რუბრუკა OK! რჩევები დედებს ძალიან საინტერესო და მცირეწლოვანი ბავშვების მშობლებისთვის მეტად აქტუალური თემით დაგიბრუნდათ – როგორ დავგეგმოთ საზაფხულო პერიოდი ჩვენი შვილებისთვის ისე, რომ დრო ნაყოფიერად გაატარონ? ამ თემასთან დაკავშირებით ანის სკოლის დამფუძნებელს ანი ჩერქეზიშვილს ვესაუბრეთ.
აქვე აღვნიშნავ, რომ ანის სკოლა არის ლიდერობის და მოტივირების სკოლა ბავშვებისთვის. სკოლის მიერ შემუშავებულია საავტორო პროგრამები, რომელიც 5-12 წლამდე ასაკის ბავშვების პიროვნულ ზრდას, სოციალური უნარების განმტკიცებას და ემოციური ინტელექტის გაუმჯობესებას ისახავს მიზნად.
ზაფხულის მოსვლასთან ერთად ყველა მცირეწლოვანი ბავშვის მშობელი ვიწყებთ ფიქრს თუ როგორ დავგეგმოთ საზაფხულო პერიოდი. რა შემოთავაზება აქვს ამ კუთხით ანის სკოლას?
ზაფხული მშობლებისთვის ერთ-ერთი ყველაზე დიდი გამოწვევაა, რადგან ჩნდება შეკითხვა: როგორ მოვახერხოთ ისე, რომ ბავშვმა დრო საინტერესოდ და პროდუქტიულად გაატაროს, თან ისე, რომ არ გადაიტვირთოს.
ანის სკოლამ გადაწყვიტა, რომ წელს საუკეთესო საზაფხულო სკოლა შეექმნა, სადაც თანაბრად გათვალისწინებული იქნება გასართობი, შემეცნებითი და თერაპიული შეხვედრები. ჩვენ გვჯერა, რომ ზაფხული ახალი აღმოჩენების, გამოცდილებების და შესაძლებლობების პერიოდია, ზუსტად ამ მიმართულებით არის შემუშავებული საზაფხულო სკოლის პროგრამა 4-12 წლის ასაკის ბავშვებისთვის.
რა ასაკიდან იწყება ბავშვების მიღება?
ანის სკოლაში ძირითადი საავტორო პროგრამები 5-12 წლამდე ასაკის ბავშვებისთვის გვაქვს შემუშავებული, თუმცა საზაფხულო სკოლაში ასაკობრივი ბარიერი 4 წლიდან იწყება.
გვესაუბრეთ აქტივობებზე, რომლებსაც ანის საზაფხულო სკოლა გვთავაზობს ჩვენი პატარებისთვის?
ანის საზაფხულო სკოლაში ბავშვები ყოველ სამუშაო დღეს 10:00-17:00 საათებში ძალიან მრავალფეროვანი, საინტერესო და უნიკალური გამოცდილებებით სავსე პროგრამით მუშაობენ. 1 კონკრეტული დღის წესრიგი რომ აღვწეროთ, დილა იწყება თვითგამოხატვის ტექნიკებით, გემრიელი საუზმის შემდეგ ლეგოთამაშების დროა, შემდეგი ეტაპია არტ-თერაპიის შეხვედრა, ნოყიერი სადილის შემდეგ სახალისო ინგლისურის შეხვედრა გველის, შემდგომ მწვანე სივრცეში ბუნებათერაპიის დროა, ვახშმამდე ფსიქოლოგთან საუბრები გვაქვს ჩანიშნული, ხოლო ვახშმის შემდეგ თანამედროვე აზროვნების შეხვედრა გვექნება.
როგორც ვიცით საზაფხულო სკოლაში სკოლამდელი მზაობის ცალკე ჯგუფია წარმოდგენილი. რას მოიცავს ეს ჯგუფი? რა უნდა ისწავლოს ბავშვმა სკოლამდელ ასაკში?
სკოლამდელი მზაობის ბავშვებთან ყოველთვის განსხვავებული პროგრამა გვჭირდება, რადგან მათ მომდევნო წლის განმავლობაში დიდი ცვლილებები ელით და ჩვენგან მაქსიმალური მხარდაჭერა სჭირდებათ სოციალური და ემოციური მზაობისთვის. ჯგუფში მხოლოდ 6 ბავშვია, რაც გამოცდილ მენტორს აძლევს საშუალებას ინდივიდუალური მიდგომა ჰქონდეს თითოეულ მათგანთან. ამ ჯგუფთან სხვა დანარჩენ საინტერესო აქტივობებთან ერთად ინტენსიურადაა ჩასმული სკოლისთვის ემოციური მზაობის მიმართულება, მათ შორის: თავდაჯერებულობა, ბრაზის მართვა, მარცხთან გამკლავება, გუნდური მუშაობა და ა.შ.
ასევე ძალიან საინტერესოა თუ როგორ გავუღვიძოთ ბავშვს ინტერესი სხვადასხვა საკითხების მიმართ.
იმისთვის, რომ ბავშვს ინტერესი გაუღვივდეს რაღაც საკითხის მიმართ, მას უნდა სჯეროდეს, რომ ამას თავად გადაწტყვეტს. როგორც კი იძულებითი ფორმით ვთავაზობთ სიახლეს, აუცილებლად განიზიდავს. ზაფხული ისეთი პერიოდია, როდესაც მთელი წლის განმავლობაში დაღლილმა ბავშვმა ენერგიები უნდა აღიდგინოს და გადატვირთვა მოახერხოს. აუცილებელია ამ დროს მას მივცეთ საშუალება დაისვენოს, დაიბრუნოს ენერგიები და დაიმუხტოს დადებითად.
ჩვენთან საზაფხულოდ შექმნილი გვაქვს ძალიან არაფორმალური გარემო, სადაც ბავშვი ნამდვილად გრძნობს, რომ ზაფხულს საინტერესოდ ატარებს და არ ჰგავს სკოლის იმ ფორმატს, რომელიც დანარჩენი 9 თვის განმავლობაში ისედაც რუტინაში აქვს.
ანის სკოლის გუნდზე რომ მოგვიყვეთ.
ანის სკოლა სიყვარულით შექმნილი იდეა და საქმეა, მაგრამ არ იქნებოდა წარმატებული, რომ არა ასეთივე გულანთებული გუნდის წევრები. ჩვენს სკოლას ჰყავს უზომოდ კვალიფიციური, პროფესიონალი, მოსიყვარულე და მეგობრული მენტორები. მათი დარგის მიმართ ცოდნა და საქმის სიყვარული ქმნის ანის სკოლის ძირეულ ღირებულებებს: გვიყვარს, რასაც ვაკეთებთ, ვისთან ერთადაც ვაკეთებთ და ვისთვისაც ვაკეთებთ.
ბოლოს რომ გვითხრათ რა იყო ანის სკოლის დაფუძნებით მთავარი მიზანი და მიიღეთ თუ არა ის შედეგი რომელიც გსურდათ?
ღრმა ბავშვობიდან ვიცოდი, რომ აუცილებლად ჩემს მომავალში იარსებებდა ის, რასაც ახლა ვხედავ და რაზეც ახლა თქვენთან ვსაუბრობ. ანის სკოლა შეიქმნა საქმის განუზომელი სიყვარულით და ერთგულებით. ის ფაქტი, რომ პირველივე ნაკადის ყველა ადგილი 10 დღეში შეივსო მარწმუნებს იმაში, რომ ანის სკოლა არის ის, რაც სჭირდებათ ჩვენს პატარა მეგობრებს.
მე ვიცი, რომ ანის სკოლა თავის სიტყვას აუცილებლად იტყვის, თან ძალიან მალე.
