UFC Freedom 250-ის მთავარი ბრძოლა ილია თოფურიასთვის კარიერაში პირველი მარცხით სრულდება. ჯასტინ გეიჯის წინააღმდეგ გამართულ დაპირისპირებაში ქართველმა მებრძოლმა მძიმე დაზიანებები მიიღო და მეოთხე რაუნდის შემდეგ მისმა კუთხემ, კონკრეტულად კი ილიას ძმამ, ალექსანდრემ ბრძოლის შეჩერების გადაწყვეტილება მიიღო, რასაც ბოლოს თვით ილიაც დათანხმდა:
,,როდესაც ალექსანდრემ თქვა: „ვაჩერებ ჩხუბს“, მხოლოდ მაშინ დაუქნია ილიამ თავი. აი, აქ გამოჩნდა ყველაფერი – უდიდესი ნდობა, სიყვარული და იმის გააზრება, რომ ოჯახზე, ძმაზე და შენს ჯანმრთელობაზე ძვირფასი ამქვეყნად არაფერია. ილიამ, რომელიც არასდროს ნებდება, თავისი ძმის სიტყვას დაუჯერა.”- წერს ირაკლი ჟვანია სოციალურ ქსელში.
ამ წუთებში მთავარი განხილვის თემა მხოლოდ შედეგი არ არის – სოციალურ ქსელებში ათასობით ადამიანი ილია თოფურიას მხარდაჭერას გამოხატავს.
სპორტის სამყაროში დაუმარცხებელი სტატუსი განსაკუთრებულ მნიშვნელობას ატარებს. წლების განმავლობაში გამარჯვებების სერია სპორტსმენს თითქმის შეუცდომელი გმირის სტატუსს ანიჭებს, ამიტომ პირველი მარცხი ყოველთვის დიდ ემოციებთან არის დაკავშირებული. თუმცა ილია თოფურიას შემთხვევაში საზოგადოების რეაქცია უფრო მხარდაჭერას ჰგავს, ვიდრე იმედგაცრუებას.
ბრძოლის განმავლობაში ქართველმა მებრძოლმა სახისა და თვალების არეში სერიოზული დაზიანებები მიიღო. განსაკუთრებით მძიმე აღმოჩნდა თვალის ტრავმები, რომლებიც თითოეულ რაუნდთან ერთად უფრო შესამჩნევი ხდებოდა. მიუხედავად ამისა, თოფურია ბრძოლის გაგრძელებას ცდილობდა და შეხვედრის შეწყვეტის სურვილი არ გამოუხატავს. სწორედ ამ ფაქტზე ამახვილებს ყურადღებას გულშემატკივართა დიდი ნაწილი.
სოციალურ ქსელებში უამრავი მხარდამჭერი კომენტარი იწერება:
„ჩემპიონი ერთი მარცხით არ წყვეტს ჩემპიონობას“
„დაბრუნდები უფრო ძლიერი“
„შენ უკვე ისტორია დაწერე“
„არაუშავს, ილია, ჩემპიონებიც მარცხდებიან… უბრალოდ უნდა გააგრძელო გზა და თუ ხელახლა მოგეცემა შანსი, აღარ დაუშვა შეცდომა”
მსგავსი შეფასებები განსაკუთრებით ხშირად გვხვდება როგორც ქართველი, ისე უცხოელი გულშემატკივრების მიერ.
მარცხი კრიტიკის გარეშე არასდროს რჩება, თუმცა ბევრი გულშემატკივარი აღნიშნავს, რომ ეს ერთი წაგება ვერ გააუფასურებს იმ გზას, რომელიც ილია თოფურიამ აქამდე გაიარა. UFC-ის ორი წონითი დივიზიონის ჩემპიონობა, დაუმარცხებელი სერია და ისტორიული გამარჯვებები კვლავ მისი კარიერის განუყოფელ ნაწილად რჩება.
სპორტის ისტორიაც არაერთხელ გვიჩვენებს, რომ პირველი მარცხი ხშირად ახალი ეტაპის დასაწყისი ხდება. სწორედ ასეთ მომენტებში გადიან ჩემპიონები ერთ-ერთ ყველაზე რთულ გამოცდას – როდესაც გამარჯვებების ნაცვლად უნდა გაუმკლავდნენ ფიზიკურ ტკივილს, ემოციურ დატვირთვასა და საზოგადოების ყურადღებას.
დღეს კი, ბრძოლის დასრულებიდან სულ რამდენიმე საათში, მთავარი გზავნილი, რომელიც სოციალურ ქსელებში იკითხება, მხარდაჭერაა. გულშემატკივრები უფრო მეტად საუბრობენ ილიას გამძლეობაზე, ხასიათსა და უკვე მიღწეულ წარმატებებზე, ვიდრე დაკარგულ ქამარზე.
შესაძლოა, UFC Freedom 250 ილია თოფურიას კარიერაში პირველი მარცხის დღედ დარჩეს, თუმცა ამავე დროს ის შეიძლება იმ დღედაც იქცეს, რომელმაც კიდევ ერთხელ აჩვენა, რომ ნამდვილ ჩემპიონს მხოლოდ გამარჯვებები არ ქმნის. ზოგჯერ ყველაზე მნიშვნელოვანი სწორედ ის არის, როგორ ხვდები ყველაზე რთულ ბრძოლას – და როგორ გხვდება უკან შენი გულშემატკივარი.
