Tesla-ს ინვესტორებმა წარმატებული მართვისთვის კომპანიიის აღმასრულებელ დირექტორს, ილონ მასკს თითქმის ტრილიონი დოლარის ოდენობის პრემიალური ანაზღაურება დაუმტკიცეს. აქციონერთა ყოველწლიურ კრებაზე, რომელიც ოსტინში გაიმართა, ამ გადაწყვეტილებას ხმა მონაწილეთა 75%-ზე მეტმა მისცა.
შედეგების გამოცხადების შემდეგ ილონ მასკი სცენაზე ავიდა და იცეკვა. „ეს Tesla-სთვის არა მარტო ახალი თავი, არამედ სრულიად ახალი წიგნია,“ — განაცხადა მან.
პრემიალური ანაზღაურების სრულად მიღება რიგი ამბიციური პირობების შესრულებაზეა დამოკიდებული. კერძოდ, მომდევნო ათი წლის განმავლობაში მასკმა Tesla-ს საბაზრო კაპიტალიზაცია დღევანდელი 1,5 ტრილიონი დოლარიდან 8,5 ტრილიონამდე უნდა გაზარდოს.
პირობებში ასევე შედის ავტონომიური ტრანსპორტისა და ადამიანისმაგვარი რობოტების მასობრივი დანერგვა და ასობით მილიარდ დოლარამდე მოგების მიღწევა. გადახდა ეტაპობრივად, ტრანშების სახით განხორციელდება, მათი ოდენობა კი მიღწეულ შედეგებზე იქნება დამოკიდებული.
მანამდე მასკმა განაცხადა, რომ მისი კომპანია მალე ადამიანისმაგვარი რობოტების მასობრივ წარმოებას დაიწყებს. მისი თქმით, უახლოეს წლებში ჰუმანოიდური მოდელი – Optimus–ის მილიონიანი არმია გამოჩნდება. მისი პროტოტიპები ჯერ კიდევ 2022 წელს იქნა წარდგენილი. თავდაპირველად, რობოტები ყოველდღიური, საყოფაცხოვრებო ამოცანების შესასრულებლად შეიქმნა – ისინი მაისურებს ლამაზად კეცავდნენ და პოპკორნს არიგებდნენ.
მასკის თქმით, Optimus-ის საცდელი ნიმუში 2026 წლის თებერვალ-მარტისთვის მზად იქნება, ხოლო სრული წარმოება წლის ბოლოს დაიწყება. მისი ფუნქციური შესაძლებლობები, შესაძლოა, საგრძნობლად გაფართოვდეს, თუმცა ჯერ უცნობია, როგორ.
მეწარმის თქმით, რობოტები ადამიანთა ცხოვრებას ძირფესვიანად შეცვლიან. ისინი შექმნიან სამყაროს, სადაც სიღარიბე აღარ იქნება და თითოეულ ადამიანს მაღალი ხარისხის სამედიცინო მომსახურებაზე ექნება წვდომა.
ასევე დაგაინტერესებთ
https://devoted-emu-se5h.flyinghost.app/vfikrob-rom-2026-wels-xelovnuri/
