიექტის შეძენაც.
როცა უკვე განსაზღვრეთ მიზანი და გადაწყვიტეთ თბილისში ფართის შეძენა, მაშინ უნდა გაარკვიოთ არჩეულ უბანში რა შენდება 1 კილომეტრის რადიუსში, ვინ არის დეველოპერი, რა პროექტები ჰქონია აღნიშნულ კომპანიას, რა გამოცდილება აქვს მას. ასევე მნიშვნელოვანია ამ ადგილის გეოლოგიურად შესწავლაც.
რაც შეეხება მიწას, სტრატეგიულად სწორად შერჩეულ ადგილას არსებული მიწის საკუთრება, შეიძლება წარმოუდგენლად დიდი სარგებლის მომტანი იყოს, რადგან ინვესტორები მუდმივად მზად არიან ამგვარ მიწებში დააბანდონ საკუთარი კაპიტალი. ეს არის აქტივი, რომლის მართვა თქვენზეა დამოკიდებული და ნებსიმიერ შემთხვევაში შეძლებთ გაყიდოთ და ამოიღოთ საწყისი ინვესტიცია.
და ბოლოს მინდა აღვნიშნო, რომ რა ტიპის უძრავი ქონებაც არ უნდა შევიძინოთ, მნიშვნელოვანია დოკუმენტების შემოწმება, მისი წესრიგში მოყვანა, რომ ყველაფერი კანონის ფარგლებში იყოს, რათა მოსალოდნელ იურიდიულ გართულებებს არ გადააწყდეთ.
ტექსტი: სოფიო მალანია
ფოტო: ალექსეი სეროვი
ასევე, გაეცანით:
