თბილისს საპატიო მოქალაქე ყოფილი მერი, ნიკო ლეკიშვილი გამოაკლდა. სახელმწიფოს მაღალი თანამდებობის პირი და პარლამენტის სამი მოწვევის დეპუტატი, ხანგრძლივი ავადმყოფობის შემდეგ 77 წლის ასაკში გარდაიცვალა.
OK! გთავაზობთ 2022 წლის ოქტომბრის ნომრის ინტერვიუს, სადაც ჩვენი დედაქალაქის საპატიო მოქალაქეები მათი თვალით დანახულ თბილისზე გვიამბობდნენ. მათ შორის რა საკვირველია განსაკუთრებულ ადგილს ნიკო ლეკიშვილი იკავებდა, რომელმაც თბილისისთვის მნიშვნელოვანი ისტორიის შექმნა მოახერხა.
გთავაზობთ რამდნეიმე გამორჩეულ ისტორიას და ციტატას ნიკო ლეკიშვილის თბილისური ისტორიიდან.
ნიკო ლეკიშვილი − თბილისის მერი 1995-1998 წლებში, თბილისის საპატიო მოქალაქე
„თბილისთან დაკავშირებით მახსენდება ჩემი ბავშვობის ისტორია. 12 წლის ვიყავი, ზღვიდან დავბრუნდით და ჩემი სახლის მოხატული სადარბაზო, რომელიც იყო ულამაზესი სადარბაზო პლეხანოვზე, 1800-იანი წლების ბოლოს აშენებული, დავინახე, რომ იყო გადაღებილი. ისეთი საშინელი პროტესტი გამიჩნდა, რომ მაშინვე გავიქეცი აღმასკომში, რათა გამეგო, ვინ გადაღება. რაღაცნაირად, მაშინაც ხდებოდა ხოლმე ეს, არაფრად რომ არ მიაჩნდათ რაღაცები და უკვირდათ, რატომ ვაპროტესტებდი. მიმაჩნია, რომ ზუსტად მაშინ, 12 წლის ასაკში გაჩნდა ჩემში თბილისელი.
თბილისს უნდა მოუარო, თბილისი უნდა იცოდე. მე მუდამ ფეხით დავდიოდი სამსახურში, არასოდეს მანქანით სამსახურში არ ვყოფილვარ.
თბილისმა გადაიტანა ყველაზე მძიმე პერიოდები, მაგრამ გადაიტანა. გადაიტანა თავისი თბილისელობით, ერთმანეთის გვერდში დგომით. თბილისურმა ურთიერთობებმა, სულიერმა ურთიერთობებმა გადაარჩინა თბილისი.
ეს ქალაქი ჩემთვის ყველაფერია, მე, უბრალოდ, არ შემიძლია სხვაგან ცხოვრება.
თბილისი არის ჩემი ყველაზე დიდი სიყვარული“.
