როგორც ჩანს, 2023 წლის იანვარში მსოფლიოში ერთ-ერთი ყველაზე გახმაურებული ჯგუფის BTS-ის წევრის J-Hope-ის “ლუი ვიტონის” მამაკაცის ხაზის კოლექციის ჩვენებაზე გამოჩენა უბრალოდ მინიშნება იყო საზოგადოებისთვის, სანამ კორეელი ვარსკვლავი მაღალი მოდის ბრენდის ახალ ამბასადორად დასახელდებოდა. როგორც იცით, BTS 2021 წელს “ლუი ვიტონის” ამბასადორი სრულო შემადგენლობით გახლდათ, თუმცა ამჯერად მოდის სახლმა მხოლოდ J-Hope-თან გადაწყვიტა თანამშრომლობა.
“ლუი ვიტონის” კრეატიული დირექტორი რამდენიმე კვირის წინ დასახელდა, ბრენდს ამერიკელი მუსიკოსი და მოდის ანტრეპრენერი ფარელ უილიამსი უხელმძღვანელებს. ვარსკვლავი გახდება ისტორიაში რიგით მეორე შავკანიანი დიზაინერი, რომელიც ფრანგული მოდის სახლის სათავეში ჩადგა. პირველი იყო ვირჯილ აბლო, Off-White-ის დამფუძნებელი, რომელიც 2018 წელს Louis Vuitton-ის კრეატიული დირექტორი გახდა და რომელიც კიბოსთან ორწლიანი ბრძოლის შემდეგ 2021 წელს გარდაიცვალა.
