Gucci–ის მფლობელი კომპანია Kering ხელოვნურ ინტელექტზე დაფუძნებული სათვალეების შექმნას გეგმავს. პროექტი Google-თან პარტნიორობით განხორციელდება და შესაძლოა გახდეს ერთ–ერთი ყველაზე მნიშვნელოვანი ნაბიჯი, რომელიც აჩვენებს, როგორ უახლოვდებიან ერთმანეთს ტექნოლოგიური ინდუსტრია და ლუქს მოდის ბრენდები.
Reuters-თან ინტერვიუში Kering-ის აღმასრულებელმა დირექტორმა, ლუკა დე მეომ, განაცხადა, რომ „ჭკვიანი“ სათვალეების ბაზარზე გამოსვლა 2027 წლიდან არის მოსალოდნელი. ამ ნაბიჯით Gucci შესაძლოა გახდეს ერთ–ერთი პირველი ტრადიციული ლუქს ბრენდი, რომელიც კოლექციაში მის აქსესუარსა და ხელოვნურ ინტელექტს გააერთიანებს.
პროექტი Kering-ის უფრო ფართო ბიზნესსტრატეგიის ნაწილია. კომპანია ცდილობს გააძლიეროს ისეთი მიმართულებები, როგორიცაა სათვალეები და სამკაული, რომლებიც ამ ეტაპზე მთლიანი შემოსავლის შედარებით მცირე ნაწილს შეადგენს, თუმცა ზრდის მნიშვნელოვან პოტენციალს წარმოადგენს.
Gucci-ის AI სათვალეები პირდაპირ კონკურენციაში შევა EssilorLuxottica-სთან, რომელიც უკვე აწარმოებს Ray-Ban-ის ჭკვიან სათვალეებს Meta–სთან თანამშრომლობით.
დე მეომ აღნიშნა, რომ პროექტი მხოლოდ ტექნოლოგიური ექსპერიმენტი არ არის – ის ასევე უკავშირდება Gucci-ის ბრენდის გადაფასებასა და პოზიციონირების განახლებას, განსაკუთრებით იმ პერიოდში, როდესაც ბრენდი გაყიდვების შენელებას აწყდება.
თუ პროექტი დაგეგმილი ვადებით განხორციელდება, Gucci-ის AI სათვალეები შესაძლოა გახდეს მაგალითი იმისა, თუ როგორ ცდილობს თანამედროვე ლუქს ინდუსტრია ტექნოლოგიასთან შერწყმით ახალი მომხმარებლის მოზიდვას და მოდის მომავლის ხელახალ განსაზღვრას.
