კვირას გამართულ საჯარო დისკუსიაზე მსახიობმა, ქეით ბლანშეტმა, რომელიც გენდერული თანასწორობის საკითხებზე ხშირად საუბრობს, აღნიშნა, რომ #MeToo-ს ტალღა ჰოლივუდში მნიშვნელოვნად შესუსტდა – „ის ძალიან სწრაფად ჩაქრა, რაც ჩემთვის საინტერესოა,“ – თქვა ბლანშეტმა.
ბლანშეტი 2018 წელს, როდესაც კანის კინოფესტივალის ჟიურის პრეზიდენტი იყო, წითელ ხალიჩაზე გამართულ პროტესტშიც მონაწილეობდა. ის და კიდევ 81 ქალი Palais des Festivals-ის კიბეებზე გამოჩნდნენ – ეს რიცხვი იმ ქალ რეჟისორებს აღნიშნავდა, რომლებიც კანის საკონკურსო პროგრამაში წლების განმავლობაში შეირჩნენ, მაშინ როცა იმავე პერიოდში კონკურსში 1 866 მამაკაცი რეჟისორი მონაწილეობდა. მსახიობმა აღნიშნა, რომ გადასაღებ მოედნებზე გენდერული ბალანსი კვლავ პრობლემად რჩება.
„დღემდე ყოველდღე ვითვლი გადასაღებ მოედანზე ადამიანებს – დილით იქ დაახლოებით 10 ქალი და 75 კაცი გვხვდება,“ – თქვა მან.
„მე მამაკაცები მიყვარს, მაგრამ პრობლემა ისაა, რომ ხუმრობებიც ერთნაირი ხდება. უბრალოდ ემზადები ამისთვის, რადგან მიჩვეული ხარ, მაგრამ ერთფეროვანი სამუშაო გარემო საბოლოოდ ყველასთვის მოსაწყენი ხდება და ეს თავად ნამუშევარზეც აისახება.“
ბლანშეტის ჟიურის პრეზიდენტობის წელს კანის ფესტივალი გააკრიტიკეს, რადგან ოფიციალურ პროგრამაში 21 ფილმიდან მხოლოდ სამი ქალი რეჟისორის ნამუშევარი მოხვდა. მაშინ მსახიობმა განაცხადა, რომ ცვლილებები „ერთ დღეში ვერ მოხდებოდა“.
კანის ფესტივალზე გენდერული უთანასწორობის თემას მსახიობი ჯულიან მურიც შეეხო. მან აღნიშნა, რომ ბოლო ათწლეულის განმავლობაში მდგომარეობა ნაწილობრივ გაუმჯობესდა.
Kering Women in Motion-ის ღონისძიებაზე გამოსვლისას მურმა გაიხსენა პერიოდი, როცა დაახლოებით 2016 წელს გადასაღებ მოედანზე ერთადერთი ქალები თავად და კამერის მესამე ასისტენტი იყვნენ.
„მახსოვს, როგორ ვიყავით მხოლოდ ჩვენ ორნი. ეს იყო ჰილარი კლინტონის არჩევნებში დამარცხების დრო და ორივე ძალიან განვიცდიდით. ოთახს გადავხედე და ვთქვი – აქ მხოლოდ ჩვენ ვართ,“ – აღნიშნა მსახიობმა. მისი თქმით, დღეს გადასაღებ ჯგუფებში ქალების წარმომადგენლობა უფრო ხშირად ჩანს, მაშინ როცა კარიერის დასაწყისში ეს იშვიათობა იყო.
