ადამიანის, ბუნებისა და არქიტექტურის ერთ კომპოზიციად შეკვრა.
ფრენკ ლოიდ რაიტს იხსენიებენ, როგორც ყველა დროის უდიდეს ამერიკელ არქიტექტორს. თავისი ხანგრძლივი და ნაყოფიერი კარიერის განმავლობაში ფრენკ ლოიდ რაიტმა ამერიკული არქიტექტურა წინა პლანზე წამოსწია. მის შემოქმედებაზე დიდი გავლენა მოახდინა ბუნებრივმა სამყარომ. გარდა ამისა, რაიტი აქტიურად იყო ჩართული შენობების ინტერიერში, ქმნიდა ავეჯს, ასევე ვიტრაჟებს, საერთო დიზაინის გასაუმჯობესებლად.
ორგანული არქიტექტურის ფუძემდებლის შემოქმედებაში 1100-ზე მეტი შენობის პროექტია, რომელთაგან მხოლოდ 532 აიგო.
ფრენკ ლოიდ რაიტი დაიბადა 1867 წლის 8 ივნისს რიჩლენდ-ცენტრში, ვისში. მისი ადრეული ბავშვობა მომთაბარე იყო, რადგან მამამისი მოგზაურობდა ერთი ადგილიდან მეორეში.18 წლის ფრენკ ლოიდ რაიტი ოჯახის დასახმარებლად ვისკონსინის უნივერსიტეტის ინჟინერიის განყოფილების დეკანთან მუშაობდა, ამავე დროს უნივერსიტეტში სწავლობდა. თუმცა მან იცოდა, რომ არქიტექტორი უნდა გამხდარიყო. 1893 წლის შემდეგ ის უკვე საკუთარ სტუდიოს ხსნის და ამბობს ახალ სიტყვას არქიტექტურაში.
„აქამდე, რასაც ჩვენ არქიტექტურას ვუწოდებდით, ყალბი იყო, იმ გაგებით, რომ არ გახლდათ ორგანული და არ ატარებდა ბუნების ხასიათს. მე კი ხაზს ვუსვამ სიტყვას „ბუნება“, რომელიც საკუთარ ეკლესიად ვაქციე“.
ორგანული არქიტექტურა ფილოსოფიაა, რომელიც მიზნად არქიტექტურისა და ანთროპოგენური გარემოს ბუნებასთან ჰარმონიზებას ისახავს. არქიტექტურული ხედვისა და პროფესიული ცხოვრების წესია და არა სტილი, რომელიც მოიაზრებს ლანდშაფტთან სრულ შერწყმას − იმდენად, რომ მოცულობა და ბუნება ერთ კომპოზიციად უნდა აღიქმებოდეს.
„ნაგებობა ისე უნდა გამოიყურებოდეს, თითქოს ბუნებრივად ამოვიდა მის ადგილას. იგი უნდა ერწყმოდეს საკუთარ გარემოცვას“, – ამბობდა რაიტი.
ამ ყველაფერს სიტყვებზე უკეთ რაიტი გადმოსცემს თავისი შემოქმედებით, თუ როგორ სჭირდება ადამიანს ბუნებისა და არქიტექტურის შერწყმა. ამის დასტურად რაიტის Fallingwater-ის მაგალითად მოყვანაც კი კმარა.
1934 წელს რაიტმა გაიცნო კაუფმანების ოჯახი, რომლებმაც მას საზაფხულო აგარაკი დაუკვეთეს. ფრენკ ლოიდ რაიტმა თავისი კარიერის ისტორიაში შექმნა ყველაზე ინოვაციური და მნიშვნელოვანი შენობა. რაიტმა მისი დადგმა ზუსტად ჩანჩქერის გვერდით გადაწყვიტა, რადგან ასე უფრო დაამყარებდა კავშირს სახლსა და ბუნებას შორის.
SOLOMON R. GUGGENHEIM MUSEUM
რაიტი ამ პროექტზე 16 წელი მუშაობდა. ორგანული არქიტექტურის პრინციპების გამოყენებით, შენობის დიზაინი ნიჟარის სპირალზეა დაფუძნებული. რაიტის ყველაზე ცნობილი შენობა მისთვის უკანასკნელიც აღმოჩნდა. გუგენჰაიმის მუზეუმის სახელით ცნობილი შენობა ნიუ იორკში 50 წლის წინ გაიხსნა, არქიტექტორის გარდაცვალებიდან 6 თვის შემდეგ. თავდაპირველად შენობის დიზაინმა მწვავე კრიტიკა დაიმსახურა, რადგან იმ დროისთვის ასეთი ფორმები უცხო იყო, თუმცა დროთა განმავლობაში შენობა უკვდავ ბრენდად იქცა.
