მინდა წარმოგიდგინოთ OK!-ის მარტის ნომრის ერთ-ერთი გამორჩეული რესპონდენტი, რომელიც პირველად არ მოხვდა ჩვენი ჟურნალის ობიექტივში, მაგრამ ამჯერად სულ სხვა ამპლუაში, განსხვავებული თემებითა და საკითხებით Gastro Book-ის მოწვეული რედაქტორის როლში იქნება. მანამდე კი წაიკითხეთ ძალიან საინტერესო ინტერვიუ მოდის ექსპერტთან და ბლოგერთან − დალი ჩიტალაძესთან.
ქალბატონო დალი, ყოფილხართ თუ არა აქამდე რედაქტორის ამპლუაში და რამდენად საინტერესო აღმოჩნდა თქვენთვის ეს შემოთავაზება?
ჩემი და ჟურნალის ურთიერთობა დაახლოებით ხუთი წლის წინ დაიწყო, როდესაც ერთ-ერთ ჟურნალში მოწვეული Bloger editor-ის როლს ვასრულებდი მთელი წლის განმავლობაში. მაშინვე ძალიან მომეწონა მოდერატორის როლი, მაგრამ მოწვეული რედაქტორის ამპლუაში არასოდეს ვყოფილვარ და ძალიან მომწონს. თან ისიც უნდა აღვნიშნო, რომ მოდის შემდეგ, ჩემთვის ყველაზე საინტერესო და საყვარელი სფერო სწორედ კულინარიაა. მოხარული ვარ და დიდი მადლობა ჟურნალ OK!-ის შემოთავაზებისთვის და ნდობისთვის.
რას წაიკითხავს მკითხველი OK! Gastro Book-ის მეშვეობით?
OK! Gastro Book-ში მკითხველი წაიკითხავს ამ სფეროს გარშემო არსებულ ისეთ მნიშვნელოვან და საინტერესო საკითხებს, როგორებიცაა: გამორჩეული ფილმები და წიგნები, დიეტები, ჯანსაღი კვების პროდუქტები, რეცეპტები. ასევე წაკითხავთ ინტერვიუებს კონსტანტინე თედელურთან, მაკა კვიციანთან და ნუცა სურგულაძესთან. ვფიქრობ, ძალიან საინტერესო ნომერს იხილავს ჟურნალ OK!-ის მკითხველი.
კულინარია ჩემთვის არის არა მხოლოდ გემრიელი საკვები, არამედ ესაა ცხოვრების სტილი, რადგან შეუძლებელია გამოიყურებოდე კარგად, თუ არ ზრუნავ ჯანმრთელობაზე, არ ვარჯიშობ და არ გაცვია ელეგანტურად. რასაც მიირთმევს ადამიანი, ისევე გამოიყურება ფიზიკურად.
როდის დაინტერესდით პირველად კულინარიით?
ჩემს ოჯახში ყოველთვის გამახვილებული იყო ყურადღება სწორ კვებაზე. დედა უგემრიელეს კერძებს ამზადებდა. ჩვენს სახლში, ფაქტობრივად, კარი არც იკეტებოდა, მუდმივად სტუმრები გვყავდა. შესაბამისად, ყოველთვის მზად ვიყავით მასპინძლობისთვის. ამ ტრადიციას დღემდე ვაგრძელებ. ყოველდღე თუ არა, ყოველ მეორე-მესამე დღეს მყავს სტუმრები, რომლებსაც ვახვედრებ გემრიელ კერძებს და ამ პანდემიის პერიოდში ასე გაგვყავს დრო. „მასტერშეფში“ მონაწილეობის შემდეგ, ჩემი კულინარიული თვალსაწიერი ბევრად გაიზარდა და კიდევ უფრო სხვა თვალით შევხედე ამ სფეროს. ყოველდღიურად ვავითარებ საკუთარ კულინარიულ ნიჭს.
თქვენს ძირითად საქმიანობაზეც მოგვიყევით.
მე მაქვს საკუთარი YouTube-არხი და Facebook-გვერდი, რომელთა აქტივობაც არ შემიწყვიტავს პანდემიის პირობებშიც კი. ახლა ვიდეოების სერიასაც ვიწყებ YouTube-ზე, სადაც დიზაინერებთან და მოდელებთან ერთად გავაკეთებ კერძებს, ახალ რეცეპტებს ვთავაზობ საკუთარ მაყურებლებს და ვსაუბრობთ ჩემი სტუმრების შემოქმედებაზე, თავგადასავლებზე, გეგმებზე. კულინარია და მოდა ჩემი არხის მეშვეობით გავაერთიანე.
როგორია თქვენი ერთი დღის რაციონი?
დილით, უპირველესად, ვიღებ აბაზანას და ვსვამ წყალს. გაღვიძებიდან პირველი ორი საათი არ ვიკვებები. ორი საათის შემდეგ მივირთმევ ვაშლს ან გრეიფრუტს, ან ახლად გამოწურულ ხილის ან ჯეჯილის წვენს, რომელიც ძალიან ჯანსაღი და სასარგებლოა. ამის შემდეგ ვსვამ ყავას რძით და მივირთმევ ხაჭოს, მაწონს და კოვზ თაფლს, ან ჩემ გაკეთებულ ხილფაფას მოცხარით, ჟოლოთი და შინდით. სადილს ვტოვებ. წავიხემსებ ხილით, თხილით, ნუშით, ნიგვზით და შეიძლება დავლიო კიდევ ერთი ჭიქა ყავა მცირე შოკოლადთან ერთად. პარალელურად, მთელი დღის განმავლობაში ვსვამ წყალს. 6-7 საათზე ვვახშმობ, რომლის რაციონიც შედგება ბოსტნეულის სალათისგან და ცილისგან. პურს თავს ვარიდებ და ხშირად მჭადით ვანაცვლებ.
ვვარჯიშობ კვირაში სამი დღე სუფთა ჰაერზე, ბუნებაში. ეს ჩემთვის რელაქსაციის მთავარი წყაროა. ღამის განმავლობაში აუცილებლად 8 საათი მძინავს − არ აქვს მნიშვნელობა, რომელ საათზე დავწვები.
დაახასიათეთ საკუთარი თავი ჰაშთაგებით.
#გამოუსწორებელიოპტიმისტი, #პოზიტივიდამხოლოდპოზიტივი, #ერთგული.
უპირველეს ყოვლისა, რა გხვდებათ თვალში ადამიანის ჩაცმულობაში?
ასე, კონკრეტულად, ვერაფერს გამოვყოფ, მაგრამ გეტყვით, რა მომწონს და რა არა. მომწონს ელეგანტურობა და არ მომწონს ვულგარულობა. არ აქვს მნიშვნელობა, ბრენდული სამოსი გაცვია თუ არა. მთავარია, ელეგანტურად გამოიყურებოდე. ძალიან უბრალო სამოსითაც შეიძლება საოცრად დახვეწილად გამოიყურებოდე. ვულგარულობა ნიშნავს, რაც არ გიხდება, ის რომ გაცვია.
რას ურჩევდით ახალგაზრდა თაობას?
ვურჩევდი, არ მოწიონ არასოდეს. ეს არის ყველაზე მავნე ჩვევა. ვაღიარებ, მეც ვეწეოდი წლების წინ, მაგრამ დღეს ვფიქრობ, რომ ასეთი შეცდომა არასოდეს დამიშვია. ამით ავნებ არა მარტო შენს თავს, არამედ გარშემომყოფებსაც.
ასევე ვურჩევ, მიეჩვიონ თავიდანვე საკუთარი თავის პატივისცემას. თუ საკუთარ თავს პატივს სცემ, არ მიირთმევ არაჯანსაღ საკვებს, ვარჯიშობ და იღებ ცოდნას. როდესაც ხარ განათლებული, ხარ ინტელექტუალი, შესაბამისად, გიყვარს საკუთარი თავი. სწორედ ამ ინტელექტიდან მოდის ყველაფერი, რაც ადამიანის თავს ხდება. შეიყვარეთ საკუთარი თავი, რომ შეგიყვარონ სხვებმაც.
ფოტო: ლაშა ღუღუნიშვილი
