ქართული ბრენდი „ბარნოვი“ მომხმარებელს სთავაზობს აქსესუარების მრავალფეროვან არჩევანს. თქვენ შეგიძლიათ ულამაზესი და ორიგინალური თმის სამაგრებისა თუ ჩანთების შეძენა. ასევე, გაზაფხულის გარდერობის განახლება „ბარნოვის“ ფერადი სამოსით. ეს არის ბრენდი, რომელიც ორიენტირებულია ხარისხსა და სიახლეზე. უფრო დეტალურად ამ თემაზე OK!-ის ესაუბრა ბრენდის დამფუძნებელი, დიზაინერი და მხატვარი − რუსუდან ბარნოვი.
როგორია თქვენი ბრენდის შექმნის ისტორია?
ბარნოვები ძირითადად ხელოვანები და ნიჭიერები არიან. სწორედ ასეთ გარემოცვაში გავიზარდე მეც. ყოველთვის მაინტერესებდა ეს სფერო. 10 წელზე მეტია, რაც ახლობლებისა და მეგობრებისთვის ელეგანტურ აქსესუარებს დიდი სიამოვნებით ვქმნი. მაშინ, როდესაც მოთხოვნები შიდა წრეს გასცდა, გადავწყვიტე შემექმნა საკუთარი ბრენდი. სწორედ ასე დავაარსე აქსესუარების ბრენდი „ბარნოვი“, რომლის ლოგო და ბრენდინგი თავად შევქმენი და დღეს ონლაინარხების საშუალებით ათვისებული მაქვს არა მარტო ადგილობრივი, არამედ საერთაშორისო ბაზარიც. ასევე, მიხარია, რომ გადავდგი მნიშვნელოვანი ნაბიჯი და მოვიპოვე დაფინანსება − პროგრამის „აწარმოე საქართველოში“ ბენეფიციარი ვარ, მაქვს საკუთარი სახელოსნო-სალონი, სადაც ვმუშაობ და ვქმნი ახალ კოლექციას. ჩემს სახელოსნოში ვატარებ ქარგვის მასტერკლასებს, ხელნაკეთი ნივთების როგორც თემატური, ასევე მომხმარებლის მოთხოვნიდან გამომდინარე. ჩემი სახელოსნოს ხშირი სტუმრები არიან სხვადასხვა ქვეყნიდან ჩამოსული ტურისტები. დაინტერესება დიდია, რაც ძალიან მახარებს. მინდა ასევე აღვნიშნო USAID-ის პროგრამა, რომელმაც მომცა განვითარების შესაძლებლობა პროფესიულ საქმიანობაში.
რა სახის პროდუქტს სთავაზობთ მომხმარებელს?
ჩემი ბრენდი მომხმარებელს სთავაზობს სხვადასხვა ხაზს, კერძოდ ქალის, მამაკაცისა და ბავშვის სამოსსა და აქსესუარებს. განსაკუთრებულად მოთხოვნადია თმის სამაგრები, ბაფთები, სამაჯურები და სხვ. აქსესუარების დასამზადებელ მასალად ვიყენებ ქსოვილს, ტყავს, ბუნებრივ ქვებს, მდინარის მარგალიტებსა და მეტალს. სამოსის შესაქმნელად კი ვიყენებ ორ განსაკუთრებულ ტექნიკას: ეს არის ტამბურული ხელოვნება, იგივე ლუნევილური ქარგვის ტექნიკა და ბრაზილიური ქარგვა. სწორედ ეს ქმნის ჩემს პროდუქციას განსაკუთრებულს, უცხოსა და უნიკალურს. ხარისხიანი პროდუქციის შექმნა და ხელმისაწვდომი ფასები კი ჩემი მთავარი ამოცანაა, ამიტომ მუდმივად ვზრუნავ ბრენდის რეპუტაციაზე.
სად შეუძლია საზოგადოებას თქვენი პროდუქციის შეძენა?
პროდუქციის შეძენა ხდება ონლაინრეჟიმში, სხვადასხვა სოციალური გვერდის მეშვეობით, როგორც საქართველოს მასშტაბით, ასევე ევროპიდან და აშშ-იდან. თვის განმავლობაში დაახლოებით 35-მდე სხვადასხვა სახეობის პროდუქციას ვამზადებ. თუმცა დამზადება-მიწოდების ვადები მაინც დამოკიდებულია თითოეულ ნივთზე და თავიდანვე თანხმდება ინდივიდუალურად მომხმარებელთან.
სამომავლო გეგმები…
აქტიურად ვმონაწილეობ სხვადასხვა გამოფენა-ბაზრობაში ქვეყნის მასშტაბით, ასევე საქველმოწმედო პროექტებშიც ვირებ მონაწილეობას, ბოლოს უკრაინელი ხალხის დასახმარებლად საქველმოქმედო პროექტში მივიღე მონაწილეობა. ასევე სამომავლოდ დიდი სურვილი მაქვს მივიღო მონაწილეობა მსგავს საერთაშორისო ღონისძიებებში. გარდა ამისა, აქტიურად ვგეგმავ ჩემი არსებული პროდუქციის კიდევ უფრო გამრავალფეროვნებას და ახალი ხაზისა თუ აქსესუარების დამატებას. პარალელურად დავიწყე ავეჯის განახლება დეკუპაჟის ტექნიკით, რაც ჩემი ბრენდის კიდევ ერთი მიმართულება იქნება. ასევე, ვარ ტრენერი და პროფესიული მასწავლებელი, ვუზიარებ ჩემს გამოცდილებას სტუდენტებს, ვმუშაობ არასამთავრობო ორგანიზაციაში ძირითადად ვმუშაობთ ახაკგაზრდებთან და ვზრუნავ თემის განვითარებაზე. როგორც მეწარმე და გამოცდილი მეწარმე ვატარებ ტრენინგებს, − ვუზიარებ გამოცდილებას მეწარმეობაში. გამორჩეულად დიდი სურვილი და მიზანი მაქვს მაღალმთიან რეგიონებში დავეხმარო ქალებს, განსაკუთრებით მარტოხელა ქალებს პიროვნულად გაძლიერებასა და განვითარებაში.
