2006 წელს, ვაშინგტონის შტატის ქალაქ სიეტლის პატარა უბანში მცხოვრებმა 84 წლის ედიტ მეისფილდმა უარი თქვა სახლის გაყიდვაზე და მისი სურვილი იმდენად ძლიერი იყო, რომ დეველოპერებს მთელი სავაჭრო ცენტრის აშენება… მისი სახლის გარშემო მოუწიათ.
დეველოპერებმა მოხუც ქალს თავდაპირველად 750,000 დოლარი შესთავაზეს, შემდეგ შეთავაზება 1 მილიონ დოლარამდე გაზარდეს, მაგრამ ედიტმა უარი თქვა გაეყიდა სახლი, რომელშიც მთელი ცხოვრება გაატარა.
„ფული არ მაინტერესებს. 84 წლის ვარ და თავს ბედნიერად ვგრძნობ. არსად გადასვლა არ მინდა და საერთოდ, ამდენი ფული სად წავიღო?“ – განაცხადა ქალმა.
ედიტმა ეს პატარა სახლი 1952 წელს, 3,750 დოლარად შეიძინა. ორი საძინებელი, ერთი სააბაზანო, სამზარეულო, მისაღები ოთახი და სხვენი პატარა ოთახით იმ ქიმიური ქარხნის პირდაპირ მდებარეობდა, სადაც 31 წლის ედიტი და ადგილობრივი მაცხოვრებლების უმეტესობა მუშაობდა.
როდესაც მისი სახლის გარშემო სავაჭრო კომპლექსის მშენებლობა დაიწყო, ედიტი ობიექტის მენეჯერს, ბარი მარტინს დაუმეგობრდა, რომელიც მასზე სიცოცხლის ბოლო დღეებამდე ზრუნავდა.
ედიტ მეისფილდი 2008 წელს გარდაიცვალა და ანდერძით თავისი სახლი ბარი მარტინს დაუტოვა. რამდენიმე თვეში მისი სახლი ფერადი ბუშტებით მოირთო. ამერიკული კომპიუტერული ანიმაციის კინოსტუდია Pixar-მა ედიტის სახლი თავისი ახალი ანიმაციური ფილმის, Up-ის (ზევით) სარეკლამო კამპანიის ნაწილად აქცია.
მალევე ბარი მარტინმა ნაჩუქარი სახლი 300 000 დოლარად გაყიდა. მას შემდეგ სახლმა რამდენიმე მფლობელი გამოიცვალა, თუმცა ჯერჯერობით, ვერცერთმა მათგანმა მისთვის ახალი დანიშნულება ვერ იპოვა.
დღეს ედიტ მეისფილდის ბუშტებით მორთული პატარა სახლი ისევ დგას, გარშემორტყმული უზარმაზარი სავაჭრო ცენტრით, როგორც შეხსენება იმისა, რომ არსებობს რაღაცეები, რისი ყიდვაც ფულით შეუძლებელია.
ასევე დაგაინტერესებთ
