OK! გაესაუბრა პროფესორს, გინეკოლოგ/რეპროდუქტოლოგს, „ზურაბ საბახტარაშვილის რეპროდუქციული კლინიკის“ ხელმძღვანელს და საქართველოში კოგნიტურ-შემეცნებითი არტის დამფუძნებელს, არსენ გვენეტაძეს. მან ინტერვიუში ისაუბრა კლინიკის შესახებ და ასევე განმარტა, თუ რამდენად დიდი მნიშვნელობა ენიჭება დროის სწორ გამოყენებას რეპროდუქტოლოგიაში შვილოსნობისათვის.
გვიამბეთ თქვენი საქმიანობის შესახებ.
პროფესიით გახლავართ ექიმი, კერძოდ რეპროდუქტოლოგ/გინეკოლოგი, 32 წელია, აგრეთვე უნივერსიტეტის პედაგოგ-პროფესორი 22-ე წელია. ვამაყობ, რომ 2018 წელს სტუდენტების გამოკითხვით, ივ. ჯავახიშვილის სახ. თბილისის სახელმწიფო უნივერსიტეტის წლის საუკეთესო პედაგოგ-პროფესორად მაღიარეს. 2009 წლიდან ვარ „ზურაბ საბახტარაშვილის რეპროდუქციული კლინიკის“ ხელმძღვანელი, 2018 წლიდან კი ვატარებ „ბედნიერების ელჩის“ წოდებას. ჩვენი კლინიკა ოფიციალურად სერტიფიცირებული ევროპული სტანდარტის კლინიკაა (სერტიფიცირება 2016, 2019 წწ., ხოლო 2020 წ. რესერტიფიცირება), რაც შეეხება ჩვენს წლიურ რაოდენობას შექმნილი ახალი სიცოცხლისა, 2009 წელს იყო 120, გასულ წელს 588, ანუ 5-ჯერ მეტი. ამდენად, ერთ სამუშაო დღეში 2-ზე მეტ სიცოცხლეს ვქმნით ბუნებრივი გზით, ლაპარასკოპიით, ენდოკრინული გინეკოლოგიის პრობლემების მოგვარებით და ინ-ვიტრო განაყოფიერებით. ანუ ყველა იმ თანამედროვე ტექნოლოგიით, რაც არსებობს მაღალ სტანდარტებს მორგებულ ევროპულ კლინიკაში.
რამდენად ეფექტიანია მკურნალობა?
ყოველი 100 წყვილიდან, რომელიც უშვილობის გამო აკითხავს ჩვენს კლინიკას, სტატისტიკურად, დაახლოებით 70% 6 თვიდან 1 წლის პერიოდში იღებს ორსულობას. დრო უმნიშვნელოვანესია ჩვენს საქმეში. ქალის ორგანიზმი დროსთან პირდაპირ არის დაკავშირებული, ვგულისხმობ, კვერცხუჯრედის რაოდენობასა და ხარისხს. კერძოდ, 18-დან 35 წლამდე ჯანმრთელი ქალის ორგანიზმში კვერცხუჯრედის რაოდენობა და ხარისხი უნდა იყოს ნორმალური, 35-დან 38 წლის მონაკვეთში იწყება როგორც კვერცხუჯრედის ხარისხის, ისე მარაგის შემცირება, რაც სავსებით ბუნებრივი პროცესია, 38 წლის შემდეგ კი უკვე გაცილებით სწრაფად მცირდება ორივე მათგანი. რაც შეეხება 40 წლის ზევით ჯანმრთელ ქალს, ამ შემთხვევაში 5%-ზე ნაკლები ალბათობით იღებს იგი ბუნებრივი გზით ორსულობას. ამდენად, დროის სწორი გამოყენება არის წარმატების ერთ-ერთი მთავარი გზა რეპროდუქტოლოგიასა და შვილოსნობაში.
რას ურჩევთ თქვენს პაციენტებსა და ჩვენს მკითხველს?
„რეპროდუქტოლოგია სიმშვიდის ბედნიერება“ − სწორედ ეს ფრაზა და ჩვენის გუნდის ფოტო დავიტანე ჩვენი კლინიკის ბუკლეტზე, რომელზეც გამოსახული არის სამი პროფესორი, მედიცინის ხუთი დოქტორი და ხუთი დოქტორანტი. „რეპროდუქტოლოგია სიმშვიდის ბედნიერება“ ნიშნავს, რომ თუ ექიმი სწორად აუხსნის პაციენტს თანამედროვე რეპროდუქტოლოგიის შესაძლებლობებს, იმას, თუ მის ორგანიზმს წლების განმავლობაში კვერცხუჯრედის მარაგის, სპერმის ხარისხის, მილების გამავლობის, საშვილოსნოს ფორმისა და ფუნქციური მდგომარეობის მიხედვით რა სჭირდება, პაციენტს ეცოდინება, რომ ვთქვათ, ბუნებრივი მეთოდით რამდენიმე თვე შეიძლება მოიცადოს, შემდეგ კი უპრიანია მიმართოს თანამედროვე არტ-ტექნოლოგიებს. შედეგად, უფრო მშვიდად არის იმ მდგომარეობასთან შედარებით, როდესაც იგი გაუგებრობაშია. ჩემი ერთ-ერთი კოგნიტიურ/შემეცნებითი არტ-ტილო, ნახატი, არის „დრო და რეპროდუქცია“. მას ჩემს პაციენტებთან ყოველდღიურად ვიყენებ, ვინაიდან ამ ნახატზე გამოსახულია ქალის სხეული და ვიზუალურად კარგად ჩანს კვერცხუჯრედების ხარისხისა და რაოდენობის ცვალებადობა ასაკის ზრდასთან ერთად. ამ ნახატს პლაკატის სახით ევროპელი ექსპერტებიც წარმატებით იყენებენ.
გაგვაცანით თქვენი სამომავლო გეგმები.
კვირა რომ ღამდება, აღვნიშნავ, თუ რა ბედნიერებაა ის, რომ წინ ხუთი ბრწყინვალე სამუშაო დღე მელოდება. რამდენიმე დღის წინ საოპერაციოშიც ვთქვი, რა ბედნიერებაა, რომ სამსახურში მოდიხარ და იცი, რომ შენი და შენი გუნდის დღევანდელი შრომა, ბუნებრივი, ქირურგიული თუ ინ-ვიტრო განაყოფიერების გზით, დღეს, ერთ სამუშაო დღეში, დაახლოებით სამ ახალ სიცოცხლეს შექმნის სამყაროსათვის და უშვილო წყვილებს ოჯახებად გადააქცევს!
ტექსტი: მარიამ მთივლიშვილი
