საფრანგეთი ჯადოსნური ქვეყანაა მსოფლიოში, რომელიც მუდამ ნუსხავს საზოგადოებას თავისი ღირსშესანიშნაობებით. დედაქალაქიდან ჩრდილოეთით, სულ რაღაც 80 კილომეტრში კი ნამდვილი მიწიერი სამოთხე მდებარეობს, რომელსაც სახელად ჟივერნი ჰქვია.
ეს არის პატარა დასახლება, სადაც ცნობილმა ფრანგმა მხატვარმა კლოდ მონემ 1883 წელს საკმაოდ მოზრდილი ნაკვეთი შეიძინა და ოჯახთან ერთად დასახლდა. მან შეძლო დიდი ხნის ოცნება აეხდინა – საცხოვრებელი სივრცე ხელოვნების ნიმუშად გარდაქმნა და საკუთარი სახლის გარშემო ულამაზესი ბაღი გააშენა. მონე თავად იყო მებაღეც და დეკორატორიც, რადგან ბაღისთვის ყველა ყვავილს, მცენარესა და დეტალს საკუთარი გემოვნებით არჩევდა. მის მიერ მცენარეებისგან შექმნილი კომპოზიციები, ხელოვნური ტბა, ხიდები, ღობეები – არარეალურად ლამაზ სანახაობას ქმნის. ჟივერნის ბაღი წელიწადის სხვადასხვა დროს აბსოლუტურად განსხვავებულია, თუმცა ყოველთვის ზღაპრულია. კლოდ მონე 40 წელი ცხოვრობდა სახლში, სადაც მისი ტილოების უმრავლესობა დაიხატა. ჟივერნიში მონეს სახლ-მუზეუმი ფაქტობრივად ხელშეუხებლადაა შენარჩუნებული და უამრავ ადამიანს იზიდავს შთაგონებისთვის. დღეს მის გარშემო ძალიან ბევრი მხატვრის სახელოსნო და საცხოვრებელი სახლია, და იქაურობა ერთგვარად მხატვრების დასახლებად იქცა.
