2026 წლის 31 მაისს ცაზე ერთ-ერთი ყველაზე საინტერესო ასტრონომიული მოვლენა – ე.წ. „ლურჯი მიკრომთვარე“ გამოჩნდება. მიუხედავად სახელისა, მთვარე ლურჯი ფერის არ იქნება, თუმცა ეს სავსემთვარეობა რამდენიმე მიზეზის გამო განსაკუთრებულად ითვლება.
მაისის ბოლოს სავსე მთვარე ერთდროულად იქნება როგორც „ლურჯი მთვარე“, ასევე „მიკრომთვარე“.„ლურჯ მთვარედ“ მოიხსენიებენ შემთხვევას, როდესაც ერთ კალენდარულ თვეში ორი სავსემთვარეობა ფიქსირდება – 31 მაისის სავსე მთვარე სწორედ თვის მეორე სავსემთვარეობაა. ამასთანავე, ის 2026 წლის ყველაზე პატარა სავსე მთვარეც იქნება. მიზეზი ისაა, რომ ამ პერიოდში მთვარე დედამიწიდან ყველაზე შორეულ წერტილთან – აპოგეუმთან – ახლოს იმყოფება. შედეგად, ის საშუალო სავსე მთვარეზე დაახლოებით 7%-ით უფრო მკრთალი და ვიზუალურად ოდნავ პატარა გამოჩნდება.
თუმცა ასტრონომები ამბობენ, რომ შეუიარაღებელი თვალით ამ განსხვავების შემჩნევა რთულია. პირიქით, რადგან მაისის სავსე მთვარე ჰორიზონტთან ახლოს ამოდის, შესაძლოა ის ჩვეულებრივზე უფრო დიდიც კი მოგეჩვენოთ. ეს ე.წ. „მთვარის ილუზიის“ ეფექტია.
31 მაისის ღამეს მთვარე სამხრეთის ცაზე გამოჩნდება და მის მახლობლად კაშკაშა წითელი ვარსკვლავი ანტარესი იქნება, რომელიც მორიელის თანავარსკვლავედის ყველაზე ცნობილი ვარსკვლავია.
სპეციალისტები განმარტავენ, რომ „ლურჯი მთვარე“ ფერს სინამდვილეში არ უკავშირდება. რეალურად ლურჯი შეფერილობის მთვარე ძალიან იშვიათი მოვლენაა და მხოლოდ განსაკუთრებულ ატმოსფერულ პირობებში ჩნდება მაგალითად, ძლიერი ხანძრების ან მტვრის დიდი რაოდენობის დროს.
შესაძლოა, 31 მაისის „ლურჯი მიკრომთვარე“ ცაზე ნარინჯისფერი ან მოწითალო ელფერითაც გამოჩნდეს, რადგან ჰორიზონტთან ახლოს ყოფნისას მთვარის შუქი ატმოსფეროში განსხვავებულად იფანტება.
