Designer of Dreams ყველაზე დიდი Dior-რეტროსპექტივა გახლავთ, რომელიც ოდესმე დადგმულა საფრანგეთში. იგი ბევრად მეტია, ვიდრე მოდა და ცნობილი ადამიანები. ეს არის წარსული და აწმყო. ადამიანები, რომლებიც მას ატარებდნენ − პრინცესა გრეისიდან, ლედი დაიანასა და ელიზაბეტ ტეილორიდან ჯენიფერ ლოურენსამდე, ნატალი პორტმანსა და რიანამდე. იგი ერთდროულად არის ქრონოლოგიური და თემატური, რაც იძლევა შესაძლებლობას გავიგოთ უფრო მეტი დიორის, მისი სახლისა და მოდის ისტორიის შესახებ ხელოვნებისა და კულტურის ფართო კონტექსტში.
„მოდის დიზაინერები ზედაპირულ ადამიანებად მიიჩნევიან, მაგრამ სინამდვილეში მათ აქვთ კულტურის უდიდესი შეგრძნება“, − აღნიშნავს მიულერი, რომელიც მუზეუმის დირექტორ ოლივიე გაბესთან ერთად შოუს თანაავტორი გახლდათ. „გამოფენის მიზანია, აჩვენოს შემოქმედების წყარო და კულტურა, რომელსაც ფლობდნენ კრისტიან დიორი და მისი შემდგომი დიზაინერები, ვინაიდან მათ შეისწავლეს ხელოვნების ისტორია. ამდენად, საზოგადოებისთვის მნიშვნელოვანია იმის გაგება, რომ მოდა არ არის „მარტივი“ საკითხი“.
არქივში შენახული წერილებით, ფოტოსურათებითა და დიორის ადრეული ბავშვობის უცნობი დოკუმენტებით, შოუ სწრაფად გადადის იმ ადრეულ პერიოდში, როდესაც მან თავისი საქმიანობა დაიწყო. ერთ ოთახში მოქცეული ცისარტყელას ფერებში წარმოდგენილი ტანისამოსი, როჯერ ვივიერის ფეხსაცმელი და სხვა აქსესუარები გვიჩვენებს, თუ როგორ ისწრაფოდა დიზაინერი ყოველმხრივ საინტერესო მიდგომისკენ.
