დამეთანხმებით, ალბათ, რომ ბათუმი ყველა სეზონზე განსაკუთრებულად ლამაზია. ძველი და ახალი არქიტექტურის სინთეზი, ულამაზესი ბოტანიკური ბაღი და ბულვარი წელიწადის ყველა დროს ქალაქს განსაკუთრებულ მიმზიდველობას სძენს. ქალაქის ერთ-ერთ ელიტურ უბანში წარმოდგენილი სასტუმრო NEW WAVE კი ბათუმის განსაკუთრებულობას კიდევ უფრო მეტად უსვამს ხაზს. როგორ ხვდება დაბალ სეზონს სასტუმრო და რატომ არის ბათუმში დასვენება ყველა სეზონზე კარგი იდეა, ამის შესახებ NEW WAVE-ის სასტუმროს საოპერაციო მართვის მენეჯერი, ანა თურმანიძე გვესაუბრა.
ანა, რა უპირატესობები გააჩნია დაბალ სეზონზე ბათუმში სასტუმრო NEW WAVE-ში დასვენებას?
მიმაჩნია, რომ მთავარი უპირატესობა არის სტაბილურობა, რომელიც წლის ოთხივე სეზონზე სერვისის მაღალი სტანდარტით წარმოჩნდება. NEW WAVE-ის პროფესიონალი გუნდის წევრები დაბალ თუ მაღალ სეზონზე ზრუნავენ, რომ სტუმარს შეუქმნან კომფორტული და მყუდრო გარემო, რომელიც მნიშვნელოვანია კარგი დასვენებისთვის. ზამთრის სეზონზე მაშინ, როცა ქალაქი ბათუმი შიდა აქტივობებით იტვირთება, ჩვენს სტუმრებს ვთავაზობთ როგორც სარელაქსაციო დასვენებას, ასევე სარესტორნო და ლაუნჯ ბარის საღამოებს. ვიზიტორებს საშუალება ეძლევათ, ისარგებლონ სასტუმროში არსებული ფიტნესცენტრით, კლასიკური, სპორტული, სამედიცინო თუ რელაქსმასაჟით.
ჩვენი მიზანია, სტუმარმა მაქსიმალურად მრავალფეროვანი მომსახურება ერთ სივრცეში მიიღოს. ამის დასტურად, სასტუმროში განთავსებულია სილამაზის სალონი LAKMOUSSE BEAUTY BAR, სადაც ესთეტიკურ მოვლასთან ერთად ვიზიტორები VIP კვალიფიციური სამედიცინო მომსახურებით ისარგებლებენ.
გართობის მოყვარული სტუმრებისთვის ლაუნჯსაღამოების ავტორი გახლავთ CROSS WAVE BAR, რომლის უნიკალური ინტერიერი არსებულ გარემოს დაუვიწყარს ხდის. საფირმო კოქტეილებითა და პიკანტური გემოებით გაჯერებული სნექები, მეგობრებისთვის/წყვილებისთვის საინტერესო შეკრების ადგილად იქცევა და ბათუმურ საღამოებს მეტ სიამოვნებას სძენს.
ამასთანავე, აღსანიშნავია კონკურენტუნარიანი ფასი, რომელიც წლის ნებისმიერ დროს სასტუმრო NEW WAVE-ს არსებულ ბაზარზე კიდევ უფრო მიმზიდველს ხდის, როგორც ინდივიდუალური მოგზაურებისთვის, ასევე ბიზნესპარტნიორებისთვის.
გარდა ამისა, ჩვენს სასტუმროში დაგხვდებათ ქართულ-ევროპული რესტორანი „ატლანტისი“, რომელმაც ბათუმელებისა და უცხოელი ტურისტებისთვის გამორჩეული ადგილი დაიკავა. ყოველ საღამოს სტუმრებს ვთავაზობთ ცოცხალ მუსიკას დუეტ „ჰოლიდეის“ შესრულებით, ხოლო სადღესასწაულო ღონისძიებების ორგანიზებაზე ზრუნავენ კეთილგანწყობილი და პროფესიონალი გუნდის წევრები. რესტორნის სახელწოდებიდან გამომდინარე, სტუმრებისთვის შექმნილია სპეციალური საფირმო კერძი „ატლანტისი“, რომელიც ზღვის პროდუქტების მრავალფეროვნებას წარმოადგენს, რაც ახლოა ბათუმურ გასტროტურიზმთან.
როგორ ხვდება თქვენი გუნდი დაბალ სეზონს?
დაბალ სეზონზე მთავარ მამოძრავებელ ძალას, პოტენციური მომხმარებლების მოძიების თვალსაზრისით, ასრულებს გაყიდვების დეპარტამენტი, რომელიც მუდმივად ვითარდება და სასტუმროს პოზიციონირებას წლის ოთხივე სეზონზე ამყარებს.
ამასთანავე, დაბალი სეზონი საშუალებას გვაძლევს, წლის სხვადასხვა დროს გამოვლენილი ტექნიკური ხარვეზები აღმოვფხვრათ და წლის ყველაზე აქტიურ სეზონს მაღალი სტანდარტით შევხვდეთ. სწორედ რენოვაციაზე მუდმივი ზრუნვა განაპირობებს სიახლეების დანერგვასა და უპირატესობას ბაზარზე არსებულ სასტუმროებთან.
გვესაუბრეთ სასტუმრო NEW WAVE-ის გუნდზე.
სიამაყით ვიტყვი, რომ სასტუმრო New Wave-ის გუნდი ერთ-ერთი ყველაზე პროგრესირებადი ცოცხალი ელემენტია ორგანიზაციის სტრატეგიასა და სტუმართა კომუნიკაციას შორის. ვინაიდან შრომით ბაზარზე არსებული კადრების დეფიციტი უამრავ საოპერაციო პრობლემას ქმნის, ჩვენს შემთხვევაში გუნდის მონდომება და მთელი წლის მანძილზე გადასამზადებელ-სატრენინგო პროგრამაში ჩართულობა თანამშრომელთა უნარების გაუმჯობესებასა და პროფესიონალიზმს შესაბამის მოწოდების სიმაღლეზე აყენებს. საგანმანათლებლო პროექტებში ჩართულია სასტუმროში შემავალი ყველა დეპარტამენტი, რაც სერვისს მაღალ რეიტინგს სძენს.
ტექსტი: სოფიო მალანია
ფოტო: გიორგი კალანდაძე
