რუბრიკა OK!მენეჯერის სტუმარი “ალტას” მარკეტინგისა და გაყიდვების დირექტორი ნოკა ბაინდურაშვილია, რომელმაც სულ ახლახან დაიკავა ეს პოზიცია. 20 წელზე მეტია რითეილ ინდუსტრიაში, მარკეტინგისა და სტრატეგიული კომუნიკაციების მიმართულებით მუშაობს. ამჯერად ახალი გეგმებითა და მიზნებით “ალტას” გუნდს შეუერთდა, რის შესახებაც უფრო ვრცლად ინტერვიუში წაიკითხავთ.
ნოკა, როგორც ცნობილია, შეუერთდით “ალტას” გუნდს. გვიამბეთ ამ გამოწვევის შესახებ.
დიახ, მე გავხდი „ალტას“ შესანიშნავი გუნდის წევრი, კომპანიას მნიშვნელოვანი და დიდი გეგმები აქვს, სწორედ ამან განაპირობა ჩემი გადაწყვეტილება მიმეღო ეს გამოწვევა და გადამენაცვლა ტექნიკის ინდუსტრიაში. ამ სექტორს საკმაოდ დიდი მიზიდულობა აქვს, თან როდესაც გეძლევა შესაძლებლობა იმუშაო მუდმივად განახლებლად და სწრაფად მზარდ ინდუსტრიაში, ნამდვილად მნიშვნელოვანია. დარგის მუდმივი განვითარება არ გაძლევს მოდუნების საშუალებას, რაც ნებისმიერი ადამიანისთვის მეტი მოტივაციის მიმცემია. დარგთან ერთად მუდმივად განვითარებაზე და ცვლილებებზე ორიენტირებული უნდა იყო და არა მხოლოდ, ხანდახან უნდა გაასწრო კიდეც მათ.
როგორია თქვენი გეგმები? რა სახის პროექტების განხორციელებას გეგმავთ სამომავლოდ? –
ჩვენი მიზანია ხელმისაწვდომი გავხადოთ თანამედროვე და ინოვაციური ტექნოლოგიები ქართველი მომხმარებლისთვის, ამასთანავე შევქმნათ ყიდვის საუკეთესო გამოცდილება, სწორედ ამ მიმართულებით გვაქვს ორიენტირი. კომპანია პროფესიონალიზმითა და თანამედროვე ტექნოლოგიების დანერგვით, მომსახურების უმაღლესი სტანდარტის შექმნაზე და საუკეთესო სამომხმარებლო გამოცდილების განვითარებაზეა ორიენტირებული. ამასთანავე ვგეგმავთ ელ. კომერციის მიმართულებით ახალ პროექტებს, რომელებსაც მალე გავაცნობთ საზოგადოებას.
ტექნოლოგიები მუდმივად ვითარდება და ამარტივებს ჩვენს ყოველდღიურობას, “ალტა” არჩევს საუკეთესო და მოწინავე ტექნოლოგიურ გადაწყვეტებს და ხელმისაწვდომს ხდის მომხმარებლისთვის.
თქვენი გამოცდილების შესახებაც რომ მოგვიყვეთ. ის, რაც აქამდე გაიარეთ.
20 წელზე მეტია მარკეტინგისა და სტრატეგიული კომუნიკაციების მიმართულებით ვმუშაობ, ძირითადად რითეილ ინდუსტრიაში. ჩემი კარიერის თითოეულ ეტაპზე იყო მნიშვნელოვანი გამოწვევები, პროექტები და გეგმები, რამაც გამზარდა და დიდი გამოცდილება შემძინა. ყველა ბიზნესს აქვს სპეციფიური და დარგობრივი განმასხვავებლები, რაც მეტად საინტერესოს ხდის თითოეულ მათგანს.
რას ურჩევდით ადამიანებს, რომლებიც ახლა იწყებენ გარკვეული ნაბიჯების გადადგმას და სურთ მარკეტინგისა და PR-ის სფეროში მოღვაწეობა?
არასდროს დაკმაყოფილდნენ მიღწეული შედეგებით და ყოველთვის იფიქრონ ჩარჩოებს მიღმა.
როგორ ფიქრობთ, რა არის ის მთავარი, რაც პირადად თქვენ კარიერულ წინსვლაში გეხმარებათ?
საქმისადმი სიყვარული, თავდაუზოგავი შრომა, თვითგანვითარებაზე ზრუნვა, რაც არ გვაძლევს მოდუნების საშუალებას.
