18 ოქტომბერს ლოს-ანჯელესში „Victoria’s Secret“-ის მოდის ჩვენება გაიმართა, რომლის ერთ-ერთი ყველაზე დასამახსოვრებელი მომენტი კაილი ჯენერის პოდიუმზე გამოჩენა გახდა. რეალითი შოუს ვარსკვლავმა შოუში პირველად მიიღო მონაწილეობა და განსაკუთრებული ყურადღება „Fantasy Bra“-ს წარდგენით მიიპყრო – ძვირფასი ქვებითა და ბრილიანტებით გაფორმებული ბიუსჰალტერით, რომლის ღირებულებაც 50 მილიონ დოლარს შეადგენს.
Jacob Arabo-სა და ბრენდის თანამშრომლობით შექმნილი ექსკლუზიური მოდელი 4 410 ბუნებრივი ბრილიანტით არის გაფორმებული. მათ შორის მთავარი დეტალი 75.54-კარატიანი, ბუნებრივი, მკვეთრი ყვითელი ბრილიანტია, რომელსაც კიდევ 4 409 ბრილიანტი ავსებს.
„Fantasy Bra“ შოუზე ბოლოს 2018 წელს, ელზა ჰოსკმა წარადგინა, ამიტომ მისი დაბრუნება წლევანდელი ჩვენების ერთ-ერთი მთავარი მოვლენა იყო.
კაილის პოდიუმზე გამოჩენას განსაკუთრებული ყურადღებით ადევნებდნენ თვალს მისი ოჯახის წევრები – შოუს წინა რიგში კრის ჯენერი და ტიმოთი შალამე ისხდნენ. კაილისთვის ეს „Victoria’s Secret“-თან თანამშრომლობის პირველი გამოცდილებაა, მაშინ როდესაც მის უფროს დას, კენდალ ჯენერს, ბრენდთან მუშაობის მრავალწლიანი გამოცდილება აქვს.
წლევანდელი შოუ ლოს-ანჯელესში, Sony Pictures Studios-ში გაიმართა. ჩვენებაში მონაწილეობდნენ ჯიჯი და ბელა ჰადიდები, ადრიანა ლიმა, ალესანდრა ამბროსიო, კენდის სვეინპოლი, ელზა ჰოსკი, ალექს კონსანი, ანოკ იაი, მატილდა გვარლიანი და სხვა მოდელები.
პოდიუმის შთამბეჭდავ სანახაობას მუსიკალური წარმოდგენებიც ახლდა – მაყურებლის წინაშე წარდგნენ KATSEYE, მეგან მორონი, მეგან ტი სტელიონი და ტეიტ მაკრეი.
