ნუმეროლოგები მიიჩნევენ, რომ სარკისებრი თარიღების დროს განსაკუთრებული ყურადღება უნდა მიექცეს ფიქრებს, ემოციებსა და გადაწყვეტილებებს, რადგან, მათი რწმენით, ადამიანის შინაგანი მდგომარეობა ამ პერიოდში განსაკუთრებით ძლიერ გავლენას ახდენს მის მომავალ ნაბიჯებზე.
რამდენად რეალურია მათი „განსაკუთრებული ენერგია“ და რას ამბობს ამაზე კლასიკური ასტროლოგია – საკითხთან დაკავშირებით OK Magazine – ს ასტროლოგი რამაზ გიგაური ესაუბრა:
“თავიდანვე უნდა ვთქვა, რომ სარკისებრ თარიღებს კლასიკურ ასტროლოგიაში განსაკუთრებული მნიშვნელობა არ ენიჭება. ხშირად ადამიანებს ჰგონიათ, რომ ასეთი თარიღები განსაკუთრებულ ენერგიას ატარებს, თუმცა ეს უფრო ნუმეროლოგიური და ფსიქოლოგიური ფენომენია, ვიდრე ასტროლოგიური.
ასტროლოგიაში მნიშვნელობა აქვს იმას, კონკრეტულ დღეს ზოდიაქოს რომელ ნიშანში იმყოფება მზე, სად არის მთვარე, როგორ არიან განლაგებული პლანეტები და როგორი კავშირი აქვთ ერთმანეთთან – დადებითი თუ დაძაბული.
სწორედ ეს განსაზღვრავს დღის ენერგიას და არა ის, რომ თარიღში ციფრები სიმეტრიულად არის განლაგებული. ადამიანებს ბუნებრივად უყვართ ვიზუალური ჰარმონია. ქვეცნობიერად სურთ, სიმეტრია და გარკვეული კანონზომიერება დაინახონ, ამიტომ სარკისებრ თარიღებს განსაკუთრებულ ძალას მიაწერენ და ფიქრობენ, რომ თუ ამ დღეს რაიმე მნიშვნელოვანს დაიწყებენ, აუცილებლად წარმატებული იქნება.
სინამდვილეში, ასტროლოგიურად ამის საფუძველი არ არსებობს. ეს დაახლოებით იმ შემთხვევას ჰგავს, როდესაც ადამიანი ტელეფონზე საათს შეხედავს და დაინახავს 11:11-ს, 22:22-ს ან 10:10-ს. ბევრი ამას რაღაც ნიშანს ან გზავნილს უკავშირებს, თითქოს სამყარომ ან ღმერთმა მინიშნება მისცა.
რეალურად კი ეს სუფთა ფსიქოლოგიური ფენომენია – ადამიანს სურს მნიშვნელობა აღმოაჩინოს იქ, სადაც ის არ არსებობს. ამიტომ კიდევ ერთხელ ვამბობ, რომ კლასიკურ ასტროლოგიაში არ არსებობს მიდგომა, რომლის მიხედვითაც სარკისებრი თარიღი თავისთავად განსაკუთრებულ ენერგიას ატარებს.
რაც შეეხება 26 ივნისს, მისი ენერგია განპირობებულია იმით, რომ მზე კირჩხიბის ნიშანში მოძრაობს. შესაბამისად, ამ პერიოდში განსაკუთრებით აქტუალური ხდება ემოციური სტაბილურობა, ოჯახური თემები, შინაგანი უსაფრთხოების განცდა და იმ საკითხების მოგვარება, რომლებიც ოჯახსა და ახლობლებთან ურთიერთობას უკავშირდება.
ძალიან ხშირად სწორედ კირჩხიბის პერიოდში ადამიანები უფრო მეტად ეძებენ როგორც ფსიქოლოგიურ, ისე ფიზიკურ უსაფრთხოებას და ცდილობენ ურთიერთობების დალაგებას. ამ დღის მთავარი აქცენტი სწორედ ამ თემებზეა და არა იმაზე, რომ თარიღი სარკისებრია. ამიტომ შეგვიძლია ჩვეულებრივად გავაგრძელოთ ჩვენი საქმეები და არ გვეგონოს, რომ მხოლოდ ციფრების დამთხვევის გამო რაიმე განსაკუთრებული ან სასწაულებრივი მოვლენა უნდა მოხდეს.
თუ რისკებზე ვსაუბრობთ, კირჩხიბის პერიოდში ემოციური ფონი შედარებით მომატებულია, ამიტომ სასურველია, თავი შევიკავოთ იმპულსური, რადიკალური გადაწყვეტილებებისა და კონფლიქტებისგან. ემოციებმა არ უნდა გვიკარნახოს მნიშვნელოვანი არჩევანი.
ხშირად მეკითხებიან, არის თუ არა ასეთი დღე სურვილების ჩაფიქრებისა და ახალი საქმეების დასაწყებად კარგი. ასტროლოგიურად ვიტყოდი, რომ გაცილებით მნიშვნელოვანი ახალი მთვარის პერიოდია. სწორედ ახალი მთვარის შემდეგ არის რეკომენდებული მიზნების დასახვა, ახალი პროექტების დაგეგმვა და აქტიური მოქმედების დაწყება, ვიდრე მხოლოდ სარკისებრი თარიღის გამო რაიმეს განსაკუთრებულ მნიშვნელობას მინიჭება.
ასევე ხშირად ამბობენ, რომ სარკისებრი თარიღები ჯადოსნურია, თუმცა მე ვიტყოდი, რომ ჯადოსნური თარიღები არ არსებობს. არსებობს დღეები, რომელთა ენერგიასაც პლანეტების განლაგება განსაზღვრავს. ამიტომ ბევრად მნიშვნელოვანია, თითოეული დღე გამოვიყენოთ საკუთარი ცხოვრების დასალაგებლად, მიზნების დასასახად და მათ მისაღწევად, ვიდრე მხოლოდ ციფრების სიმეტრიას მივანიჭოთ განსაკუთრებული მნიშვნელობა.“
