ჩვენ მთელი წლის განმავლობაში ვადევნებდით თვალს საიუველირო სამყაროს სიახლეებს, ვსტუმრობდით მდიდრულ გამოფენებს და ვაკვირდებოდით წითელ ხალიჩაზე ვარსკვლავების სამკაულებს. 2025 წელს საიუველირო სამყარო სიახლეებით იყო სავსე, რამაც საშუალება მოგვცა, ეს რეიტინგი შეგვედგინა.
11
Dolce & Gabbana-ს 2025 წლის კოლექცია, რომელიც რომის კულტურას ეძღვნება. მასში წარმოდგენილია ხელით ნაკეთი სამკაულები, რომლებიც შექმნილია მარჯნის, ვარდისფერი ტურმალინისა და ოქტავიანე ავგუსტუსის ეპოქის ანტიკური მონეტებისგან.
10
Tiffany & Co-ს სამკაულები 2025 წლის ფილმში „ფრანკენშტეინი“. განსაკუთრებული ყურადღება 1914 წლის ყელსაბამმა მიიქცია.
9
კრიშტანუ რონალდუს რჩეულის, ჯორჯინა როდრიგესის ნიშნობის ბეჭედი ნამდვილი რეკორდსმენია. ფეხბურთელმა საცოლეს 37 კარატიანი ბეჭედი აჩუქა, რომლის ფასი 3 მილიონი დოლარია.
8
ანა ვინტური და მისი ვინტაჟური კოლექცია ყოველწლიურ Met Gala-ზე როგორც ყოველთვის, გამორჩეულია. გულის ფორმის აკვამარინის გულსაბნევი საღამოს პირველივე წუთებიდან განხილვის მთავარ თემად იქცა. ეს ერთ-ერთი ყველაზე მდიდრული აკვამარინის სამკაულია, რაც კი ოდესმე გვინახავს. გულსაბნევთან ერთად, ანა ვინტურმა Briony Raymond-ის ვიქტორიანული სტილის ვინტაჟური ყელსაბამი შეარჩია, რომლის ბრილიანტების საერთო წონა 45 კარატია.
7
გულსაკიდი „კარაველა“ (1580-1590 წ.) გულსაკიდი ზურმუხტების გამოფენიდან, რომელიც 2025 წელს, ერმიტაჟში გაიმართა.
6
ენ ჰეთეუეი და Bvlgari-ს საფირონები. მომხიბვლელი ენი 2025 წლის Met Gala-ზე იტალიური საიუველირო სახლის დახვეწილი სამკაულით გამოჩნდა. შთამბეჭდავი ყელსაბამი ბრილიანტებისა და საფირონების განლაგებით იმ საღამოს ერთ-ერთ ყველაზე თვალსაჩინო სამკაულად იქცა.
5
ყელსაბამი „გული“ Schiaparelli-ს 2026 წლის ჩვენებიდან. ბრენდის კოლექციის ყველაზე დასამახსოვრებელი დეტალი „მფეთქავი გული“ გახდა. ეს ნაკეთობა სალვადორ დალის შემოქმედებას მოგვაგონებს. გული, რომელიც 1953 წელს შეიქმნა და 70 წელზე მეტია „ფეთქავს“, ელისაბედ II-ის მეფედ კურთხევას მიეძღვნა.
4
Cartier Patiala-ს ყელსაბამი, 2025 წლის Cartier-ს გამოფენიდან. ეს Cartier-ს საიუველირო სახლის ისტორიაში ყველაზე ძვირადღირებული ნაკეთობაა, რომელიც 1928 წელს, მაჰარაჯა ბჰუპინდერ სინგჰის კოლექციისთვის დამზადდა. გამოფენაზე წარმოდგენილი იყო აღდგენილი სამკაული, რომელიც Cartier-ს არქივში ინახება. ორიგინალი თავის დროზე დაიშალა და აუქციონზე ნაწილ-ნაწილ გაიყიდა, თუმცა საიუველირო სახლმა ზოგიერთი ნაწილი გამოისყიდა და ლეგენდარული ყელსაბამი აღადგინა.
3
ლუვრიდან მოპარულ საგანძურს შორის უნიკალური სამკაულებია: იმპერატრიცა ევგენიას მარგალიტის ტიარა, დედოფალ მარი-ამელის საფირონის სამკაულების ნაკრები, იმპერატრიცა მარია-ლუიზას ზურმუხტის ყელსაბამი, საყურეები და სხვა. აღსანიშნავია, რომ დაკარგული სამკაულების საფრანგეთის მთავარ მუზეუმში დაბრუნება დღემდე ვერ მოხერხდა.
2
პრიანკა ჩოპრა და Bvlgari-ს ზურმუხტი. Met Gala-ს წითელი ხალიჩისთვის პრიანკა ჩოპრამ Bvlgari-ს მასიური ყელსაბამი, „Magnus Emerald“ შეარჩია, რომლის ზურმუხტიც 240 კარატზე მეტს იწონის. ეს ქვა აბსოლუტური რეკორდსმენია კარატების მიხედვით, რაც კი 2025 წლის Met Gala-ზე გვინახავს.
1
ფაბერჟეს კვერცხი, 1913 წელი. „ზამთრის კვერცხი“, რომელიც მეფე ნიკოლოზ II-მ 1913 წელს მარია ფედოროვნასთვის დაამზადებინა, ლონდონში, Christie’s-ის აუქციონზე, სამწუთიანი ვაჭრობის შემდეგ უცნობმა მყიდველმა შეიძინა. ეს საიუველირო შედევრი სარეკორდო ფასად — 30,2 მილიონ დოლარად გაიყიდა.
ასევე დაგაინტერესებთ
