ახლა ზუსტად ის დროა, როცა საახალწლო სუფრისთვის მზადება და ფუსფუსი აქტიურ ფაზაში გადადის. ყველას გვსურს გავამზადოთ სუფრისთვის ისეთი კერძი, რომელიც თან მარტივი იქნება, თან გემრიელი, ბიუჯეტური, და რაც მთავარია − განსხვავებული. სწორედ ამიტომ, OK! გთავაზობთ თქვენთვის კარგად ცნობილი და საყვარელი შეფების საახალწლო რეცეპტებს, რომლებიც დარწმუნებულები ვართ თქვენი ოჯახის წევრებს ძალიან მოეწონებათ. ეს კერძები თქვენს საახალწლო სუფრას ორიგინალურსა და დახვეწილს გახდის. ასევე, მოგიყვებით თითოეული შეფის რესტორნის საახალწლო სპეციალურ შეთავაზებაზე. საახალწლო სუფრა წარმოუდგენელია ქართულ მინერალურ სასმელ „ბორჯომის“ გარეშე.
ჟურნალი OK! და „ბორჯომი“ დიდი შეფის სამზარეულოში შეგახედებთ.
შეფ მიშა ავსაჯანიშვილს რესტორანში „კარი“ ვეწვიეთ. ვერის უბანში მდებარე ეს ახალი ობიექტი ნამდვილად გამორჩეული ადგილია როგორც დიზაინით, ასევე კერძებით. როგორც შეფ მიშამ გვითხრა, საახალწლო სუფრა ინდაურის გარეშე საზეიმო ელფერს დაკარგავს და სწორედ ამიტომ შემოგვთავაზა ფრანგული რეცეპტი საკუთარი ინტერპრეტაციით.
წაბლითა და ვაშლით დატენილი ინდაური
მომზადების დრო: 3 საათი
დაგვჭირდება:
მთლიანი ინდაური
კარაქი − 100 გრამი
ხახვი − 2 თავი
წაბლი − ½ კგ
როზმარინი − 2 ღერი
ვაშლი − ½ კგ
ნიორი − 2 კბილი
3 ფორთოხალი
1 გრეიპფრუტი
ტკბილი პორტვეინი − 200 მლ
ზეთი
შებოლილი წიწაკა გემოვნებით
მარილი გემოვნებით
ბეკონის ნაჭრები − 100 გრ
ისპანახის, ჭარხლის ან სალათის ფოთლები სერვირებისთვის.
წაბლს წავაჭრათ თავები და შევდგათ ჰაერღუმელში, გამოსაცხობად. გამომცხვარ წაბლს კანი იოლად შორდება.
ვაშლი დავჭრათ მომცრო ზომის კუბებად. გავაცხელოთ ტაფა, გავადნოთ კარაქი და მოვშუშოთ წვრილად დაჭრილი ხახვი, ვაშლი, წაბლი და წვრილად დაჭრილი ლიმონი. ჩავამატოთ როზმარინი, ბეკონი − 50 გრამი; შუშვისას დავამატოთ ზეთი და ბოლოს, პორტვეინი, მარილი და წიწაკა გემოვნებით.
გასუფთავებულ, მთლიან ინდაურში ჩავდოთ მომზადებული სატენი. ფეხები დავამაგროთ თოკით, ზევიდან ფუნჯით წავუსვათ ზეთი, რომ ინდაური ოქროსფრად დაიბრაწოს და შევდგათ გამოსაცხობად ქურაში. გამოვაცხოთ 180 გრადუსზე 2 საათის განმავლობაში. ცხობის პროცესში რამდენიმეჯერ წავუსვათ ფუნჯით ცხიმი.
სანამ ინდაური მზადდება, ფორთოხლისა და გრეიპფრუტის ლებნები გავასუფთაოთ კანისგან, დავბრაწოთ დარჩენილი ბეკონი და გავრეცხოთ მწვანე ფოთლები. ამ ყველაფერს გამზადებულ ინდაურს შემოვუწყობთ გარშემო და საზეიმო კერძიც მზადაა.
მიირთვით გემრიელად!
