Fashion Book ქართული ბრენდის „სამისას“ შესახებ გიამბობთ, რომელიც უკვე 5 წელია ბაზარზე გამოჩნდა. დაფუძნების იდეა სამ მეგობარს გაუჩნდა, რომლებმაც ხელოვნების უნივერსისტეტი დაამთავრეს და პროფესია ყოველდღიურ საქმიანობად აქციეს. გთავაზობთ ინტერვიუს, რომელიც უკეთ გაგაცნობთ ბრენდის საქმიანობას.
უპირველესად, გაგვაცანით ბრენდი…
ბრენდი სამმა მეგობარმა და კურსელმა მაია ბოლქვაძემ, თეა ხელაძემ და ნანიკო გოგიაშვილმა დავაფუძნეთ. სამივე ჩვენგანმა ხელოვნების უნივერსიტეტი დავამთავრეთ. გამომდინარე იქიდან, რომ ძალიან გვიყვარდა და მოგვწონდა ჩვენი პროფესია, გადავწყვიტეთ ბრენდი ჩამოგვეყალიბებინა და ჩვენს ყოველდღიურ საქმიანობად გვექცია. ასეც მოვიქეცით და ძალიან მალე წარვდექით საზოგადოების წინაშე „სამისას“ ბრენდით.
რატომ „სამისა“?
ბევრი ვიფიქრეთ, რა სახელწოდება შეგვერჩია ბრენდისთვის. გვსურდა მარტივი და დასამახსოვრებელი სახელი ყოფილიყო, რომელსაც შინაარსობრივი დატვირთვაც ექნებოდა და ასე მარტივად გადავწყვიტეთ – „სამისა“. ეს სახელი, როგორც აღვნიშნეთ, მარტივიც არის, ჟღერადიც და, რაც მთავარია, ჩვენ სამის ერთობლიობას აღნიშნავს.
რა სტილის სამოსს სთავაზობთ საზოგადოებას?
ბრენდმა თავიდანვე დიდი გამოხმაურება და დაინტერესება გამოიწვია ჩვენს ბათუმელ ქალბატონებში. ჩვენი სტილი მალე შეიყვარეს და ამას ყოვედღიურად ვგრძნობდით მათი ხშირი სტუმრობით, რაც ჩვენთვის მეტი სტიმულისა და მოტივაციის ფაქტორი გახდა.
რა ნიშა აქვს ბრენდს ბაზარზე?
ბრენდი განსაკუთრებული იმითაა, რომ თითოეული კაბა თუ სხვა სამოსი გამოირჩევა ინდივიდუალიზმით და არასოდეს მეორდება. ჩვენთან შეძენილი ტანსაცმლით მომხმარებელი დარწმუნებულია, რომ კონკრეტული შენაძენი მხოლოდ მისია.
ჩვენი ხაზი ხშირად სხვადასხვა სტილშია გადაწყვეტილი, თუმცა ის ნიშა, რაც თავიდანვე მოგვყვება, არის რეტრო, 20-იანი წლები და ის რთული კონსტრუქციები, რაც ძალზე ინდივიდუალურს და გამორჩეულს ხდის ჩვენს ბრენდს.
გვესაუბრეთ ხარისხზე…
საქართველოს პირობებში ცოტა რთულია ქსოვილის არჩევა და შემდეგ მისი შეძენა. მიუხედავად ამისა, მუდმივად ვცდილობთ შევინარჩუნოთ ხარისხი და ნატურალურ ქსოვილებზე გავაკეთოთ არჩევანი.
ძალიან გვიყვარს ტილოზე, აბრეშუმსა და ბამბის ქსოვილებზე მუშაობა. უპირატესობას ვანიჭებთ დრაპირებით და რთული კონსტრუქციებით შედგენილ თარგებს.
არასოდეს გვეშინია გამოწვევების და ყოველთვის ვცდილობთ ვისწავლოთ და განვვითარდეთ.
როგორია ბრენდის სამომავლო გეგმები?
ბრენდი უკვე 5 წელია, რაც ბათუმის ბაზარზე ოპერირებს, თუმცა მომხმარებლების დიდი ნაწილი სხვადასხვა ქვეყნის და ქალაქის ქალბატონები არიან და ამიტომ სამომავლო გეგმებში გაფართოებას და სხვა ქალაქებში ჩვენი შოურუმის გახსნას განვიხილავთ.
