რუბრიკა „OK! მენეჯერი“ წარმოგიდგენთ OK!-ისა და Georgia Today-ის მარკეტინგისა და გაყიდვების გუნდის წევრს – ნინო შერაზადიშვილს, რომელიც თავის პროფესიულ გამოცდილებასა და საქმიანობაზე გვიამბობს.
ნინო, უპირველესად გაგვეცანით.
მესამე წელია, რაც OK!-ის მარკეტინგისა და გაყიდვების გუნდს შემოვუერთდი. ამ დროის განმავლობაში, იყო ძალიან ბევრი გამოწვევა, სრულიად ახალი ტიპის პასუხისმგებლობები და ძალების მოსინჯვა იმ სფეროში, სადაც არასდროს მიფიქრია, რომ საკუთარი თავის პოვნას შევძლებდი.
საბედნიეროდ, განვლილი პერიოდი და დაგროვილი გამოცდილება მკარნახობს, რომ სწორ ადგილას ვარ და სწორ საქმეს ვარ შეჭიდებული.
ბოლო რამდენიმე თვეა, OK!-თან ერთად, საქართველოში ერთ-ერთი ყველაზე სანდო და კვალიფიციური ინგლისურენოვანი გამოცემის, Georgia Today-ის, გუნდის წევრიც გავხდი. ამ სიახლემ პასუხისმგებლობასთან ერთად, კიდევ უფრო მეტი შესაძლებლობაც მომიტანა.
თუ შეგიძლიათ აღწეროთ, რას მოიცავს თქვენი საქმიანობა ჰოლდინგში?
იმ ძირითადი ხაზის გარდა, რომელიც ბაზარზე არსებულ მსხვილ თუ შედარებით მცირე ბიზნესებთან გადაკვეთასა და თანამშრომლობას გულისხმობს, OK!-სა და GT-ის პროდუქტების მრავალფეროვნებიდან გამომდინარე, აქტივობები ხშირად სცდება სტანდარტულ თანამშრომლობას და განსხვავებულ სახეს იღებს. ჩართულები ვართ სხვადასხვა სარედაქციო პროექტის დაგეგმვასა და განხორციელებაში, ღონისძიებების გამართვაში რეგიონალურ გამოცემებში თუ სხვა აქტივობებში.
საინტერესოა თვითონ ის ფაქტი, რომ ჰოლდინგში არსებული მომსახურებები, თავისი შინაარსიდან და მრავალფეროვნებიდან გამომდინარე, გვაძლევს შესაძლებლობას გრძელვადიანად ვითანამშრომლოთ კომპანიებთან.
რა მიგაჩნიათ ყველაზე დიდი გამოწვევად თქვენს საქმიანობაში?
ვფიქრობ, ყველა სფეროში არსებობს ამა თუ იმ კომპანიისათვის დამახასიათებელი სფეციფიკური გამოწვევები იმ სტანდარტულთან ერთად, რასაც ზოგადად მოვიაზრებთ. იყო პერიოდი, როდესაც ბეჭდური მედიის გარშემო აგორებულ ძალიან მცდარ შეხედულებასთან დაპირისპირება პირადად ჩემთვის ყველაზე დიდი გამოწვევა იყო. მოსაზრება, თითქოს თანამედროვე ციფრული სამყაროს ეპოქაში ბეჭდური მედია უფრო და უფრო დაკარგავდა რელევანტობას, საბოლოო ჯამში, მცდარი აღმოჩნდა. თუმცა, აქაც მინდა ხაზი გავუსვა და აღვნიშნო, რომ ჩვენი ჰოლდინგის აქტივობები მრავალფეროვანია და ბეჭდურთან ერთად, ციფრულ სამყაროშიც თავისი განსაკუთრებული ნიშა აქვს ნაპოვნი. ამის გარდა, ზოგად გამოწვევად მიმაჩნია, საკუთარ თავსა და კომპანიაზე აღებული და დაკისრებული მოვალეობების ბოლომდე გატანა და შესრულება. ძალიან მნიშვნელოვანია ჩვენმა პარტნიორებმა იგრძნონ, თუ რამდენად ღირებული და საპასუხისმგებლოა ჩვენთვის მათთან მუშაობა, იდეების გაზიარება და საბოლოო ჯამში ხარისხიანი პროდუქტის შექმნა.
გაგვიზიარეთ სამომავლო გეგმები და მიზნები.
ჩვენი გეგმები იმ გამოწვევების მიღებასა და გადალახვაზე გადის, რასაც გუნდი ისახავს ხოლმე მიზნად. ამჟამად, მოვიაზრებთ რამდენიმე პროექტის განხორციელებას, რომლის კონტურებიც უკვე არსებობს და ძალიან მალე იხილავს დღის შუქს. ზოგადად კი, ახლაც და მომავალშიც შევეცდებით ვიყოთ სანდო, კიდევ უფრო აქტუალური და ჩვენი საქმიანობიდან გამომდინარე არ დავკარგოთ საზოგადოებისა და მკითხველის ნდობა, რომელსაც ასე ძალიან ვგრძნობთ და ვაფასებთ.
