რუბრიკა OK! მენეჯერის სტუმარი სასტუმროთა გაერთიანების დირექტორი ირმა კალანდაძეა, რომელიც უკვე მრავალი წელია ამ სფეროშია. კარიერული ნაბიჯები სტუმართან ურთიერთობის აგენტის პოზიცით დაიწყო, შესაბამისად დღევანდელ დღემდე საკმაოდ საინტერესო გზა გაიარა, რომელიც უამრავ შრომასთან და ამასთან ერთად მიზნისკენ სწრაფვასთან იყო დაკავშირებული. ბევრი რომ არ გავაგრძელოთ, ამ და სხვა საინტერესო თემებთან დაკავშირებით ჩვენი გმირი თავად გვიამბობს.
თქვენი საქმიანობის შესახებ გვიამბეთ
გახლავართ სასტუმროთა გაერთიანების დირექტორი, რომელიც აერთიანებს სამ შესანიშნავ სასტუმროს საქართველოში: „ქრაუნ პლაზა ბორჯომი”, „წყალტუბო პლაზა“ და თბილისში სასტუმრო და რესტორანი – „ჯინჯერი“. ჩვენ ვქმნით დაუვიწყარ ემოციებს როგორც ქართველი, ისე უცხოელი დამსვენებლებისთვის.
თქვენი გამოცდილების შესახებაც რომ მოგვიყვეთ. გზა, რომელიც დღევანდელ დღემდე გაიარეთ
კარიერული ნაბიჯები სტუმართან ურთიერთობის აგენტის პოზიციიდან დავიწყე. მიღება-განთავსების სფერომ იმდენად მომხიბლა, რომ ამ მიმართულებით გადავწყვიტე განვითარება და წლების განმავლობაში ვსწავლობდი და ვვითარდებოდი ამ მიმართულებით. არასდროს შემიწყვიტავს სწავლა და მეტის გაგების სურვილი, ყოველდღე ვცდილობდი, ვყოფილიყავი საკუთარი თავის უკეთესი ვერსია. მიღება-განთავსების სფერო იმდენად ყოვლისმომცველი და საინტერესო არის, რომ უფრო ფართო სპექტრზე მომცა საკუთარი შესაძლებლობების რეალიზების საშუალება, შესაბამისად მიზნად დავისახე კიდევ უფრო წინ წასვლა და გადავედი ისეთ პოზიციებზე, როგორიცაა სერვის მენეჯერი, ოპერაციების მენეჯერი, სასტუმროს მენეჯერი.
კლასტერული საოპერაციოს მართვის გამოცდილების მიღების შემდგომ დღეს მოვედი აღმასრულებელი დირექტორის პოზიციამდე, მაგრამ აქამდე უამრავი უძილო ღამე, სხვადასხვანაირი ემოცია, ჟინი და ჯანსაღი ამბიცია იყო, მაგრამ რაც ყველაზე მთავარია, იყო საკუთარი თავის რწმენის ძალა და თავდაჯერებულობა, რაც არასდროს დამიკარგავს.
როგორ ფიქრობთ, რა არის მთავარი მიზნების და შემდეგ უკვე წარმატების მისაღწევად?
წარმატების მიღწევას ბევრი ფაქტორი განაპირობებს. ვფიქრობ, უპირველესი მკაფიო ხედვის და მიზნების ქონაა. უნდა ვიცოდეთ რას ნიშნავს ჩვენთვის წარმატება, ვინაიდან მისი გაგება ყველასთვის ინდივიდუალურია. ეს სიცხადე გვეხმარება დავგეგმოთ ჩვენი ნაბიჯები ისე, რომ ახლოს მივიდეთ მიზნამდე და შემდგომ უკვე დავიპყროთ წარმატების მწვერვალები. ასევე უაღრესად მნიშვნელოვანია მოთმინება და შეუპოვრობა.
წარმატება ბევრ შრომასთან ერთად მოითხოვს გამოწვევებისა და წარუმატებლობის, მარცხის მიმართ ბრძოლისუნარიანობას. დაჟინებული სვლა მიზნისკენ, სწორედ ეს ის ქცევა და ხასიათის თვისებაა, რაც გვაძლევს საშუალებას თავი დავაღწიოთ წარუმატებლობებს, ვისწავლოთ შეცდომებზე და განვაგრძოთ წინსვლა მიზნებისკენ. ასევე თანაბრად მნიშვნელოვანია უწყვეტი სწავლა და ახალი უნარების გამომუშავების მცდელობა, შრომისმოყვარეობა და თავდადება, ადაპტაცია და მოქნილობა, სიახლისკენ სწრაფვის უნარი და ნოვატორობა, ცვლილებებისადმი სწრაფვის სურვილი, დროის ეფექტური მართვა და დისციპლინა. ეს ის ელემენტებია, რომელთა გაერთიანებით ჩვენ საგრძნობლად ვზრდით საკუთარი წარმატების მიღწევის შანსებს.
რა გაძლევთ მოტივაციას?
ადამიანი, რომელიც სტუმართმოყვარეობის ინდუსტრიაში წლებია მოღვაწეობს და რომელიც ხალხის ბიზნესში არის დასაქმებული, მოტივაციას შეიძლება ბევრი რამ აძლევდეს, რომელთაგან გამოვყოფდი რამდენიმეს: დასამახსოვრებელი გამოცდილებების შექმნა, სტუმრების დადებითი და პოზიტიური უკუკავშირი, გუნდის წარმატება და განვითარება, ინოვიაციები და კრეატიულობა, ძლიერი და ჯანსაღი ურთიერთობები სფეროში მოღვაწე პროფესიონალებთან, გამოწვევები და ზრდის შესაძლებლობები და რაც ყველაზე მთავარია, სფეროს მიმართ დაუშრეტელი სიყვარულის და ენერგიის ძალა, რაც ასე მიჯაჭვულს და გულანთებულს გხდის საკუთარ საქმეზე.
რას ურჩევდით ადამიანებს, რომლებიც ახლა იწყებენ კარიერული ნაბიჯების გადადგმას?
დაისახეთ კონკრეტული მიზნები, იყავით შეუდრეკელნი, უშიშარი, მუდმივად ეძებეთ სწავლის და განვითარების გზები, განავითარეთ თქვენი უნარები, იყავით მოქნილები და ნოვატორები, გაუფრთხილდით საკუთარ მენტალურ ჯანმრთელობას, არ შეგეშინდეთ შეცდომების დაშვების და იზრუნეთ სხვებზე. არასდროს შეგეპაროთ ეჭვი საკუთარ ძალებში, იყავით თავდაჯერებულნი და გიყვარდეთ საკუთარი თავის ის ვერსია, რომელიც ხართ იმ პირობით, რომ მეორე დღეს კიდევ უფრო უკეთესი და გაზრდილი იქნებით.
სამომავლო გეგმები გაგვიზიარეთ
წინ უამრავი გეგმა და გამოწვევაა, რომელსაც დიდი აღტაცებით ველი. მჯერა, მიუხედავად კიდევ ბევრი სირთულისა, ჩემს სათქმელს საკუთარი თავის წინაშე არაერთხელ ვიტყვი, – რომ ვარ ძლიერი ლიდერი ქალი, რომელმაც შეუძლებელი შეძლო თავისი შრომითა და თავდადებით.
