მოგესალმებით, ძვირფასო მკითხველებო!
დეკემბერი დაგვიდგა, წინასაახალწლო, გადამდები განწყობა უკვე ჰაერში ტრიალებს და ყველამ ფუსფუსი დავიწყეთ. ვემზადებით.
ვინც საახალწლოდ კანის მომზადების საკითხი დეკემბრისთვის მოიტოვეთ, მინდა გირჩიოთ, როგორ მოუაროთ კანს ერთი თვის ფარგლებში ისე, რომ თვის ბოლოს მბზინავი, ჯანსაღი, გალამაზებული და გაახალგაზრდავებული კანი დაინახოთ სარკეში ჩახედვისას.
მაშ ასე, რას მოვასწრებთ ერთ თვეში?
კანის მოვლა ყოველთვის ეპიდერმისიდან იწყება. ნებისმიერი ტიპის კანს სჭირდება კაბინეტური, პროფესიონალური წმენდა, ხოლო რა ტიპის წმენდას ჩაატარებს – ულტრაბგერით ზედაპირულს თუ ღრმა წმენდას, ამას თავად სპეციალისტი გადაწყვეტს, თქვენი კანის ტიპის და მდგომარეობის გათვალისწინებით. გაწმენდილ კანზე არაჩვეულებრივი ეფექტი აქვს მსუბუქი ქიმიური პილინგის პროცედურას. მოგეხსენებათ, პილინგი მჟავა კოქტეილების სახეზე დატანის პროცედურაა, რომელიც კანის მსუბუქ აშრევებას, ექსფოლიაციას იწვევს და შესაბამისად, ვიღებთ მკვდარი უჯრედებისგან თავისუფალ, გაახალგაზრდავებულ კანს. პილინგი ჩემი საყვარელი პროცედურაა, რომელსაც ხშირად ვიტარებ და რომელსაც ვუმადლი ჩემი კომბინირებული, აკნესკენ მიდრეკილი კანის საუკეთესო მდგომარეობას. ქიმიური პილინგი აუცილებელია ყველა ტიპის, მათ შორის, მშრალი კანისთვისაც და კიდევ ერთხელ აღვნიშნავ, თუ რომელი სახის პროდუქტს, როგორ კოქტეილმჟავას გამოიყენებს სპეციალისტი, ამას თავად გადაწყვეტს თქვენი კანის ტიპის მიხედვით. როგორც წესი, მშრალ კანზე ძალიან ფაქიზი ქიმიური პილინგი კეთდება, რომ არ გამოიწვიოს კანის გაღიზიანება და არასასურველი, გადამეტებული აშრევება.
ვინაიდან პილინგები კურსის სახით ტარდება, თუ კანის მოვლას დეკემბრის დასაწყისიდანვე შეუდგებით, თავისუფლად მოასწრებთ პილინგის მეორე პროცედურასაც, რომელიც კიდევ უფრო ამოანათებს თქვენს კანს.
ახლა კი გადავიდეთ კანის ინტრადერმულ მოწესრიგებაზე. რაკი დრო არ გვრჩება ბიორევიტალიზაციის/მეზოთერაპიის სრული კურსის ჩასატარებლად, მოდი, არჩევანი გავაკეთოთ ბუსტერის ერთ პროცედურაზე. ბუსტერი კიდევ უფრო მსუყე კონცენტრაციის, არასტაბილიზებული ჰიალურონის მჟავას შემცველი პროდუქტია, ვიდრე ბიორევიტალიზანტი. მისი მოლეკულური დატვირთვა უფრო მასიურია და შესაბამისად, ერთი პროცედურაც ხშირად საკმარისია, რომ კარგი ეფექტი მივიღოთ. ბუსტერისგან დატოვებული პაპულები (ნანემსრის ადგილას პატარა ბუშტუკებად შეყვანილი ჰიალურობის მჟავა) 3-4 დღეში აგილაგდებათ და აი, დადგება მოვლის პროცედურების გვირგვინის – ბოტულინოთერაპიის დრო. სახის ზედა მესამედის ბოტოქსით თერაპია დაასრულებს თქვენი კანის მოვლის პროცედურას, დაადგამს მას ესთეტიკის გვირგვინს და მინიმუმ 5 წლით უკან დაგაბრუნებთ, სწორედ ამიტომ მიყვარს ბოტოქსი და მას შეუცვლელ ესთეტიკურ თერაპიად ვთვლი. ეცადეთ ბოტოქსის გაკეთება ახალ წლამდე 2 კვირით – 10 დღით ადრე მოასწროთ, რადგან ბოტოქსის ეფექტი დაახლოებით ამ დროით შუალედში დგება.
ესეც ასე, შევკარით დეკემბრის კანის მოვლის გეგმა და ახლა ჯერი თქვენზეა.
მოუარეთ თავს, გალამაზდით, შეიძინეთ საახალწლო საჩუქრები, რომლის ასორტიმენტს ჩვენი ჟურნალის ბიუთი ვიზუალებშიც აღმოაჩენთ და, რაც მთავარია, არ დაგავიწყდეთ საჩუქარი საკუთარ თავსაც მიუძღვნათ.
ბედნიერი, ლაღი და მშვიდი ახალი წელი თქვენ და თქვენს ოჯახებს!
სიყვარულით,
თაკო გვაზავა
ჟურნალ OK!-ს ბიუთი რედაქტორი
