„კასს ლენდი“ წალკის კანიონზე უნიკალურ ინფრასტრუქტურულ პროექტს ახორციელებს
წალკის (ყოფილი დაშბაშის) კანიონზე, საქართველოში პირველად, დაცულ ტერიტორიაზე კერძო საერთაშორისო ინვესტიცია ხორციელდება, რომელიც ყველაზე მრავალფეროვანი ეკოტურისტული სივრცის მოწყობას გულისხმობს. პროექტი კომპანია KASS LAND-ის (ისრაელი) ინვესტიციით ხორციელდება. იდეა 2018 წელს გაჩნდა და მიზნად ისახავს როგორც წალკის კანიონის, ისე მთლიანად ქვეყნის წარმოჩენას საერთაშორისო ბაზარზე, როგორც აუცილებლად სანახავი ადგილისას, სადაც შესაძლებელია შემეცნებითი რეკრეაციის გზით უამრავი ახალი ემოციის მიღება. ამ ეტაპისთვის სამშენებლო სამუშაოები სრულდება და ივლისში იგეგმება კომპლექსის გახსნა. დეტალური ინფორმაციისთვის OK! გაესაუბრა პროექტის მენეჯერ ანა შანიძესა და კონცეფციის მთავარ დიზაინერ თომერ მორ იოსეფს.
რითაა პროექტი უნიკალური და მნიშვნელოვანი?
(თომერი): პროექტი მნიშვნელოვანი და უნიკალურია თავისი მასშტაბურობითა და კომპლექსურობით, სხვა ანალოგურ პროექტებთან მიმართებაში. მას განსხვავებულობას სძენს დაცული ტერიტორიების ხიბლი და ის, რომ ტურისტული ინფრასტრუქტურა შერწყმულია ბუნების ხელუხლებელ ძეგლთან, იმგვარად, რომ მთლიანი ლანდშაფტის ავთენტურობა არ ირღვევა. ეს კი ერთიორად ალამაზებს და უნიკალურს ხდის ამ ადგილს. გარდა ბუნების ძეგლისა, პროექტს გამოარჩევს კანიონზე გადაჭიმული 240 მ მინის ხიდი, რომლის შუაში დაკიდებული იქნება ბრილიანტის ფორმის კაფე-ბარი, საიდანაც გადაიშლება ულამაზესი ხედები კანიონზე. აღსანიშნავია, რომ ბუნებასთან დაკავშირებული პროექტები ყოველთვის რთულია და მოითხოვს დამატებით კრეატიულობას. ეს ჰგავს ბეწვის ხიდზე გავლას, სადაც ერთი მხრივ მაქსიმალურად უნდა გაითვალისწინო UX (მომხმარებლის გამოცდილება) და მეორე მხრივ, არ დაივიწყო ძირითადი ობიექტი − ბუნება, რომელიც სანახავი და შესაგრძნობია.
როგორ გაჩნდა ხიდის შექმნის იდეა?
(თომერი): მიზანი იყო, რამენაირად შემექმნა ექსტრემალური, ამაღელვებელი და დაუვიწყარი მომენტი, რომელიც სტუმრებში ხუთივე გრძნობას გააღვიძებდა და მათ მთელი ცხოვრება დაამახსოვრებდა თავს.
იდეა მოდის თავად კანიონის V-ს მსგავსი ფორმიდან. კანიონის მარჯვენა და მარცხენა მხარეების სავალი ნაწილები იდეალურად უკავშირდება ერთმანეთს ხიდის მეშვეობით, რომელიც 250 მეტრ სიმაღლეზე, უძველესი ქვების, მცენარეებისა და მდინარის თავზე გადადის. იმ მდინარის, რომელიც ამ სიმაღლიდან წვრილი, ლურჯი ზოლივით მოჩანს. დაპროექტებისას, V-ს ფორმის კანიონის ზომა მაქსიმალურად შევამცირეთ და გარდავქმენით „ბრილიანტის“ ფორმად, რომელიც ხიდზე გასაჩერებელი წერტილია. „ბრილიანტის“ წვეტი კი ზუსტად მის ქვეშ გამავალ მდინარეზე მიუთითებს.
შეგრძნებები „ბრილიანტში“ უბრალოდ შთამბეჭდავია − თითქოს გამოკიდებული ხარ სიცარიელეში და 360 გრადუსით უყურებ ღმერთის ქმნილებას − კანიონის ორ მასიურ კედელს.
ამ პროექტზე მუშაობისას, ყველაზე დიდი გამოწვევა იყო შუშის ხიდისა და „ბრილიანტის“ იმგვარად დაპროექტება, რომ უპირველეს ყოვლისა, იგი სტუმრებისთვის უსაფრთხო ყოფილიყო და ამავდროულად, შეგვენარჩუნებინა დიზაინის პირველადი იდეა. ჩვენმა ინჟინრებმა და კონსულტანტებმა დიდი მახვილგონიერება გამოიჩინეს და მუშაობის პროცესში უამრავი ვერსია და გამოსავალი შემოგვთავაზეს, რაც დაგვეხმარა ჩაფიქრებული დიზაინის შენარჩუნებაში.
ხიდის ფერები და მასალები გულდასმით შევარჩიეთ და ამასთან ერთად, ჩავუტარეთ ერთწლიანი შემოწმება, იმის დასადგენად, თუ როგორ ზემოქმედებს მათზე წლის სეზონური ცვლილებები.
დარწმუნებული ვარ, აქ მოსული სტუმრები აღმოაჩენენ ფანტასტიკურ პროექტს, უმაღლეს დონეზე შესრულებული დეტალებით, რომლებიც გათვალისწინებულია კანიონზე სტუმრობის ყველა ეტაპზე. რაც მთავარია, ჩვენ ბუნება გავხადეთ მაქსიმალურად ხელმისაწვდომი საკუთარი ვიზიტორებისთვის.
