The Devil Wears Prada 2 -ს გამოსვლამდე სულ ცოტა დრო რჩება, თუმცა ვარსკვლავებმა უკვე მოასწრეს ყურადღების ცენტრში მოქცევა. ნიუ-იორკში გამართულ მსოფლიო პრემიერაზე მსახიობები წითელ ხალიჩაზე გამოჩნდნენ.
ენ ჰეთევეი 2006 – 2026
2006 წელს მისი არჩევანი შედარებით მარტივი და უსაფრთხო იყო – წითელი დრაპირებული კაბა, რომელიც უფრო კლასიკურ და ნაკლებად გამოკვეთილ შთაბეჭდილებას ტოვებდა. 2026 წლის პრემიერაზე მან კვლავ წითელი ფერი აირჩია, თუმცა ბევრად უფრო დრამატული სილუეტით, რომელიც ნიკოლა ჟესკიერის მიერ შექმნილი დიზაინია Louis Vuitton-ისთვის. ჰეთევეის სტილისტმა, ერინ უოლშმა ლუქი შესაბამის ფეხსაცმელსა და შთამბეჭდავ რუბინისა და ბრილიანტის სამკაულს შეუხამა.
მერილ სტრიპი 2006 – 2026
მიუხედავად მისი მუდმივი ელეგანტურობისა, 2006 წლის ლუქი უფრო თავშეკავებული იყო. ამჯერად კი სტრიპი სრულად ერგება თანამედროვე წითელი ხალიჩის ესთეტიკას, მან მოირგო სარა ბარტონის მიერ Givenchy-სთვის შექმნილი წითელი ტყავის კაბა – თამამი, გამოკვეთილი და პერსონაჟზე მორგებული სტილით.
ემილი ბლანტი 2006 – 2026
მისი პირველი პრემიერა 2000-იანების ტიპურ ესთეტიკას ასახავდა – ქალური, მაგრამ შედარებით მარტივი. დღეს კი მისი არჩევანი უკვე კუტიურის კატეგორიაში გადადის, მსახიობმა The Devil Wears Prada 2-ის პრემიერაზე დანიელ როზბერის მიერ Schiaparelli-სთვის შექმნილი შთამბეჭდავი, დახვეწილი კუტიურ კაბა მოირგო, რომელიც 2026 წლის გაზაფხულის კოლექციიდანაა.
სტენლი ტუჩი 2006 – 2026
ტუჩი კვლავ კლასიკურად ელეგანტურია – მისი სტილი დიდად არ შეცვლილა, თუმცა დეტალებში იგრძნობა უფრო დახვეწილი, თანამედროვე ინტერპრეტაცია ხავერდის პიჯაკითა და სათვალით.
