უკვე რამდენიმე თვეა, რაც თბილისში, ნიკოლოზ ბარათაშვილის N182-ში სრულიად განსხვავებული კონცეფციის რესტორანი − „რუბი“ გამოჩნდა. იდეა ორ მეგობარს − გიორგი კალანდარიშვილსა და ილია ოძელაშვილს ეკუთვნის, რომლებიც კულინარიისა და ღვინის მიმართ განსაკუთრებულმა სიყვარულმა გააერთიანა და მიზნად დაისახეს საზოგადოებისთვის შეეთავაზებინათ მყუდრო და კომფორტული გარემო, უგემრიელესი გემოების თანხლებით.
გიორგი, გაგვაცანით რესტორანი „რუბი“. რამდენი ხანია, რაც ქართულ ბაზარზე გამოჩნდა?
უპირველესად, მოგესალმებით, მადლობა დაინტერესებისთვის და ჩვენი რესტორნის მოწონებისთვის. მე და ჩემმა მეგობარმა, ილია ოძელაშვილმა გადავწყვიტეთ, თავით გადავშვებულიყავით იმ საქმეში, რომელიც ძალიან გვიყვარს. მარტში დავიწყეთ სამზადისი და ივლისში გავიხსენით სათბურის ტერიტორიაზე, რომელიც თავის მხრივ ძალიან საინტერესო და მიმზიდველი აღმოჩნდა ჩვენთვის და ჩვენი იდეისთვის.
გვესაუბრეთ იდეაზე.
იდეა იყო ის, რომ გაგვეხსნა ადგილი, სადაც სტუმარი თავს იგრძნობდა გემრიელად. უშუალოდ ეს სიტყვა ქართულ სასაუბრო ლექსიკონში დამკვიდრდა, როგორც კომფორტის, სიმშვიდის აღმნიშვნელი („გემრიელად ვსხედვართ“, „გემრიელი გარემოა“, „გემრიელად მივირთმევთ“ ა.შ.) და, ალბათ, ყველაზე საოცარი შეგრძნებაა, როდესაც ჩვენთან მოსული სტუმრისგან გვესმის: „მმმმ ძალიან გემრიელია“.
და მაინც, რატომ ეს მიმართულება?
ერთად რესტორნის გახსნის მიზეზი იყო ჩვენი ამოუწურავი სიყვარული კულინარიისა და ღვინის მიმართ. ვფიქრობთ კარგად გამოგვივიდა ამ ორი მიმართულების ერთმანეთთან დაკავშირება.
რა იყო თქვენი მთავარი მიზანი?
ჩვენი მიზანია სტუმარმა მიირთვას გემრიელი ღვინო და კერძები, რომლებიც კარგად ნაცნობი გემოებისგან შედგება და ამ კარგად ნაცნობ გემოებში ჩვენ საკუთარი ცვლილებები შევიტანეთ. ზოგადად, არ მიყვარს, როცა კერძი, ვიზუალიდან დაწყებული, გემოთი დამთავრებული, არ არის საინტერესო და არ იგრძნობა ინდივიდუალიზმი (ნებისმიერ რამეში მომწონს ეს), ამიტომ როდესაც ჩვენთან მიირთმევთ, ხვდებით, რომ გარემოდან დაწყებული, კერძებით დასრულებული, ყველაფერში იგრძნობა ჩვენი დამოკიდებულება, სიყვარული და პატივისცემა სტუმრისა და ამ სფეროს მიმართ.
რას სთავაზობთ სტუმრებს?
საინტერესო გემოს და ამ გემოებით გართობას. ჩვენი ბრენდშეფი − ანა ბურდული ხშირად იმეორებდა ამ სიტყვებს, რომ ჭამის პროცესში უნდა გაერთო, რაშიც ვეთანხმები. სწორედაც რომ ამ პრინციპით არის ჩვენი სამზარეულო აწყობილი. არ მოგწყინდება ჩვენი გემოები, რადგან არ არის ერთფეროვანი. ავიღეთ ნაცნობი გემოები და ერთმანეთთან შევახამეთ: იმერული კუპატი პიურეს გარნირით, გამომცხვარი ღორის ხორცი ლობიოს გარნირით, კალმახა სოკო ფეტვის ღომთან ერთად და კიდევ მრავალი სხვა კერძი, რომელიც იწერება და იკითხება მარტივად, ზედმეტობების გარეშე, მაგრამ როცა მიირთმევთ, გულწრფელად გგონიათ, რომ ეს არასდროს გაგისინჯავთ და იქვე დაფიქრდებით, რომ ყოველთვის გიყვარდათ ეს.
ღვინოზეც გვიამბეთ, რომელიც თქვენს სტუმრებს დახვდებათ რესტორანში.
რაც შეეხება ღვინოს, ვფიქრობ, როდესაც ღვინო გიყვარს, უბრალოდ უნდა დალიო მხოლოდ კარგი ღვინო. მართალია რთულია ამის ორგანიზება, მაგრამ არ შეგეშინდეთ, სწორედ ამიტომ ავარჩიეთ საუკეთესო მცირე მეღვინეობის ღვინო. ამას დავუმატეთ უცხოური საოცარი ღვინო და vuala − მივიღეთ ღვინის გენიალური სელექცია. ჩვენთან შეხვდებით ციცქას, სოვინიონ ბლანს, კრახუნას, შარდონეს, ხვანჭკარას, პორტვეინს და კიდევ მრავალს. არც კოქტეილის მოყვარულები დაგვიჩაგრავს, არც ჭაჭის, არც ცხელი შოკოლადის, არც კონიაკის და ვისკის. მოკლედ, მთავარია გემრიელად გიყვარდეს დროის გატარება.
გაგვიზიარეთ სამომავლო გეგმები.
ჩვენი გეგმა მარტივია − გაგაცნოთ და შეგაყვაროთ ჩვენი თავი. გიმასპინძლოთ გემრიელად, თავს მოგახვიოთ ჩვენი სიყვარული ღვინისადმი. მომავალში შემოგთავაზოთ ისეთი აღმოჩენები გასტრონომიაში, რომელზეც ერთად დავსხდებით და ბევრს ვისაუბრებთ. როგორც თავში აღვნიშნე, მიყვარს, როდესაც იგრძნობა ინდივიდუალიზმი და როდესაც მარტივია. სწორედ ამაში ვხედავ გენიალურობას. ჩვენც შევეცდებით ბოლომდე დავიხარჯოთ და შემოგთავაზოთ საკუთარი ხედვით მარტივი და უგემრიელესი. ასე რომ, შევხვდებით ერთმანეთს „რუბიში“.
FB: რუბი • Ruby Restaurant
Mail: [email protected]
Tel: 599 12 61 28
მის: ნიკოლოზ ბარათაშვილის N182
სამუშაო საათები: 1:00 PM-1:00 AM
ტექსტი: ციაკო ღამბაშიძე
ფოტო: ალექსეი სეროვი
