კვება რომ ჯანსაღი ცხოვრების ერთ-ერთი უმთავრესი ასპექტია, ამაზე ყველა ვთანხმდებით. კერძების მომზადება კი ძალიან დიდი სიამოვნებაა. სწორედ ამიტომ ჩვენმა რესპონდენტმა გადაწყვიტა შეექმნა ბლოგი – gvantsas_cookbook და საკუთარი აუდიტორიისთვის გაეზიარებინა მის მიერ მომზადებული კერძები, ულამაზესი სერვირებითა და მადისაღმძვრელი გემოებით. მაშ ასე, გთავაზობთ ინტერვიუს ბლოგერ გვანცა მაჩაიძესთან.
გვანცა, უპირველესად გაგვეცანით.
პირველ ყოვლისა, მივესალმები თქვენს მკითხველს. მე ვარ გვანცა, პროფესიით ფინანსისტი, თუმცა ამ განხრით არასდროს მიმუშავია, ასევე დამთავრებული მაქვს კინოსარეჟისორო ფაკულტეტი, ბოლოს კი გავიარე მარკეტინგული კურსებიც. საყვარელი საქმის ძიებას წლები მოვანდომე, დღეს კი, ვმუშაობ იქ, სადაც ყველაზე კომფორტულად ვგრძნობ თავს და ამ წლების განმავლობაში მიღებული ცოდნა მეხმარება უკეთ მოვახდინო საკუთარი თავის რეალიზაცია.
რამდენი ხანია რაც კულინარიით დაინტერესდით და როდის შექმენით თქვენი ბლოგი – gvantsas_cookbook?
ბავშვობიდან მაინტერესებდა კულინარია. ჯერ კიდევ 13 წლის ასაკში გავაკეთე პირველად ხინკალი. შექებამ იმხელა სტიმული მომცა, მას შემდეგ სიამოვნებით დავიწყე საჭმელების დამოუკიდებლად მომზადება.
ბევრმა პანდემიის დროს დაიწყო ბლოგერობა და საკმაოდ წარმატებულიც გამოდგა, მე კი ორსულობაში გადავწყვიტე შემექმნა ჩემი ბლოგი. ძალიან მაბედნიერებს ჩემებური ვარიაციებით მომზადებული კერძების გაზიარება, ასევე ძალიან მომწონს სერვირება და გადაღება.
რა არის თქვენი ბლოგის ძირითადი მიმართულება?
ჩემი, როგორც დამწყები ბლოგერისთვის, მიმართულება კონკრეტულად არ ამირჩევია, რადგან ვფიქრობ მრავალფეროვანი კერძები სხვადასხვა გემოვნების ადამიანებს მიიზიდავს. უფრო მეტად კი ჩემი ინტერპრეტაციით მომზადებული კერძების რეცეპტები მინდა გავუზიარო.
რა მნიშვნელობა აქვს კვებას ადამიანის ჯანმრთელობაზე?
„თქვენ ხართ ის, რასაც მიირთმევთ“ − ეს ცნობილი გამოთქმა იმის დასაბუთებაა, რომ კვება ჩვენი ცხოვრების უმნიშვნელოვანესი ნაწილია.
ვფიქრობ, ჯანსაღი კვება თქვენს ორგანიზმს ჰარმონიზებაში ეხმარება და ეს არ გულისხმობს მკაცრ დიეტებს, რაც უფრო ხშირად ერევათ ხოლმე.
ჯანსაღი კვება მოიცავს:
- ხილი
- ბოსტნეული
- მარცვლეული, მათ შორის − პურეული
- თხილეული
- ხორცი
- თევზეული
- რძის ნაწარმი
ასე რომ, დაბალანსებული კვება აუცილებელია თქვენი ჯანმრთელობისთვის.
რა არის თქვენი სამომავლო მიზანი?
ჩემი მიზანია რაც შეიძლება ბევრი ადამიანის გული მოვიგო. მათი ყურადღება ძალიან მსიამოვნებს და მეხმარება მოტივაციაში, ვცდილობ ისეთი კერძები შევთავაზო, რისი მომზადებაც ძალიან მარტივია.
როგორ ფიქრობთ, რა გამოარჩევს თქვენს ბლოგს და რა სძენს უპირატესობას?
ვფიქრობ ჩემს სათქმელს სერვირებით გადმოვცემ ხოლმე. ძალიან მრავალფეროვანი ბლოგი მაქვს, რამდენად გამომარჩევს სხვისგან, ეს სხვა თემაა, თუმცა როდესაც თავად მოგწონს საკუთარი ნაშრომი, არ მგონია ვინმემ გულგრილად დატოვოს ის. ფერადოვნება და სიხალასეც ეტყობა ჩემს გვერდს და ეს ძალიან მაბედნიერებს.
ბოლოს, თქვენი სამომავლო გეგმები გაგვიზიარეთ.
მინდა ჩემი ბლოგით ადამიანებს გადმოვცე საკუთარი სათქმელი. ის, რომ ყველაფერი მარტივი გენიალური და ლამაზია. სამომავლოდ კი არაფერს ვგეგმავ, რადგან მომავალში არ ვიცი, რა მომანიჭებს ბედნიერებას. ასე, უბრალოდ მივყვები ჩემს ბედნიერებას…
