#OK! “მოუთმენელი ადამიანი ვარ, ყოველთვის ვაკონტროლებ ჩემს დროს, სწორედ ამიტომ, ერთდროულად ბევრი საქმის გაკეთება შემიძლია“ – ჯარედ ლეტო

ჯარედ ლეტომ გასული წლების განმავლობაში მაყურებელს თავი არაერთი შესანიშნავი
პერსონაჟით დაამახსოვრა, თუმცა ის ამჯერად საზოგადოების წინაშე ყველაზე განსხვავებული
როლით წარსდგა. ოსკაროსანმა მსახიობმა „მარველის“ კომიქსის მიხედვით შექმნილი პერსონაჟი
მაიკლ მორბიუსი განასახიერა, ადამიანი, რომელიც ადამიანი ობობას კომიქსების ერთ-ერთი
მთავარი პერსონაჟია. მაიკლი არის მეცნიერი, რომელიც გადაიქცევა ვამპირად, როდესაც ცდილობს
იპოვოს გზა დაავადების განსაკურნებლად.

„ამ როლში ყველაზე მეტად მომეწონა ის, რომ მომეცა დიდ ეკრანზე პერსონაჟის გაცოცხლების
შესაძლებლობა. ძალიან რთულია მაყურებელს თავი საკულტო პერფორმანსით დაამახსოვრო,
რადგან ხშირად ყველასათვის საყვარელი პერსონაჟები სხვადასხვა ფილმში, სხვადასხვა
მსახიობის ინტერპრეტაციით ყალიბდება. მაიკლ მორბიუსი საკუთარი ისტორიით დიდ ეკრანზე
აქამდე არასდროს გამოჩენილა, შესაბამისად მისი როლის მორგება ჩემთვის ძალიან საინტერესო
აღმოჩნდა, მადლობა „მარველს“, რომ ამ პერსონაჟის ჩემებურად ჩამოყალიბების საშუალება
მომცა“.

რამდენად რთული იყო თქვენთვის აღნიშნულ როლზე მუშაობა, რადგან, როგორც აღნიშნეთ,
მაიკლ მორბიუსი დიდ ეკრანზე საკუთარი ისტორიით პირველად გამოჩნდა.

„მუშაობა ნამდვილად არ გამჭირვებია, არც როლში შესვლა. ვამპირები ყოველთვის ძალიან
მიყვარდა (იცინის), ერთ-ერთი პირველი ფილმი, რომელიც ამ ჟანრში ვნახე იყო შავ-თეთრი
დრაკულა, ასე რომ ეს მიმდინარეობა ყოველთვის მომწონდა.“

„კიდევ ერთი მიზეზი, რატომაც ამ ფილმში მონაწილეობას დავთანხმდი იყო სურვილი მქონოდა
განსხვავებული გამოცდილება. ტრანსფორმაცია მეხმარება ვიყო უკეთესი მსახიობი. გადასაღებ
მოედანზე ყოველთვის ძალიან ბევრს ვსწავლობ, სიახლე მნიშვნელოვანია. მე კი
გამოწვევებისთვის ყოველთვის მზად ვარ. არასდროს მინანია გარისკვა“.

რითი განსხვავდება მაიკლ მორბიუსი სხვა პერსონაჟებისგან, რომლებიც აქამდე გითამაშიათ?

„მორბიუსი საკმაოდ კომპლექსური პერსონაჟია. ის არის ადამიანი, რომლის ცხოვრებაშიც ძალიან
ბევრი პრობლემა და კონფლიქტია. ის არის ბიჭი, რომელსაც სჭირს საშინელი დაავადება და
აინტერესებს მეცნიერება, მან საკუთარი ცხოვრება ამ დაავადების მკურნალობას მიუძღვნა, უცებ
კი მისი ცხოვრება რადიკალურად შეიცვალა, ის აანალიზებს, რომ აქვს ძალა, რომელიც მანამდე
არასდროს უგრძვნია“.

„იყო მომენტები, როდესაც როლში იმდენად შევდიოდი, რომ გამოსვლა მიჭირდა. მე ვისწავლე
მეპოვნა გზა მოსადუნებლად, მედიტაცია მეხმარება მუშაობის პროცესში და მაძლევს ძალას,
მქონდეს შინაგანი სიმშვიდე, როდესაც ვარ დაღლილი და არ შემიძლია ნორმალურად
ფუნქციონირება გადატვირთული სამუშაო გრაფიკის შემდეგაც კი“.

რამდენიმე თვის წინ 50 წლის გახდით. ხშირად გულშემატკივრები ხუმრობით „ვამპირს“
გეძახიან, რადგან არ აქვს მნიშვნელობა რამდენიმე წელი გადის, თქვენ ყოველთვის შესანიშნავად
გამოიყურებით. რა არის თქვენი საიდუმლო?

„არ ვიცი, ალბათ გენეტიკა, დედაჩემი ჩემს ასაკში ყოველთვის კარგად გამოიყურებოდა, ხალხი
ხშირად საუბრობს ჩემს ასაკზე. სამწუხაროა, რომ არ ვიღებ უფრო მეტ როლს, სადაც შედარებით
პატარა ასაკის პერსონაჟს განვასახიერებ. ალბათ, არ ვიყენებ შესაძლებლობებს ჩემს
სასარგებლოდ, თუმცა ამას რა მნიშვნელობა აქვს… ჩემი აზრით, მთავარი რამ, რაც ადამიანს
ახალგაზრდულობას უნარჩუნებს არის ცხოვრებაზე წარმოდგენა, აზროვნება, პოზიტიურობა და
ადამიანებისადმი კარგი დამოკიდებულება.“

ხშირად აღნიშნავთ, რომ ყოველთვის ყველაფერს აკეთებთ მიზნის მისაღწევად, რას ურჩევდით
დამწყებ მსხიობებს, ან თუნდაც თქვენს გულშემატკივრებს, რომლებსაც სურთ მომავალში
დაიწყონ სამსახიობო საქმიანობა?

„მე მოუთმენელი ადამიანი ვარ და ყოველთვის ვაკონტროლებ ჩემს დროს. სწორედ ამიტომ,
ერთდროულად ბევრი საქმის გაკეთება შემიძლია, რაც ჩემი მიზნების მიღწევაში ყოველთვის
მეხმარება. ამგვარი აზროვნება გასულ წლებში არ მქონდა, ყოველთვის ვიცოდი, რომ როდესაც
ერთ რამეზე ვიტყოდი კის, მეორეზე უარის თქმა მომიწევდა“.

„თუ გინდათ, რომ რაღაცას მიაღწიოთ, მაშინ გეტყვით ისეთ რაღაცას, რაც შეიძლება მოსასმენად
სასიამოვნო სულაც არ იყოს. მე ძალიან ბევრს ვშრომობდი, თავდაუზოგავად ვმუშაობდი, რომ
მიზნისთვის მიმეღწია, მაგრამ ყოველთვის არსებობდა საფასური, რომელიც უნდა გადამეხადა.
თქვენ აუცილებლად მოგიწევთ რაღაცის დათმობა, მთავარია იცოდეთ, ღირს თუ არა ეს
ყველაფერი ამად“.

თქვენი პერსონალური სტილი ძალიან ბევრს ამბობს თქვენს პიროვნებაზე. როგორც ხშირად
ახსენებთ, მოდა არ არის მხოლოდ „ჩაცმის ხელოვნება“, ეს უფრო პირადული რამაა. როგორ
აყალიბებთ თქვენს საკულტო სტილს და რა ხდება თქვენთვის ინსპირაციის წყარო?

„სტილი ჩემთვის ძალიან პერსონალურია, ის უფრო მეტია, ვიდრე უბრალოდ სამოსი, რაც
ადამიანებს გვაცვია. გარშემო ძალიან ცოტა ადამიანია, რომლებზეც მართლა ვფიქრობ, რომ
კარგად აცვიათ. არა იმიტომ, რომ მათი სამოსი კარგი არაა, უბრალოდ ის მათ პიროვნებებთან
ახლოს საერთოდ არაა. სამოსი ადამიანების ენერგიას და მათ შემართებას უნდა უხდებოდეს“.

„ჩემი სტილი დამოკიდებულია ჩემს ხასიათზე და იმაზე, თუ რას ვაკეთებ, წლების გასვლის
შემდეგაც კი ალბათ მხოლოდ რამდენიმე ჩაცმულობა თუ მოიძებნება, რომელთა ჩაცმასაც ვნანობ,
თუმცა კონკრეტულად ახლა არც ერთი არ მახსენდება“.

„პაოლო გუჩის შესანიშნავი სტილი ჰქონდა, სწორედ ამიტომ გამიხარდა როდესაც მისი როლის
შესრულების პატივი მხვდა წილად. მას ჰქონდა წარმოუდგენლად ორიგინალური ხედვა,
განსხვავებული ფორმების, ფერებისა და ნიმუშების შერწყმის, რაც მის ხედვას კიდევ უფრო
უნიკალურს ხდიდა“.

თქვენს სტილს ხშირად ადარებენ ალესანდრო მიკელეს, რომელთანაც მრავალწლიანი საქმიანი,
ასევე მეგობრული ურთიერთობა გაკავშირებთ. რა არის ის კონკრეტული მახასიათებლები, რაც
თქვენსა და ალესანდროს სტილს აერთიანებს?

„პირველ რიგში, ალესანდრო ჩემი ძალიან დიდი ხნის და ძალიან ძვირფასი მეგობარია, ჩვენ
ძალიან ბევრი საერთო გვაქვს. თითქმის ერთი და იგივე ასაკის ვართ, მსგავსი შემოქმედებითი
მისწრაფებები გვაქვს, ვგიჟდებით ჩვენს საქმეზე და ყველაფერს ვაკეთებთ მიზნების მისაღწევად.
ერთ-ერთი ყველაზე დადებითი თვისება, რაც ალესანდროს გააჩნია, არის სიმშვიდე, მას

პრეტენზია არასდროს არაფერზე აქვს. ის ძალიან თავმდაბალი ადამიანია, რომელიც ყოველთვის
მადლიერია. არ აქვს მნიშვნელობა ჩვენ საქმიან შეხვედრაზე ვართ თუ უბრალოდ ვისვენებთ
ერთად, მასთან დროის გატარება ყოველთვის სასიამოვნოა“.