„საქართველოს ფოსტის“ ინიციატივითა და აჭარის ავტონომიური რესპუბლიკის ტურიზმისა და კურორტების დეპარტამენტის მხარდაჭერით, მხარეებს შორის ურთიერთთანამშრომლობის მემორანდუმი გაფორმდა.
საქართველოს ტურისტული პოტენციალის ჯეროვნად წარმოჩენისა და ხელშეწყობის მიზნით, მემორანდუმით გათვალისწინებული პირველი ღონისძიება გულისხმობს, დეპარტამენტის მხრიდან ფოსტისთვის საქართველოს, კერძოდ კი აჭარის რეგიონის ღირსშესანიშნაობების ამსახველი ფოტომასალის გადაცემასა და სარგებლობის უფლების მინიჭებას. აღნიშნულიდან გამომდინარე, აგვისტოს თვიდან „საქართველოს ფოსტის“ რიგ სერვისცენტრებში, სარეალიზაციოდ გადაეცემა აჭარის თვალწარმტაცი ვიზუალის ამსახველი საფოსტო ბარათები.
ასევე, მნიშვნელოვანია, რომ „საქართველოს ფოსტა“ მზად არის ითანამშრომლოსნებისმიერ დამწყებ თუ პროფესიონალ ფოტოგრაფთან, მათი ნამუშევრების საფოსტო ბარათებზე დატანების პოზიციონირების მიმართულებით. აღნიშნული ინიციატივიდან გამომდინარე, „საქართველოს ფოსტა“ სექტემბრის თვეში აამოქმედებს კამპანიას, რომლის მთავარი მიზანი იქნება საქართველოს პოპულარიზაციის გარდა, ქართველი ფოტოგრაფების ცნობადობის ამაღლება.
„საქართველოს ფოსტა“ საქართველოს უმსხვილესი ეროვნული საფოსტო ოპერატორია, რომელიც გამოირჩევა როგორც მომსახურების დიდი არჩევანით, ასევე სერვისცენტრების ყველაზე ფართო ქსელით. „საქართველოს ფოსტა“ მთელი ქვეყნის მასშტაბით 81 სერვისცენტრით არის წარმოდგენილი. კერძოდ, აჭარაში 7 სერვისცენტრი ოპერირებს. „საქართველოს ფოსტის“ მიზანია, მომხმარებელი უზრუნველყოს უნივერსალური საფოსტო მომსახურების სფეროში შემავალი სერვისებით.
