ბოლო ხანებში ბევრგან შემხვდა წერითი თერაპიის პრაქტიკა.
აი, ასე – დაჯდები და წერ ხელით, პასტით, ფურცელზე. წერ რასაც გინდა, არავისთვის – საკუთარი თავისთვის. წერ ყველაფერს – რაც აზრად მოგდის. მერე რა ხდება არ ვიცი, ამაზე თერაპევტებთან ისაუბრეთ, მაგრამ მე ძალიან მომეწონა ფურცელსა და პასტასთან დაბრუნების ამბავი.
დიახ, ეს ნამდვილად დაგეხმარებათ, დაალაგოთ გონება, ფიქრები. ის აბდაუბდა, რაც სიტყვებად იკინძება და მყარად გადადის ქაღალდზე, ნამდვილად მაგიურია. აბა, დაფიქრდით – მეილის ან მესიჯის მიწერა იოლია, იქვე ემოჯისაც დასვამთ, უეცრად შეიძლება რაღაც მოხდეს და წაიშალოს, გაქრეს, დაიკარგოს…
ფურცელი სხვა მაგიაა, სხვა ემოციაა. შეგეშალათ? არა უშავს, გადახაზეთ, ისევ დაწერეთ, მერე შეინახეთ და ხელახლა წაიკითხეთ. ეს თქვენი ხელწერაა, ეს თქვენი ანაბეჭდია, ეს თქვენი შექმნილია და არა რომელიღაც ციფრული პლატფორმის.
ძალიან პრაქტიკულია ელექტრონული წიგნებიც, მაგრამ ნამდვილი წიგნის შავ-თეთრი ფურცლები საერთოდ სხვა სამყაროში მამოგზაურებს. ის სუნი, ფაქტურა, სიტყვებში ჩამალული აზრები – სულ სხვანაირად იშლება და ისიც, რომ ფანქრით რაღაცას მონიშნავ, მიაწერ – თითქოს დიალოგში შედიხარ ავტორთან ან პერსონაჟთან.
ჯერ არ გიქნიათ? სცადეთ. თავიდან ძნელია, თითქოს სიარულს ახლა იწყებ, მერე მიდიხარ, მერე მიფრინავ და რომ დასრულდება ამბავი, თვალებს ხუჭავ და სხვაზე ვერაფერზე ფიქრობ. დამიჯერეთ, საოცარი რამაა. სხვა აზროვნებაა, სხვა განზომილებაა. სიტყვის სამსახურში დგებით, სიტყვის, რომელიც გაიძულებთ, თავად ჩამოაყალიბოთ აზრი და სხვისი აზრების ტყვეობაში არ დარჩეთ.
სიტყვის, რომელიც ყველაფერს მოიცავს. იმ სიტყვის, რომელიც სამყაროს ქმნის.
„პირველად იყო სიტყვა. სიტყუაი იგი იყო ღმრთისა თანა და ღმერთი იყო სიტყუაი იგი“.
სიყვარულით,
მაიკო წერეთელი
ჟურნალ OK!-ის მთავარი რედაქტორი
რედაქტორის არჩევანი
გაბრიელ გარსია მარკესი
„შევხვდებით აგვისტოში“
„ზოგჯერ წიგნებსაც სჭირდებათ დასვენება“, – ფიქრი გაანდო გაბრიელ გარსია მარკესმა თავის თანაშემწეს, მონიკა ალონსოს. ეს ამბავი 2004 წელს. გაბოს ერთგული მკითხველი მისგან გარდაცვალების შემდგომ საჩუქარს. წიგნის გამოქვეყნებას დიდი აჟიოტაჟი მოჰყვა.
ეს წიგნი მაგიური რეალიზმის გამორჩეული ნიმუშია – ამბავი შუახნის დაოჯახებულ ქალზე, ნაწარმოები ერთგვარი ოდაა სიცოცხლეზე, რომელშიც ქალის ბედნიერებისა და სიამოვნების სურვილი დროის სვლას არ ემორჩილება.
მარია რესა
„როგორ დავამარცხოთ დიქტატორი“
რატომ სუსტდება დემოკრატია? რატომ გახდა რთული სიყალბესთან, დეზინფორმაციასა და პროპაგანდასთან დაპირისპირება? გააძლიერა თუ არა სოციალურმა ქსელებმა და ციფრულმა პლატფორმებმა ავტოკრატიული რეჟიმები? – მარია რესა ამ კითხვებზე უაღრესად საინტერესო პასუხებს გვთავაზობს.
