OK! პირადად გაესაუბრა ქართველ ექიმ-დერმატო-კოსმეტოლოგ ელისო ჯიშკარიანს. მან ინტერვიუში დეტალურად ისაუბრა იმ პროცედურების შესახებ, რომლებსაც ის პაციენტებს სთავაზობს. ელისო მუდმივად ცდილობს ახალი ცოდნისა და გამოცდილების მიღებას, რითაც ინოვაციური მეთოდების პრაქტიკაში გამოყენებას უწყობს ხელს დერმატო-კოსმეტოლოგიის მიმართულებით.
გვიამბეთ თქვენ შესახებ.
დავიბადე ქალაქ ქუთაისში, 1975 წლის 24 აგვისტოს. დავამთავრე მედიცინის ფაკულტეტი და უკვე 25 წელია ვმუშაობ ჩემს ქალაქში. სკოლის დასრულების შემდეგ, ჩემს მთავარ მიზნად საკუთარი თავის რეალიზაცია იქცა. მჭირდებოდა კარგად გავთვითცნობიერებულიყავი იმაში, თუ რომელი პროფესია ამერჩია. ჩემი საბოლოო გადაწყვეტილება კი ნამდვილად სწორი და ხელსაყრელი აღმოჩნდა. თავდაპირველად, 13 წლის განმავლობაში ვსაქმიანობდი ქუთაისში, იმ დროისთვის პრესტიჟულ სალონში. ამ დროში შევიძინე ბევრი ერთგული პაციენტი, რომელმაც მომცა მოტივაცია შემექმნა ესთეტიკის საკუთარი ცენტრი, სადაც ყველა ქალბატონი მიიღებდა მაქსიმალურ კომფორტს, პროფესიონალიზმთან ერთად. სწორედ ამიტომ, 2011 წელს მე და ჩემმა კოლეგამ გადავწყვიტეთ გაგვეხსნა აღნიშნული სივრცე, რომელშიც გაერთიანებულია თმის, ფრჩხილის, მასაჟის, კოსმეტოლოგიის, ესთეტიკური მედიცინისა და ლაზეროთერაპიის მომსახურება. სწორედ ასე დაარსდა ესთეტიკის ცენტრი „ელიზიუმი“. იმისათვის, რომ მიმეღწია სასურველი შედეგისთვის, დამჭირდა დიდი შრომა და გამოცდილების მიღება. ვმონაწილეობდი საზღვარგარეთ გამართულ არაერთ ტრენინგში, როგორც პირადი საქმიანობის, ისე ბიზნესის მართვის კუთხით. შევკრიბეთ და გადავამზადეთ თანამშრომლები, დღესდღეობით კი „ელიზიუმი“ ქალაქში ყველასათვის განსაკუთრებულ ადგილად იქცა, რომლის არა მარტო პროფესიონალიზმი, არამედ მომსახურების ხარისხი წარუშლელ შთაბეჭდილებას ტოვებს თითოეულ მომხმარებელზე.
გვესაუბრეთ თქვენი საქმიანობის შესახებ.
რაც შეეხება ჩემს საქმიანობას, უკვე 23 წელია კოსმეტოლოგიის, 13 წელი კი ესთეტიკური მედიცინის მიმართულებით ვმუშაობ. მიყვარს ინდივიდუალური მიდგომა და ბუნებრივობის მაქსიმალურად შენარჩუნება პაციენტებთან. იმ რთულ პერიოდში, როდესაც ინიექციის შესწავლა დავიწყე, საქართველოში იშვიათად ტარდებოდა ტრენინგები, ამიტომ მიწევდა საზღვარგარეთ ხშირი მოგზაურობა, რათა ცოდნა გამეღრმავებინა. შესაბამისად, ყოველივე ეს ძალიან რთული აღმოჩნდა ჩემთვის, თუმცა დაუღალავმა შრომამ და მიზნისკენ სწრაფვის სურვილმა, დანებების საშუალება არ მომცა. გავიარე არაერთი ტრენინგი საფრანგეთში, ისრაელში, შვეიცარიასა და რუსეთში, სადაც ვისწავლე როგორც პროცედურების ჩატარება, ისე მისი გვერდითი ეფექტები.
რა სახის პროცედურებს სთავაზობთ პაციენტებს?
პაციენტებს ვთავაზობთ შემდეგ პროცედურებს:
- სახის კონტურული პლასტიკა
- ტუჩის აუგმენტაცია
- ცხვირის არაქირურგიული რინოპლასტიკა
- ცხვირ-ტუჩის ნაოჭის კორექცია
- ყვრიმალების, ნიკაპის, ყბების კორექცია შემავსებლით
- ბოტულინოტოქსინი
- ძაფები
- ლიპოლიტიკი (ცხიმის დამშლელი)
- მეზოთერაპია
- ბიორევიტალიზაცია
- პლაზმოლიფტინგი
- აკნეს მკურნალობა (სახის ღრმა წმენდა, პილინგი…)
- უსისხლო ბლეფაროპლასტიკა − ტარდება ქირურგიული ჩარევის გარეშე აპარატ Plasma Bt-ით, მცირდება თვალის ზედა და ქვედა ქუთუთოები, ხდება გადაჭიმვა, ნაოჭების შემცირება)
- პიგმენტაციის მკურნალობა
- თმის ცვენის მკურნალობა
- ULF-Therapy (არაქირურგიული მეთოდით კანის გადაჭიმვა)
- RF-ლიფტინგი
- პაპილომების, კელოიდების, ნაწიბურების, ნაიარევების მოშორება
აღსანიშნავია ის ფაქტი, რომ ვმუშაობ მხოლოდ იმ პრეპარატებზე, რომლებიც მსოფლიო ბაზარზე საუკეთესოა და გავლილი აქვს FDA-ის შემოწმება. ჩემთვის, როგორც ექიმისათვის, მნიშვნელოვანია ვიმუშავო პროდუქტით, რომელიც უსაფრთხოებისა და ხარისხის გარანტია. შესაბამისად, მირჩევნია, პაციენტს შევთავაზო მაღალი ხარისხის პროდუქტი და ამით ის იყოს დაცული რიგი გართულებებისაგან.
გვესაუბრეთ იმ კურსებისა და კონგრესების შესახებ, რომლებშიც მიღებული გაქვთ მონაწილეობა.
როგორც უკვე აღვნიშნე, 2008 წლიდან საზღვარგარეთ გავიარე ტრენინგები: შვეიცარიაში, იტალიაში, საფრანგეთში, მონაკოში, ისრაელში, რუსეთსა და აშშ-ში. მონაწილეობა მივიღე 100-ზე მეტ კონგრესში, მასტერკლასსა და ტრენინგში, თუმცა მათგან ყველაზე მნიშვნელოვნად მიმაჩნია „კადავერის კურსი“, რომელიც 2018 წელს სანკტ-პეტერბურგში ჩატარდა. იგი გამოირჩევა სწავლის უნიკალური მიდგომით. მასში შედის გვამებზე პრაქტიკული მუშაობა, რომლის საშუალებითაც შეგვიძლია შევიძინოთ ახალი ცოდნა ანატომიის სფეროში, გავაუმჯობესოთ ინიექციის ტექნიკა, გავეცნოთ გართულებებს და მათ პრევენციას. კომპანიების − „გალდერმასა“ და „გეას“ ორგანიზებითა და სპონსორობით, 2019 წელს უკვე მეორედ ვიყავი კადავერის კურსზე.
სამომავლო გეგმები.
სამომავლო გეგმები დიდია. მოგეხსენებათ, ესთეტიკური მედიცინა ცნობილია ინოვაციებით. შესაბამისად, ყოველ ჯერზე მიწევს სიახლის, ცოდნის დაგროვება და გაღრმავება. მაქვს გეგმები საკუთარ პროფესიასთან დაკავშირებით, თუმცა ამ ეტაპზე თავს შევიკავებ უფრო ვრცლად ამ თემაზე საუბრისაგან. „თუკი იცი შენი მოწოდება, იცი, რისთვის დაიბადე, იცი, რა უნდა აკეთო… თუკი მთელი აზრით ეთანხმები ამას, მთელი შენი ძალა ამისკენ გაქვს მიმართული, მაშინ რაც უნდა მოხდეს, წინ იარე“. მეც სწორედ ამ დევიზით მივიწევ წინ და შრომისუნარიანობითა და მიზანდასახულობით, ვცდილობ, მივაღწიო სასურველ შედეგს.
ტექსტი: მარიამ მთივლიშვილი
ფოტო: ვიქტორია ხეცაძე
საკონტაქტო ინფორმაცია:
Facebook: Dr. Eliso Jishkariani
Instagram: dr.eliso
