ირანში მიმდინარე პროტესტებისა და ინტერნეტის გათიშვის ფონზე, ამერიკულმა კომპანია SpaceX-მა სატელიტური სერვისი- Starlink-ი უფასო გახადა – ინფორმაციას Bloomberg-ი წყაროზე დაყრდნობით ავრცელებს, თუმცა, თავად კომპანიას ეს ინფორმაცია ჯერჯერობით არ დაუდასტურებია.
იმავე წყაროს ინფორმაციით, ამჟამად მომიტინგეები სხვადასხვა საიტების ბლოკირებისთვის გვერდის ავლას სწორედ Starlink-ის მეშვეობით ახერხებენ. საერთაშორისო მედიაში გავრცელებული ფოტო და ვიდეო მასალა, რომელიც მომიტინგეების განსაკუთრებული სისასტიკით მკვლელობას ადასტურებს, სწორედ ამ გზით გახდა ხელმისაწვდომი.
Bloomberg-ის ინფორმაციით, მასკი Starlink-ს ამგვარად პირველად არ იყენებს. სააგენტო ხაზგასმით აღნიშნავს, რომ მანამდე ინტერნეტზე უფასო წვდომა უკრაინელებს, მათ შორის უკრაინის შეიარაღებულ ძალებსაც მიეცათ.
აიათოლასა და მასკის დაპირისპირება
აიათოლასა და მასკის დაპირისპირება ირანის ბედს განსაზღვრავს – წერს The Telegraph-ი. ამასთან, მასკმა რევოლუციის კლასიკური მეთოდები სამუდამოდ შეცვალა, როდესაც ირანელებს მოუწოდა ჩაერთონ Starlink-ში და ცენზურასა და ინტერნეტ შეზღუდვებს გვერდი აუარონ.
ირანში Starlink-ის ტერმინალები – ლეპტოპის ზომის სატელიტური ანტენები აკრძალულია, თუმცა ისინი ქვეყანაში ხშირად უკანონოდ შეაქვთ. გამოცემის ინფორმაციით, ამჟამად ირანში დაახლოებით 50 ათასი ასეთი მოწყობილობაა, თუმცა, ირანის ხელისუფლებამ ისწავლა GPS ქსელის მუშაობის შეფერხება, რომელსაც ტერმინალები იყენებენ.
The Guardian-მა იანვარში შეიტყო, რომ ირანი ინტერნეტის ნაციონალური სეგმენტის ჩაკეტვას აპირებდა და პირველ ნაბიჯად ხელმისაწვდომი საიტების „თეთრი სიის“ შექმნა დაასახელა. ამ ჩამონათვალში შიდა საძიებო სისტემები, რუკები, სანავიგაციო სერვისები, მესინჯერები და შიდა სტრიმინგ სერვისი შევიდა.
დღეს ირანში უკვე მუშაობს შიდა ინტერნეტის საცდელი ვერსია, რომელიც გაცილებით უფრო შეზღუდულია, ვიდრე ჩინურიც კი. მას მთავრობა მართავს და გარე სამყაროსთან კავშირი პრაქტიკულად არ აქვს.
ირანის ხელისუფლებამ ქვეყნის მასშტაბით ინტერნეტის გათიშვის გადაწყვეტილება 8 იანვარს, ეროვნული ვალუტის გაუფასურებისა და ფასების ზრდის გამო დაწყებული მასობრივი საპროტესტო აქციების ფონზე მიიღო. არასამთავრობო ორგანიზაცია HRANA-ს ცნობით, საპროტესტო აქციებს უკვე შეეწირა 2,500-ზე მეტი პირი, მათ შორის, 2,400-ზე მეტი დემონსტრანტი
ასევე დაგაინტერესებთ
#OK! სისხლიანი რევოლუცია – როგორ შეიცვალა ირანელი ქალების ცხოვრება 1979 წლის მოვლენების შემდეგ?
