ინსტაგრამ გვერდის demnagram-ის ავტორი საბა ბახია დემნა გვასალიას ჩვენებაზე ერთ-ერთი მიწვეული სტუმარი იყო. როგორც საბა ამბობს, ის ვერასოდეს ვერ წარმოიდგენდა, რომ ერთხელაც დემნა გვასალიას შეხვდებოდა.
,,ჩემი ოცნება ახდა, როდესაც გადავწყვიტე ამ გვერდის შექმნა, მაშინ ვერც კი ვიფიქრებდი, რომ ერთ დღესაც აქ ვიქნებოდი და ამდენ წარმოუდგენელ ადამიანს შევხვდებოდი. დემნამ და მისმა BALENCIAGA ERA-მ სამუდამოდ შეცვალეს ჩემი წარმოდგენა მოდის ინდუსტრიაზე!! სიტყვები არ მყოფნის, თუ როგორი მადლიერი ვარ დემნას და Balenciaga-ს სრული შემოქმედებითი ჯგუფის. ეს იყო დღე, რომელიც არასდროს დამავიწყდება ჩემს ცხოვრებაში. დაუვიწყარი კოლექცია, შთამბეჭდავი ჩვენება… აღფრთოვანებული ვარ დემნას თბილი დახვედრით და საოცარი სტუმართმოყვარეობით.”
როგორც საბა აღნიშნავს დემნა ძალიან კარგად საუბრობს ქართულად, რაც ვიდეოშიც ჩანს.
,,ძალიან კარგად ლაპრაკობს ქართულად, თუმცა როცა ეს ავღნიშნე გაუკვირდა’’
საბა ბახიას ინსტაგრამ სთორებიდან ჩანს, თუ როგორ შეხვდა ცნობილ მოდელს ბელა ჰადიდს და კიმ კარდაშიანს.
შეგახსენებთ, დღეს პარიზის მოდის კვირეულის ფარგლებში ბალენსიაგას ჩვენება ჩატარდა. დემნამ ღიად გამოხატა სოლიდარობა უკრაინის მიმართ, შოუ უკრაინული ლექსით გაიხსნა.
ჩვენებაზე მისულ სტუმრებს სკამებზე მაისურები დახვდათ უკრაინის დროშის ფერებში და წერილი დემნასგან, რომელშიც ეწერა:
„უკრაინაში მიმდინარე ომმა წარსული ტრამვის ტკივილი გამიმწვავა, რომელსაც 1993 წლიდან ვატარებ, იმ დროიდან, როცა ჩემს მშობლიურ ქვეყანაში იგივე მოხდა და სამუდამოდ ლტოლვილი გავხდი. სამუდამოდ, რადგან ეს არის ის, რაც შენში რჩება. შიში, სასოწარკვეთა, იმის გაცნობიერება, რომ არავის უნდიხარ. მაგრამ ასევე მივხვდი, რომ ცხოვრებაში რასაც ნამდვილად აქვს აზრი და რაც ყველაზე მნიშვნელოვანია არის თვითონ სიცოცხლე, ადამიანური სიყვარული და თანაგრძნობა…...“
კოლექციიდან ბოლო ორი ლუქი სიმბოლურად ქმნიდა უკრაინული დროშის ფერებს.
ჩვენება დაიხურა ისევ დემნას სიტყვებით: Живи, Україно!
